Paulub ge Efeses ǃnâ ra aoǁnâ
1 Ganupeb Apoloba Korintes ǃnâ hâ hîab ge Pauluba ǀgapiseb di ǀkhariga ge ǃgûǃnâ tsî Efeses tawa ge hā. ǁNāpab ge ǀnî ǁkhāǁkhāsabena* ge ǀhao-ū, 2 tsîb ge ǁîna ge dî: “ǂGom du geo, ǃAnu Gagaba ǃkhōǃoa du ge?”
On ge “Sida ge ǁnâus tsîna hî tama hâ, ǃAnu Gaga-i hâ ǃkhaisa” ti ge ǃeream bi.
3 “O du kha mâ ǁāǁnâǃnôasa ge ǃkhōǃoa?” tib ge ǁîna ǃaruǀî ge dî.
On ge “Johaneb di ǁāǁnâs” ti ge ǃeream.
4 Ob ge Pauluba ǁîna ge mîba: “Johaneb ge ǃhobasens di ǁāǁnâs ǀkha ra ǁāǁnâ tsî khoena ǁnāb ǁîb khaoǃgâ nî hāb, Jesub ǃnân nî ǂgom ǃkhaisa gere mîba.”
5 Nēsan ge ǁnâus khaoǃgân ge ǃKhūb Jesub di ǀons ǃnâ ge ǁāǁnâhe. 6 Tsî Paulub ge ǃomkha ǁîna ǁgui-ais khaoǃgâb ge ǃAnu Gagaba ǁîn ai ge hā tsîn ge ǃkharagaǃnâgu gowagu ǃnâ ǃhoa tsî ǃKhūb xa gere kēbo. 7 ǁNāpa gu ge ǁaubexa disiǀgamǀa aoga ge hâ i.
8 Tsîb ge Pauluba sinagogeb* ǃnâ ǂgâ tsî ǃnona ǁkhâgu di ǁaeba ǁkhoase aoǁnâ, ǂnoagu tsî ra Elob Gaosib ǂama hâ xūn xa ǃhoadanse. 9 Xawe ǀnîn ân ge ǂgom tama i tsî kaise ǃnâudanaxa tsî ǂkhabase ǁnāpa ge hâ in aiǃâ Daob xa gere ǃhoa, ob ge ǁîna xu ǃgûbē tsî ǀnî ǁkhāǁkhāsabena ǁîb ǀkha ū tsî tsēkorobe Tiranub di skoli tawa gere ǁkhāǁkhā. 10 Nēs ge ǀgam kurikha ǀgaiba ge aiǃgû, Asiab di hoaraga khoen, Jodeǁîn tsî Grikeǁîn nî ǃKhūb di ǂhôasa ǁnâuse.
Skevab ôagu
11 Tsîb ge Eloba Paulub ǃnâ-u ǁnaetisa tama buruxa dīga gere dī. 12 Tsî ǁnātikōse ī tsî aosenǃkhaigu tamas ka io ǃgaesenǃkhaigu ǁîb sorosa ga tsâǀkhāga ǁîn di ǀaesen hân tawa gere sī-ū tsîn ge ǀaesenain âna xu gere ǂuru tsî gu ge ǂkhaba gagagu hîa ǁîn ǃnâ hâga ǁîna xu gere ǂoa.
13 O gu ge ǃgûma tsî ǂkhaba gagaga gere ǃhaeǂui Jodeǁîga ǃKhūb Jesub ǀonsa sîsenūsa gere dītsâ. Tsî gu ge “Jesub hîab Pauluba ra aoǁnâb di ǀons ǃnâ ge ge ra mîmā go, ǂoaxa go nî ǃkhaisa!” ti gere mî. 14 Tsî nēsa gere dīgu ge Skevab ti ǀon hâ, Jodeǁî ǀgapipristeri* di hû ǀgôaga. 15 Ob ge ǂkhaba gagaba ǁîga ge ǃeream: “Jesuba ta ge a ǂan tsî Paulub tsîna ta ge a ǂan. O sago a tari?” 16 Tsîb ge ǁnā khoeb ǂkhaba gagaga ge ūhâ iba ǁîgu ai uri tsî ǁîga ge ǁnāǂam tsî ge dan. Tsî gu ge ǀōǀkhāse tsî tsuihe hâse omsa xu ge ǃkhoeǂoa.
17 Tsîs ge nē ǂhôasa hoaraga Jodeǁîn tsî Grikeǁîn hîa Efeses ǃnâ hân xa ge ǁnâuhe. O i ge ǃao-e hoaraga khoena ge hāǂam tsîn ge ǃKhūb Jesub di ǀonsa ge kaikai. 18 Tsîn ge ǂguin âna ǂgom tsî ǁguiǁnâ tsî ǁîn di dīga ǁguiǁnâ tsî gere ǂanǂan. 19 ǁKhātin ge ǂguin hîa gere ǃgaidīna ǁîn di xoamâi ǂkhanide hā-ū tsî ǁîde khoen hoan di mûǁae gere ǂhubi. ǁKhāsib nē ǂkhanidi dib ge ge korodisiǀoadisi ǀhai mari i. 20 Nē ǀgaisa ǀgaub ais ge ǂhôas ǃKhūb disa ǀomkhâi tsî ǃaruǀîǀgui ge ǀgai.
Efeses ǃnâ ge hâ khâikhâisens
21 Tsî nēn hoan ge īs khaoǃgâb ge Pauluba ge mîǁgui Masedoniab tsî Axajab tsîkha ǃnâ-u ǃkharu tsî Jerusalems ǁga ǃgûsa, mî raǃâ: “ǁNāpa ta ga sītoas khaoǃgâ i ge nî ǂhâbasaba te, Romes tsîn tawa ta nî sī ǃkhaisa.” 22 Tsîb ge ǁîb di ǀgam hui-aokha, Timoteub tsî Erastub hâkha Masedoniab ǁga sî tsî noxopa ǁaero-e Asiab ǃnâ ge hâ.
23 ǁNā ǁaeb ǃnâ i ge kai khâikhâisen-e ǃKhūb di daob xa ge hâ. 24 Ob ge ǂanǂansa khoeb, Demetriub ti ǀon hâb, ǀhaiǀuri xūkuru-aoba Grike elos Artemis di tempeli di ǁgaeǁgae-īgu, ǁîs khami ra mûsenga gere kuru tsî nē sîsenǃnôab ǃnâ-u gu ge kuruǁkhābega kai hōǂgāsa gere hōbasen. 25 Tsîb ge nē kuruǁkhābegu tsî sîsenaon hîa nē sîsenǃnôaba ra dīna ǂgaiǀhao tsî ǁîna nēti ge mîba:
“Ti khoedo, sadu kom ǂano sada di ûiǁkhāsib nē sîsenna xu ǀgui hâ ǃkhaisa. 26 Tsî du kom ǁkhāti mû tsî ra ǁnâuo, Efeses ǃnâ ǀgui tama i tsî ǁaubexa hoaraga Asiab ǃnâ, nē Paulub ra ǂgui khoena sada elogan ǃoaba tidese ǁnāǁgôa kai tsî ǃomgu ǀkha kurusa elogu a ǁauxū ti mî tsî ǃkhaisa. 27 Tsîs ge nēsa sada di sîsenni nî ǃgâi ǀons âba ǂoaǃnâ ǃkhais di ǃaorosasib ǀguiba ūhâ tama hâ, xawe sada kai elos, Artemis hîa hoaraga Asiab tsî ǃhūbaib ai ra ǀgoreǀîhes di tempeli nî ǁauxūse ǃgôahe tsîs nî kaisib âsa ǂoaǃnâ ǃkhais tsîn ge hâ!”
28 Nēsan ge ǁnâu on ge kaise ǂkhîoǃnâ tsî “Kais ge a Artemis, Efeseǁîn disa!” ti ge ǂgaiǂui. 29 Tsîs ge hoaraga ǃāsa ge gongonǃnâhe, on ge ǀguiǂâixase teaters ǁga ge ǃkhoe tsî Paulub ǀkha ge hâ i Masedoniaǁîkha Gajub tsî Aristarxub hâkha ge ǃkhō. 30 Paulub ge ǁnā ǀhaos khoen dis tawa ǂgâ ǂgao, on ge ǁkhāǁkhāsabena ǁîba mā-am tama ge i. 31 Tsî gu ge ǁkhāti ǂammâisagu Asiab ǀkharib digu, Paulub di horesaga ǁîb ǁga ge sîhe tsî gu ge ûib âbab teaters tawa sīs ǀkha ǃaorosasib ǃnâ mâi tide ǃkhaisa gere ǀkhoma bi.
32 Hoaraga khoen ge gere ǂkhupi tsîn ge ǀnîna nēti tsî nauna nauti gere ǃau. Xawen ge ǃnāsan âna tare-en go ǁnāpa ôasī ǃkhais tsîna ge ǀū i. 33 Tsîb ge Aleksandera ǂnubis di ǁaeguba xu aisǀkhāb ǃoa Jodeǁîn xa ge ǂoaxa kaihe. Ob ge mâsib ǃaromab nî ǂnoabasense, ǃommi âba ge ūkhâi, khoena ǃnōǃnōs ǃaroma. 34 Xawe ǁîb a Jodeǁî ǃkhaisan ge ǂan on ge ǂnubis di khoena ǀgam irkha di ǁaeba “Kais ge Artemis, Efeseǁîn disa!” ti gere ǂgaiǂui.
35 ǀAms aib ge ǃās di xoa-aoba ǂnubisa ǃnōǃnō tsî ge mî: “Efeseǁîdo, tari-e kha Efeses a Artemis di tempelǃûi-ao tsî ǁnā īb ǀhomma xu ge ǁnāb di sâu-ao ǃkhaisa a ǀū? 36 Tsî nēs a gowaǃoaheǁoasa ǃkhai amaga du ge nî ǃnō tsî ǁgauoǃnâse xū-e dī tide. 37 Sadu go nē khoekha, tempelǃnari-ao tamas ka io ǁkhāti sada di elosa ǃkhāǃkhā tamakha go hā-ū xui-ao. 38 ǁNā-amaga, Demetriub tsî ǁîb di kuruǁkhābegu ga khoe-i ǃoagu ǀanaǃgâxū-e ūhâo, ǁnâuǃgâǃkhaigu ge hâ tsî gu ge ǂhanuǂhanu-aogu tsîna ǁkhāti hâ, xuige a gu ǁîgu di ǀanaǃgân hîa gu ga ūhâna ǁnāpa sī-ū. 39 Tsî ǀnî xū-i hîa du ra ǂhâba-i ga hâo, a-i ǁnā-e ǂhanub din xa ǀhû hâse ǀgoraǃgâhe. 40 Sada kom nētsē go īn ǃaroma khâikhâisens ai ǃnuriǃgâhe ǁkhāo, tare-i ǃaroma da ra khâikhâisen ǃkhaisa da ǂnoasen ǁoa amaga.” 41 Tsî nēnab ge mîtoas khaoǃgâb ge ǁîna ge ǃgû kai.
© Khoekhoegowab Elobmîs © Bible Society in Namibia, 2020.
