Deuteronomium 17 - Khoekhoegowab New Translation 2020 (KKG20)

1 “Tā ǃKhūb sadu Eloba ūsa goma-i tamas ka io ǀgoa-e ǁguiba; ǃKhūb ge nēsa kaise ǃhuisa.

2 “Sadu ǃādi ǃKhūb sadu Elob ge mā dudi ǀguis ǃnâ i ga khoes, tamas ka io khoeba ǃKhūb ǃoagu ǁore tsî ǁîb di ǃgaeǀhaosa 3 ǀkhara elogu, tamas ka io sores, tamas ka io ǁkhâb, tamas ka io ǀgamirode ǀgoreǀîs tsî ǃoabas ǀkha khôa; ǃKhūb di mîmās ǃoagu, 4 tsî nēsa du ga mîbahe tamas ka io ǁnâu, o du ge ǁnāsa ǂōrisase nî ôaǃnâ. Nē ui-uisa ǂkhaba xū-i ge Israelǁîn ǃnâ ī ǃkhais ga ama, 5 o ǁnāti ī khoe-e ǃās ǃauga ǂoa-ū, î ǀuiǁhomǃan. 6 Xawe i ge ǁnāti ī khoe-e ǀgam tamas ka io ǃnāsa khoen ga ǀhûǀgui, o ǀgui a ǀuiǁhomǃanhe ǁkhā; xawe khoe-i xare-i ge ǀgui khoe-i di mîs ai ǃgamhe tide. 7 ǀHûǀguitimî-aon ge ǂguro ǀuide nî ǂnoa, ǁnās khaoǃgân ge nau hoaraga khoen hoana ǁnā khoe-e nîra ǀuiǁhom; ǁnā ǀgaus ai ǀgui du ge nēti ī ui-uisa ǁoreba a ūbē ǁkhā.

8 “ǃGomǃgâxa ǁhōgu tsîn ge ǀgoraǃgâ-aogu tawa a hā-ūhe ǁkhā; ǀaoǂnâxūs ǁhōb tamas ka io ǃkhams di ǁhōb tamas ka io ūhâxūna ǂkhôa-aihes di ǁhōb tsîga. ǁNāti ga ī, o ǃKhūb sadu Elob ge ǀgoreǀî-aiheb nîse ǁhûiǂui ǀō-aisa ǃkhais ǁga ǃgû. 9 ǁNāpa Leviǁî pristergu tsî ǁnā ǁaeb ai sîsenni ǃnâ hâ ǀgoraǃgâ-aob tsîgu tawa ǁnā ǁhōga sī-ū, î gu ǁîga mîǁguiba ū. 10 ǁÎgu ra ū mîǁguiba ūǃoa, î ǁnâuǀnam tsî ǁîgu ra mîǁguin hoana dī. 11 ǁÎgu ǀgoraǃgâsa ūǃoa, î ǀgui xū-i tsîna ǀaro tamas ka io ūbē tamase ǁnâuǀnam. 12 Pristeri tamas ka io ǀgoraǃgâ-aoba ga ǁnâuǀnamoǃnâ khoe-i ge nî ǃgamhe; nē ǀgaus ai ǀguib ge ǂkhababa Israelǁîna xu a ūbēhe ǁkhā. 13 On ge hoaraga khoena ǁnâu tsî nî ǃao, tsî i ge khoe-i xare-e ǁnāti ī ǂkhababa ǁkhawa dītsâ tide.

Gao-ao-i nî ǁhûihe ǀgaub

14 “ǃKhūb sadu Elob nî mā duse i ǃhūb ǃnâ du ga ǂgâ tsî ūbasen tsî ǁnāpa a ǁan, o du ge sadu tsîna gao-ao-i xa du nî ǂgaeǂguihe ǃkhaisa nî ǂhâba, nau ǃhaodi sadu ǂnamipe hâdi khami. 15 ǁNā-amaga ǃKhūb sadu Elob ǁhûiǂui hâ khoeb ǀguiba gao-aose mâi. ǁNāti ī khoeb ge sado xu nî ǂoaxa tsî ǃhaokhoena xu hâ tide. 16 ǁNāti ī gao-aob ge ǂgui hāna ūhâ tide tsî ǁkhāti Egipteb ǁga ǁîb khoena hānan ǁnāpa sī nî ǁamase sî tide. ǁKhawa du ǁnāǀî oa tide tib ge ǃKhūba mî xui-ao. 17 Gao-aob ge ǂgui tarade ūhâ tide, nēs nî ǁîba ǃKhūba xu ǁnāǁgôa kai xui-ao; tsîb ge ǁkhāti ǀhaiǀurib tsî ǃhuniǀurib tsîkha ǀkha ǃkhūǃkhūsen tide. 18 Gao-ao kaib ka, ob ge ǁîba ǂhunuma ǂkhanis ǃKhūb di ǂhanub tsî ǁkhāǁkhāde ūhâs, Leviǁî pristergu tawa hâsa xu ǁgâiǁnâba nî dībasen. 19 ǁÎb ge nē ǁgâiǁnâba ǁîb tawa ūhâ tsî ûib hâs kōse ǁîba nî khomai, îb hoaǁae ǁkhāǁkhāsen, ǃKhūbab ǁnâuǀnamxasib ǃnâ ǀgoreǀî tsî ǂgomǂgomsase hoa xūn hîa ǁîb ǃnâ ra mîmāhena nî ǁnâuǀnamsa. 20 Nēs ge ǁîba ǃgâsa Israelǁîn ǃoa-ai ǀgapiǂâixase tanisens tsî ǃKhūb mîmāde ǃûǂamsa xu nî ǁkhae. ǁNâuǀnamxab ka, ob ge ǂomxase ǁîb di gaosis ǃnâ, ǁîb tsî ǁîb ôan tsîn ǀkha Israeli ǃnâ nî ûi.