Elob ge ǁîb khoenab nî huisa ra mîmâi
1 Xawe Jakotse, nēsib ge ǃKhūb satsa ge kurub,
tsî Israeltse, satsa ge ǂnubiba ra mî:
“Tā ǃao, tita ge go ore tsi xuige;
tita ge ǀons âts ai go ǂgai tsi, sats ge a ti.
2 ǁGammi ǃnâ-uts ga ǃkharu, o ta ge sats ǀkha nî hâ;
ǃāgu tsîn ge dâuǂam tsi tide.
ǀAes ǃnâ-uts ga ǃkharu, xawets ge ǂhubi tide,
tsî ǀaeǁhabub on ge ǂhubi tsi tide.
3 Tita ǃKhūta sa Elo xui-ao,
Israeli di ǃAnuta, sa Ore-aota.
Egipteba ta ge sa xoremaris ase ge mā,
Etiopiab tsî Sebab tsîkha sa ǁamaǃkhunis ase.
4 Sats ge ti mûǁae a ǃgomǀgausa,
tsî a ǃgôaǃgôasa tsî ta ge ǀnam tsi.
Sa amǃnâ ta ge khoena ge mā,
sa ûib ǃaroma ta ge ǁaede ge ǁamaǃkhuni.
5 Tā ǃao, tita ge sats ǀkha hâ xuige!
“Sa suriba ta ge aiǂoasa xu nî hā-ū
tsî huriǂoasa xu ta ge nî ǀhaoǀhao du.
6 ǃKhawagas ǃoa ta ge ‘ǁîna māǁnâ’ ti nî mî
tsî ǀApas ǃoa ta ge ‘ǁîna tā ǃkhōǀgara’ ti nî mî.
Ti ôaga ǃnūseba xu ǀkhī-ū
tsî ti ôade ǃhūbaib di ǀkhâuǀamde xu.
7 Mâ-i hoa-i ti ǀons ǀkha ta ge ǂgai-i,
ti ǂkhaisib ǃaroma ta ge kuru-i,
tita xa ǂnubihe tsî kuruhe i hoa-e.”
Israeli ge ǃKhūb di ǃkhō-amao
8 “Ti khoena ǂgaihā,
ǁnān mûde ūhâ, xawe mû tamana;
ǁnān ǂgaede ūhâ, xawe ǁnâu tamana!
9 A di ǁaedi hoade ǂgaeǀhao tsî khoena hāǀhao.
Tari-i ǁîn di-e nēsa ge ǂanǂan-e
tsî tari-i ǁîn di-e ī ge xūna ge aimûǀgaru-e?
An ǁnâi ǁîn a ǂhanu ti nî mî ǀhûǀguitimî-aona hā,
an ǃgâ tsî ǃkhōǃgâ, ‘Nēs a ama ǃkhaisa.’
10 “Sadu ge ti ǃkhō-amaodo,
tsî ti ǃoaba-aodu, ǁhûiǂui ta gedo,
tib ge ǃKhūba ra mî;
tita ǂan tsî du tita ǃnâ nî ǂgomse
tsî tita a ǁÎ ǃkhaisa du nî ǁnâuǃāse.
Tita aiǃâ i ge elo-i xare-e ge ǀkhai i,
tamas ka io i ge tita khaoǃgâs tsîna hâ tide.
11 “Tita, tita ge ǃKhūta,
tsî tita xōǀkhā i ge ǀnî ore-ao-e a ǀkhai.
12 Tita ge ǂanǂan, ore tsî gere ǂanǂan ta,
ǃhao elo-i sadu ǁaegu ǂanhe tama hîa;
tsî sadu ge ti ǀhûǀguitimî-aodo, tib ge ǃKhūba ra mî.
13 Tita ge Elota tsî ǃgoaxaǁaeb ǃnâs tsîna ta ge a ǁÎ;
khoe-i xare-i ge ti ǁôaba xu oreǂui ǁkhā tide;
tita ga dī, o tari-e ǁnāsa mâǃoa ǁkhā?”
Babilonsa xu ûiǂoas
14 Nētib ge ǃKhūb, sa Ore-aob, Israeli di ǃAnuba ra mî:
“Sadu ǃaroma ta ge khoe-e Babilons ǁga ge sî;
tsî ta ge ǁîn hoana ǃkhōsis ǃnâ ge ū,
tsî Xaldeaǁîn ǃgâiaǂgaob ge ǃoab ǁnaeb ǃnâ nî ǀkharaǀkharahe.
15 Tita ge ǃKhūta, sadu ǃAnuta,
Israels di Kuru-aota, sadu Gao-aota.”
16 Nētib ge ǃKhūba ra mî, ǁnāb hurib ǃnâ-u daoba ge kurub,
ǀgaisa ǁgamgu ǃnâ-u ǃganna ge ǁguiba.
17 ǁNāb torokunidi tsî hāgu,
toroǂnubis tsî toroǃkhamaogu tsîna ge hîkākāba.
ǁÎgu ge ǁkhawa gu khâi tidese ge ǁnā,
ǃnâiǀarisa ǃamǀaetsurib khami gu ge ge ǀarihe.
18 “Tā ǃkharu ge xūn xa ǂâi,
tamas ka io ǀoro xūn xa ǂâiǂâisen.
19 Mû, tita ge ǀasa xū-e nî dī.
Mûǂan tamats kha hâ, ǀnai i go ītsoatsoasa?
ǃGaroǃhūb ǃnâ ta ge daoba nî kuru
tsî ǃgaroǃhūb ǃnâ ǃāga nî dâu kai.
20 Xamarin ge tita ǃgôasiba nî mā,
ǀgirin tsî ǀamin tsîn ona.
Tita ge ǃgaroǃhūb ǃnâ ǁgam-e ra mā ta
tsî ǀgopaǃhūb ǃnâ ǃāga,
tsî ti ǁaes ǁhûiǂui ta hâsa ǁgam-e ra ā kai ta.
21 Khoen aitsama ta ge ǂnubina,
ti koasa nî ǂanǂanse!”
Israeli ǁoren
22 “Jakotse, titats ge ǂgaiǀî tama ge i;
Israeltse, tita xats ge ge tsau!
23 Khauǁguibas ǃaroma du ge sadu gūna ǀkhī-ū tama ge i,
tamas ka io sadu ǁguibadi ǀkha tita ǃgôasiba mā tama ge i.
Mādi ǀkha ta ge tita du nî ǃoabase ǁgari du tama ge i,
tamas ka io ǃgâihamxūn ǃaroma ǀhupuǀhupu du tama ge i.
24 ǃGâihamxūna du ge mari-i ǀkha ǁamaba te tama ge i,
tamas ka io sadu kausa ǁguibadi ǀkha ǂkhîǂkhî te tama ge i.
Xawe du ge sadu ǁoren ǀkha ge ǂkhabu kai te;
sadu tsūdīgu ǀkha du ge ge ǃnao-ai te.
25 Xawe tita ge ǁnāta sadu ǁorena ra ǀariǂui ta;
tsî sadu ǁorena ta ge ǃaruǀî ǂâihō tide.
26 “ǀAu te, a da ǁnâuǃgâǃkhaib ǃoa ǃgû!
Sadu ǁhōba sī māǂgā re,
sadu ǂhanu-aisiba ǂnoabas ǃaroma.
27 ǂGuro aboxagu âdu ge ǁore
tsî sadu ǂgaeǂgui-aogu ge ti ǃoagu khâikhâisen xui-ao.
28 ǁNā-amaga ta ge sadu gaoǀgôaga ǀuriǀuri
tsî Jakoba hîkākāheb nîse ge māǁnâ
tsî Israela khoesisa ǀhanas ǃoa ra taotao.”
© Khoekhoegowab Elobmîs © Bible Society in Namibia, 2020.
