Judab gao-aob Manaseb
(2 Kroniks 33:1-20)1 Manaseb ge disiǀgamǀa kurixab a hîa Judab di gao-ao kai, tsî korodisikoroǀa kuriga Jerusalems ǃnâ gere ǂgaeǂgui. ǁÎb îs ge Hefsiba ti ge ǀon hâ i. 2 Manaseb ge ǃKhūb ge ǁîb di ǁaes aiǃâ ǁgariǂui khoen di ui-uisa ǁnaetiga sao tsî ǃKhūb ǃoagu ge ǁore. 3 ǁÎb ge ǀūben di ǀgoreǀîǃkhaidi, ǁîb îb Hiskiab ge hîkākā hâ ide ǁkhawa ge omkhâi. Tsîb ge Baala altarde ǂnubiba tsî ǁgôa-elos Aserasa ība ge dība, Israeli gao-aob Axab ge dī hâ i khami. Manaseb ge ǁkhāti ǀgamirode gere ǀgoreǀî. 4 ǁÎb ge ǀūben altarde Tempeli, ǁîb xab ge ǃKhūba, ǁîb ǃnâb nî ǀgoreǀîhe ti a mîb ǃnâ ge ǂnubi. 5 Tempeli di omǂnamikha ǃnâb ge ǀgamirodi nî ǀgoreǀî-aihe altarde ge ǂnubi. 6 ǁÎb ôab ǂûbab ge khauǁguibase ge ǁguiba. ǁÎb ge ǀkhūdi tsî ǃgaidīgu tsîn ǃnâ amǃnâxa tsî aimûǀgaru-aon tsî ǁō hân gagadi ai sī gere ǀape-ôa. ǁÎb ge kaise ǃKhūb ǃoagu ǁore tsî ǁîba ge ǁaiǁai. 7 ǁÎb ge Tempeli ǃnâ ǁgôa-elos Aseras ība ge mâi; Tempeli ǁîb xab ge ǃKhūba, Davidi tsî ǁîb ôab Salomob tsîkha ǃoa mîba: “Nēpa Jerusalems ǃnâ, nē Tempeli Israeli di disiǀgamǀa ǃhaodi ǀkhariga xu ta ge ǁhûiǂuiba ta ge tita nî ǀgoreǀîǃnâhe ǃkhaib ase ge ǁhûiǂuibasen. 8 Tsî Israelǁaes ga ti mîmādi hoade ǁnâuǀnam tsî ti ǃgāb Moseb ge ǁîna mā ǂhanub hoaba ǃkhōǀgaipe, o ta ge ǁîn aboxaga ta ge mā ǃhūba xun nî ǁgariǂuihesa mā-am tide.” 9 Xawe Judab khoen ge ǃKhūba ǁnâuǀnam tama ge i, tsîb ge Manaseba ǁîna ǁnā ǃhaodi ǁîn aiǃâb ge ǃKhūba ǃhūba xu ǁgariǂuidi gere dīs ǃgâ-ai ǃnāsa ǁoreba ge dī kai.
10 Ob ge ǃKhūba ǁîb ǃgāgu, kēbo-aogu ǃnâ-u ge mî: 11 “Gao-aob Manaseb ge nēti ī ui-uisa xūn, Kanaanǁîn gere dī xūn ǃgâ-ai ǁgaisina ge dī; tsîb ge ǁîb di ǁgôa-elogu ǀkha Judab khoena ǁoreb ǃnâ ge ǂgaeǂguiǂgā. 12 ǁNā-amaga ta ge tita ǃKhūta, Israeli Elota Jerusalems tsî Judab tsîra ǂama ǁnātikō kai tsūǀkhāb, ǁîb xa ga ǁnâu khoe-i hoa-e nî burugâ kaiba nî hā-ū. 13 Tita ge Jerusalemsa nî ǁkhara, Samarias tsî Israeli gao-aob Axab tsî ǁîb di surib tsîna ta ge ǁkhara khami. Tita ge Jerusalemsa, ǀomǂuiǃnâhe tsî ǃkhupuǃnā-aihe hâ ǃores khami nî ǀomǂuiǃnâ. 14 ǃGau gen Judab dina ta ge nî ǁnāxūǃgâ tsî ǁîn khākhoen, ǁîna dan tsî ǃhūb âna nî hîkākān ai nî māǁnâ. 15 Nē xūna ta ge ti khoena nî dī-ū, ǁîn aboxan ge Egipteba xu doeǂoa ǁaeba xu nētsēs kōsen ge ti ǃoagu ǁore tsî tita ǁaiǁai amaga.”
16 Manaseb ge ǁnātikō ǂgui, ǀhapio khoena ge ǃgam, Jerusalems ǃgangu ǃnâb ge ǀaoba dâus kōse. ǁNāsab ge Judab khoenab ge ǁoreb ǃnâ ǂgaeǂguiǂgā tsî ǃKhūb ǃoagu ǁore kais xōǀkhā ge dī.
17 Manaseb ge dī xūn hoan, ǁîb ge dī ǁoren tsîna ǃkhōǂgā hân ge ǃNaeǃkhaidi ǂKhanis Judab Gao-aogu dis ǃnâ a xoamâisa. 18 Manaseb ge ǁō tsî gao-ommi di ǃhanab, Usab di ǃhanab ǃnâ ge ǁkhōhe, tsîb ge ǁîb ôab Amonna ǁîb soas ǃnâ ge gao-ao kai.
Judab gao-aob Amonni
(2 Kroniks 33:21-25)19 Amonni ge ǀgamdisiǀgamǀa kurixab a hîa Judab gao-ao kai, tsî ǀgam kurikha Jerusalems ǃnâ ge ǂgaeǂgui. ǁÎb îs ge Mesulemet ti ge ǀon hâ i, Harusi, ǃās Jotbas dib di ôasa. 20 ǁÎb ge ǁîb îb Manaseb ǁkhāb khami ǃKhūb ǃoagu gere ǁore. 21 ǁÎb îb di dīga ǁgaeǁgae tsîb ge ǁgûb gere ǀgoreǀî ǁgôa-elo-īga gere ǀgoreǀî. 22 ǃKhūb, ǁîb aboxagu di Eloba ǁnāxū tsîb ge ǃKhūb di mîmāde ge ǁnâuǀnamoǃnâ.
23 Amonni ǂamkhoegu ge ǁîb ǃoagu ǀapeǀhao tsî ǁîba gao-ommi ǃnâ ge ǃgam. 24 On ge Judab khoena Amonna ge ǃgam khoega ǃgam tsî ǁîb ôab Josiaba ǁîb soas ǃnâ ge gao-aodī.
25 Amonni ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 26 Amonni ge Usab ǃhanab ǃnâ ge hâ i ǀhobas ǃnâ ge ǁkhōhe, tsîb ge ǁîb ôab Josiaba ǁîb soas ǃnâ ge gao-ao kai.
© Khoekhoegowab Elobmîs © Bible Society in Namibia, 2020.
