ǃKhūb ge Josuaba ra mîmā, îb ǃgau hâ ǃhūb tsîna ū
1 Josuab ge ǀnai kaise ge kaira hâ i. ǃKhūb ge Josuab ǃoa ge mî: “Sats ge ǀnai kaise kaira hâ, xaweb ge noxopa kai ǃhūba ūhe nîse ǃgau hâ. 2 Hoaraga ǀkharib Filistias tsî Gesurs tsîra dib, 3 tsî hoaraga ǀkharib Avims dib. (Sihorǃāb di ǀkharib, Egipteb di ǃhūǀgoras tawa ǁgoeba xu Ekrons di ǃhūǀgoras ǀapas ǃnâ ǁgoes kōse ǁgoe ǃhūb hoaragab ge Kanaanǁîn di ǃhūb ase gere ǃgapaǀîhe. Filisteǁîn di gao-aogu ge Gasas, Asdods, Askelons, Gats tsî Ekrons tsîdi ǃnâ ge ǁan hâ i.) 4 Hoaraga Kanaanǃhūb ge noxopa ǃgau hâ tsî Mearas, Sidonǁîn dis, Afeks Amorǁîn di ǃhūǀgoras tawa ǁgoes kōse. 5 Gebalǁîn di ǃhūb, Libanonni di aiǂoas hoaragas, Balgads Hermonǃhommi ǃkhawagas ǃnâ ǁgoesa xu Hamats ǃgâunas kōse. 6 Nēs ge ǃnâuxa ǃhūb Libanonǃhomgu tsî Misrefot-Maims tsîra ǁaegu ǁgoeb, Sidonǁîn ǁanǃnâ hâb hoaragaba ǃkhōǂgā hâ. Tita ge ǁnā khoen hoana Israelǁîn aiǃâ nî ǁgariǂui, tsîts ge satsa ǃhūba Israelǁîn ǃnâ nî ǀgora, tita ge mîmā tsi hâ i khami. 7 Nēsi nē ǃhūba nau khoese ǃhaodi tsî ǃkhare ǃhaos Manaseb dis tsîn ǃnâ ǀgora, ǁîn disen nî ūbasense.”
Jordanni aiǂoas ǃnâ ǁgoe ǃhūb di ǀgoraǂgāhes
8 Rubenni tsî Gadi ǃhaora tsî ǃkhare ǃhaos Manaseb dis tsîdi ge ǀnai ǃKhūb di ǃgāb Moseb xa Jordanni aiǂoasǀkhāb ai ǁgoe ǃhūba ge māhe hâ i. 9 ǁÎn di ǀkharib ge Aroers, Arnonǃgoaǃnāb amǃgâ ǁgoes tsî ǁnā ǃgoaǃnāb ǃnâ ǂnôa ǃās kōse gere sī tsî hoaraga ǀgapib Medebasa xu Dibons kōse ra sība ge ǃkhōǂgā hâ i. 10 ǁÎb ge Amonni di ǃhūǀgoras kōse gere sī tsî hoaraga ǃādi Amorǁî gao-aob Sihonni, Hesbons ǃnâ ge gao-ao ib xa gere ǂgaeǂuihedi hoade ge ǃkhōǂgā hâ i. 11 ǁKhātib ge Gileadi, Gesurs tsî Maakas tsîra di ǀkharigu, Hermonǃhommi hoab tsî Basanni hoaragab tsîna Salekas kōse ge ǃkhōǂgā hâ i. 12 ǁÎb ge ǁkhāti Ogi, Refaims di ǀunigab, Astarots tsî Edreis tsîra ǃnâ gere ǂgaeǂguib di gaosib hoaragaba ge ǃkhōǂgā hâ i. Moseb ge ǁnā khoen hoana dan tsî ge ǁgariǂui, 13 xawen ge Israelǁîna Gesurs tsî Maakas tsîra khoena ǁgariǂui tama ge i, tsîn ge noxopa Israeli ǃnâ ǁan hâ.
14 Moseb ge Levib ǃhaosa ǃhū-e mā tama ge i. ǃKhūb ge Moseba mîba hâ i khamin ge ǁîna ǃKhūb, Israeli di Elob altars ai ra ǁguibahe khauǁguibadi di ǃâ-e ǁîn dise nî ǃkhōǃoa.
Rubenni ǃhaos ge māhe ǀkharib
15 Moseb ge ǀaokhoen Rubenni ǃhaos dina ǃhūb di ǃâ-e ǁîn dise ge mā. 16 ǁÎn di ǀkharib ge Aroers, Arnonǃgoaǃnāb amǃgâ ǁgoes tsî ǁnā ǃgoaǃnāb ǃnâ ǂnôa ǃās kōse gere sī tsî hoaraga ǀgapib Medebas ǂnamipe ǁgoeba ge ǃkhōǂgā hâ i. 17 ǁÎb ge Hesbons tsî hoaraga ǃādi ǀgapib ai ǁgoede ge ǃkhōǂgā hâ i. Dibons, Bamot-Baals, Bet-Baalmeons, 18 Jahas, Kedemots, Mefats, 19 Kirjataims, Sibmas, Seret-Sahars ǃgoaǃnāb ǃnâ ge ǃhommi ai hâ is, 20 Bet-Peors, Pisgaǃhommi di ǃgoagu tsî Bet-Jesimots tsîna. 21 ǁÎb ge ǀgapib ai ǁgoe ǃādi hoaragadi tsî hoaraga gaosib Amorǁîn di gao-aob Sihonni, Hesbons ǃnâ gere ǂgaeǂguib dib tsîna ge ǃkhōǂgā hâ i. Moseb ge ǁîba ge dan tsî ǁkhāti Midianni di ǂgaeǂgui-aogu Evib, Rekemmi, Suri, Huri tsî Rebab tsîga. Nēgu hoagu ge gao-aob Sihonna ǃhūba gere ǂgaeǂguiba. 22 Israelǁîn xa ge ǃgamhe khoen ǃnâb ge aimûǀgaru-aob Bileammi, Beori ôab tsîna ge hâ i. 23 Jordanni ge ge Rubenni ǃhaos di huriǂoasǀkhāb di ǃhūǀgora i. Nēdi ge ǃādi tsî ǂkhari ǃādi ūhân nîsen ge ǀaokhoen Rubenni ǃhaos dina māhede.
Gadi ǃhaos di ǀkharib
24 Moseb ge ǁkhāti Gadi ǃhaos di ǀaokhoena ǃhūb di ǃâ-e ǁîn dise ge mā. 25 ǁÎn di ǀkharib ge Jasers tsî Gileadi di ǃādi hoadi, ǃkhare ǃâb Amonni ǃhūb dib, Aroers, Rabas aiǂoas ǃnâ ǁgoes kōse ge ǃkhōǂgā hâ i. 26 ǁÎn di ǃhūb ge Hesbonsa xu Ramat-Mispas tsî Betonims kōse, tsî Mahanaimsa xu Lodebars di ǃhūǀgoras kōse gere sī. 27 Jordanǃgoaǃnāb ǃnâb ge ǁîba Bet-Harams, Bet-Nimras, Sukots, Safons tsî ǃgau hâ ǀkharib Hesbons gao-aob Sihonni dib tsîna ge ǃkhōǂgā hâ i. ǁÎn di huriǂoasǀkhāb di ǃhūǀgorab ge Jordanna ge i Galileahurirob ǀapas ǃnâ ǁgoeb kōse. 28 Nēdi ge ǃādi tsî ǂkhari ǃādi ūhân nîsen ge ǀaokhoen Gadi ǃhaos dina māhede.
Manaseb ǃhaos ge māhe ǀkharib
29 Moseb ge ǃhūb di ǃâ-e ǀaokhoen ǃkhare ǃhaos Manaseb dis dina ūhân nîse ge mā. 30 ǁÎn di ǀkharib ge Mahanaims kōse gere sī, tsî hoaraga Basanni, hoaraga gaosib Basanni gao-aob Ogi dib tsî ǁkhāti hoaraga ǃnanidisi ǃādi Jairs Basanni dis didi tsîna ge ǃkhōǂgā hâ i. 31 ǁÎb ge ǃkhare ǃâb Gileadi dib, Astarots tsî Edreis tsîra, danaǃāra Ogi gaosib, Basanni dib dira tsîna ge ǃkhōǂgā hâ i. Nēn hoan ge ǃkhare ǃâb, Manaseb ôab Makiri di ôananôagub diba ge māhe.
32 ǁNātib ge Moseba Moab ǂgāgu Jerixos tsî Jordanni aiǂoas ǃnâ ǁgoega ge ǀgoraǂgā. 33 Moseb ge Levib ǃhaosa ǃhū-e mā tama ge i. ǁÎb ge ǁîna ǃKhūb, Israeli di Elob ra ǁguibahe ǁguibade xun ǁîn di ǃâsa nî ǃkhōǃoa ǃkhaisa ge mîba.
© Khoekhoegowab Elobmîs © Bible Society in Namibia, 2020.
