ǃAob ge Egipteǁîna tsuxub ǃnâ ra hāǂam
1 ǃKhūtse, sa ǀgoraǃgâdi ge a kai tsî mîǃgāǃgāhes ǃaroma a ǃgom, ǁnā-amagan ge nē xūn xa ge ǁkhāǁkhāhe tama hâ i khoena ge ǁnāǁgôa. 2 Xorexūsa khoen ge sa ǃanu ǁaesan ǁîn ǀgaib ǃnâ ūhâ ti ge ǂâi hâ i, xawen ge ǁîna ǁîn di omdi ǂûdi ǃnâ ǃkhōsaben ase ǁnā gaxu, ǃkhae tsuxub ǃnâ ge ǁgoe i. ǁÎn ge ǁîn di ǂhunuma omdi ǃnâ sa ǀamo sâuba xu ǂganamǂuihe hâse ge ǁgoe i. 3 ǁÎn ge ǁîn di ǂganǃgâsa ǁoren ǀkhan ǃkhae ǂgāmâisab, ǀuruxasib dib ǃgâb ai sâusa ti ge ǂâi hâ i, xawen ge ǃaoǃaosa īn, sâoǃnâ kai ran xa ge sauruǀgaruǀgaruhe. 4 ǃKhae ǁhôadi hîan ǁgoeǃnâdi tsîn ge ǁîna, ǃaoba ge ǁkhaeba ǁoa i. ǁÎn ge ui-uisa ǀōgu xa ge xāǂgāhe hâ i tsîn ge ǀnore īsina ā ra khami ī aidi ǀkha ǁîn aiǃâ hā ge mâ. 5 ǀAe-i xare-i ge ǁîna ǃnâba mās ǀgaiba ge ūhâ tama hâ i tsî ǀgamirodi tsîn ge ǃnâba nē ǃaoǃaosa ǃkhaeb ǃnâ ge hā-ū ǁoa i. 6 ǁNāpab ge ǃhuriǃhurisa ǀaeb khoe-i xa khauhe tamab ǀguiba ǁîn ai gere ǃnâ tsîn ge ǁîn di ǃaob ǃnâ ǁîn gere mûnanai xūn xab ama ǃhūbaiba a tsū ti ge ǂâi hâ i. 7 ǁÎn ǃgaidī-aon di sîsengu ge ge taotaohe tsî ǁîn di gā-aisib koasenūn gereb ge ge ǁauxū kai. 8 ǁÎn ge ǀaesengu tsî ǃaogu tsînan ǀae hâ khoena xu ǃhaeǂui ǁkhā ti ge mîmâi, xawen ge nēsi ǁî-aitsama gâsib tsî ǃaroma-e ūhâ tama ǃaogu ǀkha ǀaesen hâ. 9 ǃAoǃaosa xū-i ǁîna nî ǃhuriǃhuri i ǀkhai tin ga ǂâi, xawen ge ǀhui ra ǀaon tsî ǀgurun tsî xamarin ǁîna ra ǁnāǂamn xa gere ǃaoǃaohe. 10 Tsîn ge ǁnāti ǃaob xa ǀkhū, mûde ǁkhowa-amsa ǃao, tsî xawe ǁkhāti ǁîde ǂganam ǁoase ge ǁō.
11 ǂKhaba khoen ge hugaǀgui a ǃaoǃnâ tsî aitsama ra ǀgoraǃgâsen. ǁÎn di ǀhapixa ǂgaoǂans xan ge hoaǁae ǃaorosa xūn ǁîn ǀkha nî ī ǃkhais di ǃaob ǀkha gere hâ. 12 ǃAob ge hugaǀgui khoen hîa ǁîn di mâsiba ǂhanu ǀgaub ǃnâ mûsa ra ǂkhān xa ra ǃaromahe. 13 ǂGomǃgâsens ǃnâts ga tôasisa, ots ge ǀūsib ra hā-ū ǃaob ǃnâ ra māǁnâsen.
14 ǃKhaenab ge ǁŌhân Hâǃkhaib, ǁîb tsîn a ǀgaioǃnâba xub ge hā, xui-ao ǀgai-e nē khoen ǂama ge ūhâ tama hâ i. Xawen ge ǁîna ǁō hâ khoen khami ra ǁom. 15 ǁÎn ge ǃaoǃaosa īsigu xa ǁgarihe tsî gon ǁoase ge ǁgoe, ǃnāpetamase nē xūn di ǃaob xa hāǂamhe tsî. 16 Khoen ge ǃnapetamase ǁnā tsî ǁîn di ǂhunuma ǃaob di khedegu xa ge ǃgaeǁguihe hâ i. 17 ǂGari-aogu, gūǃûi-aogu tsî sîsenaogu ǃgaroǃhūb ǃnâ ge hâ igu ge ǁkhā ǃgomsib, ǃnora xu ǁoa gu ab xa ǃkhōhe tsî ǃkhaenab ǃnâ ǁkhā mûheǁoasa khedeb xa ge ǃgaeǁguihe hâ i. 18-19 ǁÎn ge ǂoab di ǀōb, ǀhomaniron haidi ǃnâ ra ǁnaen, dâu ra ǁgammi di ǀōb, ǁnā ra ǃgareǀuidi di ǀōb, mûhe tama ǃkhoema ra xūn di ǀōb, ǁaixa ǀgurun tsî xamarin di ǃgorob tamas ka io ǃhomgu di ǀganab xa gere ǃaoǃaohe. 20 ǀOasa ǃnâb tsēs dib ǃnâb ge hoaraga khoesiba ǂhanihe tamase sîsenxasigu ǀkha gere aiǃgû. 21 ǁNā khoen ǀguin ge tsuxub ǃkhaenas, ǂguro hōǃâs ǁōb ǃkhaenab dis hîa ge ǁîna ǃâu hâ is xa ǃgū-aihe hâ i. ǁÎ-aitsaman ge ǃnao-aisen ǃgommi ge ǃkhaenas ǃgâ-ai ge ǃgom i.
© Khoekhoegowab Elobmîs © Bible Society in Namibia, 2020.
