Elob ge a ti sâu-ao
1 Hoan xa ǀGapib di sâub ǃnâ ǁan hâ-i
ge Hoaǀgaixab di sommi ǃnâ nî hâ.
2 ǁÎ-i ge ǃKhūba nî mîba:
Sats ge ti ǁhaiǁhâǃkhai tsî ǁkhui-omts
ti Elots, ǁîtsa ta ra ǂgomǃgâtsa.
3 ǁÎb ge satsa aniǃkhō-aob di ǁnoasa xu nî ore
tsî ǁōǁōsa ǂhīǁōna xu.
4 ǁÎb ge ǁgabokha âb ǀkha ra ǃgū-ai tsi,
tsî ǁgabokha âb ǃnakats ge nî ǁhaiǁhâ;
ǂgomǂgomsasib âb ge ǁkhaukhō tsî a sâuǃkhai.
5 Tsuxub di ǃhurib xats ge ǃao tide,
tamas ka io ǂāb tsēa ra ǁkhâuheb xa.
6 Tsûtsû-ais tsuxuba ra ǃgûmas
tamas ka io tsēǃgâǁaeb ai ra hîkākās xa.
7 Sa xōǀkhān ga ǀoadisina ǁnā
tsî sa amǀkhāb ai disiǀoadisina,
xawen ge sa ǀgūse hā tide.
8 Sa mûra ǀkha ǀguits ge kō
tsî ǂkhaba khoen di mādawa-amsa nî mû.
9 Sats ǃKhūts ge a ti ǁhaiǁhâǃkhai.
Hoan xa ǀGapibats ge sa ǁanǃkhaise ge dī,
10 tsî i ge tsū-i xare-e hāǂam tsi tide,
ǁkhāti tsûtsû-ai-i xare-i ge sa tentomsa ǀgū tide.
11 ǁÎb ge ǀhomǃgān âba nî mîmā
în sa ǃgûdaogu hoagu ai ǃûi tsi.
12 ǁÎgu ge ǃomgu ai nî tani tsi
ǂais âtsats ǀui-i ai ǃnom tidese.
13 Xamn tsî ǀaon aits ge nî dā;
ǂkham xamn tsî ǀaonats ge nî dāǂkhū.
14 “Titab ǀnam xui-ao ta ge ǁîba nî huiǂui;
ti ǀonsab ǂan xui-ao ta ge ǁîba nî sâu.
15 Titab ga ǂgaiǀî
o ta ge ǁîba nî ǁnâu-am, ǂōǂōsib ǁaeb ǃnâ.
Tita ge ǁîba huiǂui tsî ǃgôasiba nî mā.
16 Tita ge ǁîba gaxu ûiǁaeb ǀkha nî ǁâǁâ
tsî ta ge ǁîba ti ǃgâiǃōsiba nî ǁgau.”
© Khoekhoegowab Elobmîs © Bible Society in Namibia, 2020.
