Jakob ge Esaub ǀkha ra ǀhao
1 Kōkhâib ge ob ge Jakoba Esauba hakakaidisi khoegu âb ǀkhab ǃgoaxase ge mû. Ob ge ǁîba ǀgôana Leas, Raxels tsî ǃgāra âb tsîn ǁaegu ge ǀgora. 2 ǁÎb ge ǃgāra aisǀkhāb ai ǁîra ôan ǀkha mâi tsî ǁnās khaoǃgâ Leasa ǁîs din ǀkha tsî ǀunis ai Raxels tsî Josef ôagura ti ge saogu kai. 3 ǁÎn ais ai ǃgû tsîb ge Jakoba hû ǃnāde ǃhūb kōse ge ǃhon, ǃgâsabab ra ǃgûǃoase. 4 Xaweb ge Esauba ǁîba ǃkhoeǃoa tsî ǁnam tsî ge ǁoa tsî kha ge ge ā. 5 Esaub ge kōǂnami tsîb ge nē taradi tsî ǀgôan tsîna mû, o ge dî: “O tarina kha nē sa ǀkha hâna?”
Ob ge Jakoba ge ǃeream: “Ti ǀhonkhoetse, nēn ge ǀgôan Elob ge ǃgâisib âba xu ǀkhae tena.” 6 O ra ge ǃgāra ǁîra ôan ǀkha hā tsî ge ǃhon; 7 ǁnās khaoǃgâs ge Leasa ôasan ǀkha tsî ǁnās khaoǃgâ Josef tsî Raxels hâra ge hā ǃhon.
8 Ob ge Esauba ǁkhawa ge dî: “O ǂguro ta go ǀhao-ū hâ in ǀkhats ǁnâi tare-e goro ǂâibasen?”
Ob ge Jakoba “Sats nî khoexase ǃkhōǃoa tega” ti ge ǃeream.
9 Ob ge Esauba ǃgâsaba ge ǃeream: “ǂÂu hâse ta ūhâ xuige ūts hâna ūhâbasen re ti ǃgâtse.”
10 Nēs aib ge Jakoba “Hî-î, tita ǀkhats nî ǃgâiǂâixas ka, o ti ǀkhaeba ūǃoa re. Sa aisa mûs tita nēsits go ǁnāti khoexase ǃkhōǃoa te ǁaeb ai Elob aisa mûs khami tsâba xui-ao. 11 Xuige toxopa nē ǀkhaeb hîa ta go mā tsiba ūǃoaba te re, Elob ge hoaraga xūn ǂhâba ta hâna mā te xuige.” ǁNā ǀgaus aib ge Jakoba ǀûs ose ge ǀkhoma bi, ūǃoab ges kōse.
12 Esaub ge “A khom ǂhomisen tsî ǃgû re. Tita ge aiǀgauba nî ū” ti Jakoba ge mîba.
13 Ob ge Jakoba ge ǃeream: “Ti ǀhonkhoetse, aitsamats ra mûsen ge ǀgôana a ǂkhabusa tsî daisi ra gūdi tsî gomadi tsî ǁîdi di ǂkhamron xas tsîna ta ge nî ǂâi. ǀGui tsēs ǃnân ga ǃgarise doeǁgahe on ge hoaraga ǀgoana nî ǁō. 14 Xuige satsa ǁnâi aiǃgû re, ǂause ta nî ǀgoan tsî ǀgôan tsîn a ǃgû ǁkhā ǃgarisib ai sao tsi, Edoms ǃnâ khom sī nî ǀhaos kōse xuige.”
15 Ob ge Esauba ge mî: “O a ta nē ta hâ-ū khoegu di ǀnîga ǁnâi sa ǀkha ǁnāxū re.”
Ob ge Jakoba “ǁNās ge ǂhâbasa tama hâ tita sats xa ǃgâiǀîhes ǀguisa ra ǂhâba xui-ao” ti ǃgâsaba ge ǃeream. 16 Ob ge Esauba ǁnā tsēs ai Edoms ǁga ge oatsoatsoa. 17 Xaweb ge Jakoba Sukots ǁga ge ǃgû. ǁNāpab ge ǁîba omsa ǂnubibasen tsî ǀgoan aba ǃharade ge kuruba. ǁNā ǃkhais ǃaromab ge Jakoba nē ǃāsa Sukot ti ge ǀonǂgai.
18 Mesopotamiaba xu oahās âb ǃnâb ge Jakoba ǃnorasase Sexems, Kanaanǃhūb dis tawa sī tsî ǃās ǀgūse hâǃkhaiba ge dībasen. 19 ǁÎb ge ǁnā ǃhūǃâsa Hamori, Sexemmi ôab di suriba xu ǀguikaidisi ǀhaiǀuriǃân ai ge ǁama. 20 Tsîb ge ǁnāpa altar-e ǂnubi tsî ǁîsa El-Elohe-Israel ti ge ǀonǂgai.
© Khoekhoegowab Elobmîs © Bible Society in Namibia, 2020.
