Esters di Grike ǂNûiǃkhunis 10 - Khoekhoegowab New Translation 2020 (KKG20)

Artaxerxeb tsî Mordekaib tsîkha di kaisib

1 [1] Gao-aob Artaxerxeb ge huri-am ǀkharigu gaosib digu tsî ǁkhāti ǂganagab ǀkharigu ǃnâ ge ǁan hâ i khoena ǁgui-aimarina ge ǁgui-ai. 2 [2] ǁÎb di ǀgaib tsî îǂhôasib tsî ǁkhāti ǁîb gaosib di ǃkhūsib tsî ǂkhaisib tsîn ge Persiab tsî Mediab tsîkha di gao-aogu di ǂhanusi xoaǁguigu ǃnâ, khoen nî ǂâis ǃnâ ūhâse xoaǁguihe hâ. 3 [3] Mordekaib ge gao-aob Artaxerxeb khaoǃgâ, ǀgamǁîse ǂgaeǂguis ǃnâ ge mâ i. ǁÎb ge gaosib ǃnâ ge ǂgomǂgomsa i tsî horesa Jodeǁîn xa ǃgôasiba gere māhe. ǁÎb khoen di aiǃgûsab gere ǁgūba, xui-aob ge kaise ǁîn xa ge ǀnamhe i.

Mordekaib ǁhapos di ǂâibasens

4 [1] Ob ge Mordekaiba ge mî: “Elob ge nē xūn hoana ge ī kaiba. 5 [2] Nēsi ta ge nē xūn hoan xa ta ge ūhâ i ǁhapos xa ra ǂâihō. Nē ǁhapos ǃnâ ta ge mû xūn hoan ge ge ī: 6 [3] ǂKhari ǀaus hîa ge ǁgamǃā kais, ǁgoaǀapab hîa sores di ǃnâb ǃnâ ge ǀkharaǀkharasenni tsî ǃnāǂamsa ǁgam-i tsîna. Nē ǃāb ge Esters hîa ge gao-aob ǀkha ǃgame tsî ǁîb xa gao-ao dīhesa mâba. 7 [4] ǀGam kaiǀaokha ge tita tsî Hamanni hâkhoma mâba. 8 [5] ǃHaodi ge ǁnān hîa ge Jodeǁînan nî hîkākāse ge ǀhaoǀhaosenna. 9 [6] Ti ǁaes ge Israelǁaes, Elob ǃoa huib ǃaroma ǂgai tsî ge huiǂuihesa. ǃKhūb ge ǁîb di ǁaesa ge sâu. ǁÎb ge sida nē hâ ǂkhabadīgu hoaga xu huiǂui tsî kai saodi tsî buruxa dīgu, tātsēs tsîna ge nau ǁaedi ǃnâ ī tama hâ ina ge dī. 10 [7] Elob ge ǀgam mâsikha ge aiǂhomi, ǀguiba ǁîb ǁaes ǃaroma tsî nauba nau ǁaedi hoadi ǃaroma. 11 [8] ǁNās khaoǃgâ ra ge tsēs tsî iri nē ǀgam mâsikha nî mîǁgui-aihera nî hā; ǁaeb ge Elob ǃaroma go hā, hoaraga ǁaedeb nî ǀgoraǃgâse. 12 [9] Elob ge ǁîb ge ǁhûiǂui ǁaesa ǂâis ǃnâ ūhâ tsî ǂhanusi mîǁguiba ǁîb ǁaes di ǃgâib ǃoa ge ū. 13 [10] Mâ kurib hoabas ge Elob ǁaesa, disihakaǀaǁî tsēs tsî disikoroǀaǁî tsēs Adarǁkhâb dis tsîra ai, ǁîb di ais aiǃâ ǀhao tsî dâb tsî ǃgâiaǂgaob ǀkha nî tsēdi.”

ǀUni xoas

Hakaǁî kurib Ptolemib tsî Kleopatras hâra di ǂgaeǂguis dib ǃnâb ge Dositeub ti ǀon hâ khoeb, Leviǁî pristeri ase gere ǂgaisenna Purimǁâudība ra aiǃgûba sîǂkhanis, ǁâudīb ǂama ra ǃgûsa ge hā-ū. ǁÎb ge ǁîb di ôab Ptolemib ǀkha ge hâ i tsî sîǂkhanis a ama tsîs Ptolemib ôab Lisimakub, Jerusalems dib xa ǂnûiǃkhunihe hâ ǃkhaisa ge mîǃā.