ǁOreb ǃoagu hâ ǁnamas
1 Ti ôatse ǁorets ge? Tā ǁkhawa ǁnāti dī, îts ǀnaits ge dī ǁoren ǃaromas tsîna ǀgore. 2 ǀGūts ka, ob ge xam-i khami sa ûiba nî hîkākā, xuige ǁoreba ǀaoba xuts ra ǃkhoeni khami ǃkhoeni xu. 3 ǁGauoǃnâsib ge ǂuruǂuruhe ǁoa ǀhapis hoaǀkhāǀāgôab xa ra ǃaromahes khami ī.
4 ǁĒsib tsî ǀgapiǂâixasib ge ūts hân hoana ǂoaǃnâ kai tsi ǁkhā.
5 ǀGâsa khoen di ǀgores ge Elob xa ǁnâu-amhe tsî ǃhaese ra ǃereamhe.
6 Mî-unubahesats ga ūǃoa tama i, ots ge ra ǁore. Tsî ǃKhūbats ga ǃaoǃgâ, ots ge sa daoba nî ǂhanuǂhanu.
7 ǂAmǃhoa-ao-i ge ǃhoa-i ra ǁaeb hoab ai, dīsā-i rana ǂanǃgâ tama hâ, xawe i ge ǁnâuǃāxa khoe-e, ǁî-i ra dīsāna ra ǂanǃgâ.
8 ǀNî khoen di mari-i ǀkha oms â-e ra om khoe-i ge ǁî-i ǀhobas ǃaroma ǂnubiǀuide ra ǀhaoǀhao.
9 Eloxoresa khoen di ǀhaos ge ǂopen hîa ǃhaese ǂhubi tsî ra ǂhubitoan khami ī. 10 Eloxoresan di daob ge ǂhau tsî a ǂgapa, xawe ǁōb ǃoa ra ǂgaeǂgui.
Gā-aisib tsî gâsib tsîkha ǁaegu hâ ǃkharagasib
11 ǂHanuba ra ǃkhōǀgaipe-i hoa-i ge ǂhanub tare-e ra ǂâibasen ǃkhaisa nî ǁkhāǁkhāsen. ǃKhūbats ga dīts ra xū-i hoa-i ǃnâ ǃaoǃgâ, ots ge gā-aisiba ūhâ. 12 Xū-ets nî ǁkhāǁkhāsens aiǃâts ge aibe gā-aisiba nî ūhâ, xaweb ge ǁnāpa gā-aisib hîa ausiba ra ǃkhanaxa kaib tsîna hâ. 13 Gā-ai khoe-i di ǂans ge tātse ǂnâ tama ǃāb, hoaǁae ra dâub khami ī. Tsî ǁî-i di ǀapemādi ge ǀamose ra dâu ǁgamǀaus khami ī. 14 Gâ khoeb di ǂans ge khôa hâ ǂgoasūs khami ī. ǁÎb ge ǁkhāǁkhāsenni ra xūn hoana ǃhaese ra ǀuru.
15 Gā-ai khoe-i ga gā-ai mîna ǁnâu, o i ge koasa mā tsî gā-aisiba ra ǀaro, xawe supu ǂâixa khoe-i ga ǁnâu, o i ge ǁîn xa ǃgâibahe tama tsî ǁîna ǃhaese ra ǀuru. 16 Gâ-i di ǃhoasa ǃgâs ge ǃgûdaob ai ǃgom xū-e tanis khami ī, xawe gā-ai khoeb di ǃhoasa ǃgâs ge a ǃgâi. 17 ǀHao hâ khoen ge ǁkhorexase gā-ai khoeba nî ǃgâ tsî ǁîb mûǂgāǀgauba nî ǂâiǃgâ.
18 Hîkākāhe hâ oms khamib ge gâ khoeb di gā-aisiba ī. 19 ǁNâuǃāoǃnâ khoe-i tawas ge ǁkhāǁkhāsensa buidi khami ī, 20-21 xawe ǁnâuǃāxa khoe-i tawas ge ǃhuniǀuri ǃganudi khami ī. Gâ-i nî ǃau-âi hîa i ge gā-ai khoe-e ǀnoms ǀguisa nî hî. 22-23 Gâre khoe-i ge dao-ams ǃnâ-ū ǂui tsî khoe-i di oms ǃnâ nî dāǂgâ, xawe hōǃâsa ūhâ tsî ǃgâiǂūxa khoe-i ge ǃgôasib ǀkha ǃauga nî ǃâu. 24 Tsūǂūxa khoe-i ge dao-ams tawa ra ǃgâǁnâ; ǃgâiǂūxa-i ge ǁnāsa dīsa nî tao.
25 Gā-ai khoen ge ǃhoan nîs aiǃâ, tare-e nî ǃhoasa ra ǂâiǃgâ, xawe ǀgapiǂâixa khoen ge ǂâin nîs aiǃâ ra ǃhoa. 26 Gâ khoen ge ǁîn di ǂâis ǃnâ ra hā xū-i hoa-e ra ǃhoa; gā-ai khoen ge ǃhoan nîs aiǃâ ra ǂâi.
27 ǂKhaba khoe-i ga ǁî-i di khākhoe-e ǀâxare, o i ge ǁî-aitsama ra ǀâxaresen.
28 ǀHoe-ao-i ge ǁî-i di ǂhunuma ǂūsiba ra ǁgaiǁgai tsî i ge ǁanǁare-aon hoan xa ra ǃhuihe.
© Khoekhoegowab Elobmîs © Bible Society in Namibia, 2020.
