ǃNaeǃkhaidi 26 - Khoekhoegowab New Translation 2020 (KKG20)

Paulub ge Agripab aiǃâ ra ǂnoabasen

1 Ob ge Gao-aob Agripaba Paulub ǁga “Mā-amsats ge ūhâ nēsi aitsama ǂnoabasens ǃaroma” ti ge mî.

Ob ge Pauluba ǃommi âba ǀhōǂui tsî ge mî: 2 “Gao-ao Agripatse, kaise ǃgâiǃgâse ta ge ra ǃgapaǀîsen, sats aiǃâ hoaraga xūn ǁîn ai ta Jodeǁîn xa ǀhapiǂnûiǀkhāhe hân ai ǂnoabasensa. 3 ǃGōsase, sats Jodeǁî ǁnaetigu tsî ǂnoagude ǃgâise ǂan amaga tsî ta ge ǁnā-amaga ǂōrisase tsî ǃnūǃnâxasib ǀkhats nî ǃgâ ǃkhaisa ra ǂgan.

4 “Hoaraga Jodeǁîn ge ti ǂkhamsisa xu a ǂan te. ǁKhātin ge ti ǂhunuma ǃhūb ǃnâ tsî Jerusalems ǃnâ ta ge ûi hâ i ǀgausa a ǂan. 5 ǁÎn kom ga ǃkhō-amsa māsenxao, on ge tita a Fariseǁî tsî ǁnā ǃnans di kaise karosa ǂhanub ǃnâ ge kaikaihe ti mî ǁkhā. 6 O ta ge nētsē Elob ge sida di aboxana dība mîmâis di ǃâubasensa ta ūhâ xui-ao ra ǀhapiǂnûiǀkhāhe. 7 Tsî di kom sida di disiǀgamǀa ǃhaode ǁkhā mîmâis di dīǀoaǀoasa ǂgomǂgomsase, tsēb tsî tsuxuba ǃKhūba ǀgoreǀîs ǀkha ge ǃâu hâ io. Tsî nē ǃâubasens ǃaromas kom, gao-aotse, Jodeǁîn ra ǀhapiǂnûiǀkhā tesa. 8 Tarexa-i kha ǁnātikōse sado ǃgomba, Elob ǁō hâna ra ǂkhaiǂkhai ǃkhaisa ǂgomsa?

9 “Tita tsîn ge ǁae-i ǃnâ ti ǁkhāsib ǃnâ i hâs kōse Jesub, Nasaretǁîb di ǀons tsî ǁîb di saoǃgonaona mâǃoasa gere dītsâ. 10 Tsî ta ge nēsa Jerusalems ǃnâ ge tsoatsoa. Danapristerga xu ta ge ǀgaiba ge hō, Elob di khoena ǃkhō-oms ǃnâ aoǂgā tsî ta ge ǁnātikōse ī tsî ǁîn nî ǃgamhe ǃkhais ǀkha ǀhûǀgui tsî ǁîn ǃoagu gere ǁhûi. 11 Tsî ta ge ǂgui ǃnāde ǁîna sinagogegu* ǃnâ ǂnau kai tsî gere ǁgari, ǂgoms âna ǀūxū tsî Jesuba ǃkhāǃkhāsa. ǁNātikōse ǁîn ǀkha ǁaixa tsî ta ge ǃhao ǃādi ǁgas tsîna ǁîna nî ǃgôaǃgonse gere ǃgû.

Paulub ge ǁîb di ǃhobasens xa ra ǃhoa

(ǃNaeǃkhaidi 9:1-19ǃNaeǃkhaidi 22:6-16)

12 “ǀGuitsē ta ge Damaskus di daob ai danapristergu di ǀgaib tsî ǁguiǂams ǀkha ge garu i. 13 O i ge ǃgôahesabate gao-ao Agripatse, ǁaubexa tsēǃgâǁaeb ai sores di ǃnâb xa ǀgaisa ǂkhaiba ūhâ ǃnâ-e ǀhomma xu tita tsî tita ǀkha ge hâ i khoegu tsîge ge hāǂam. 14 Hoage ge ǃhūb ai ǁnāǁgoes khaoǃgâ ta ge dom-i hîa Hebregowab ǃnâ ‘Saulutse, Saulutse, tare-i ǃaromats ra ǃgôaǃgon te? Kaise i ge a ǃgomba tsi ti ǂâis ǃoagu ǃkhamsa’ ti ra mî-e ge ǁnâu. 15 O ta ge ‘Taritsa, ǃKhūtse’ ti ge dî.

“Ob ge ǃKhūba ‘Tita ge Jesuta, sats xa ra ǃgôaǃgonheta’ ti ge ǃeream te. 16 Tsîb ge ǃaruǀî ge mî: ‘Xuige nēsi khâi, îts sa ǂaira ai mâ. Tita ge satsa go ǂhai tsî satsa ti ǃkhō-amaose tsî ti ǃgāse go ǁhûiǂui, naunats nētsēts go mûn tsî ǃgoaxaǁaeb ǃnâ ta nî ǁgau tsina nî ǃhoabase xuige. 17 Tsî ta ge ǁkhāti Jodeǁîn tsî Jodeǁî taman* hîa ta ǁîn ǁaegu ra sîǂgā tsin ǃoagu nî sâu tsi. 18 Sats ge mûdi âna nî khowa, ǁînats ǃkhaenaba xu ǃnâb ǃoa tsî Satanni* ǀgaiba xu Elob ǃoa nî unuse. Tsîn ge ǁîna tita ǃnân ūhâ ǂgomsa xu ǁoren âna ǀûbahe tsî Elob di ǃanun ase nî ǂansa.’

Paulub ge ǁîb di sîsenni xa ra ǃhoa

19 “Tsî ǁnā ǀgaus ai ta ge ǃgôahesabate gao-ao Agripatse, nē ǀhomsi īsiba ge ǁnâuǀnam. 20 Tsî ta ge aibe ǁnān Damaskus ǃnâ hân tsî Jerusalems din tsî ǁnās khaoǃgâ hoaraga Judeab tsî ǁkhāti ǀūben tsîna gere aoǁnâba, ǁîn di ǁoreb xa ǁgai hâ ûigan nî Elob ǃoa ǃhoba tsî ǃgâi sîsengu, ǃhobasenn go ǃkhaisa ra ǁgauǂuiga dī ǃkhaisa 21 Nēsa ta gere aoǁnâ xui-aon ge ǀnî Jodeǁîna Tempeli ǃnâ ǃkhōsis ǃnâ ū tsî ǃgam tesa gere dītsâ. 22 Xawe ta ge nē ǁaeb hoaba Elob di huib ǀkha ge hâ i tsî ǁnā-amaga nētsē ǃkhō-am tsî ǂkharin tsî kaina ra aoǁnâba. Moseb tsî kēbo-aogu ge ī nî ti mî xūn ǀguina ta ge ra mî: 23 Mâtib Xristuba* tsâ tsî nî ǂguro ǃkhaisa ǁōba xu nî khâiba tsî ǁîb di ǂhunuma khoen tsî Jodeǁî tamana ǃnâb ǃGâiǂhôas diba nî aoǁnâba ǃkhaisa.”

24 Tsî ganupeb Pauluba noxopa ra ǂnoasen hîab ge Festuba ǃgari dommi ǀkha ge ǂgaiǂui: “Paulutse, ǃkhauts ge hâ, nē kai ǁkhāǁkhāsens hîats ūhâs ge ra ǃkhau kai tsi!”

25 Ob ge Pauluba ge ǃeream: “ǃGôahesa Festutse, ǃkhau tama ta ge hâ, amaba ta ge ra ǃhoa. 26 Tsî gao-aob Agripab ge nēna a ǂan. Tsî ta ge tita ǂhauǂgaruse ra ǃhoa, ǂan ta a xui-ao, nē ta ra mîn ǁîb ǃaroma ǃhao xū tama ǃkhaisa, ǂganǃgâsib ǃnân ǁhôa-i ǃnâ ge dīhe tama hâ i amaga. 27 O gao-ao Agripatse, kēbo-aoga ǂgomts ra? Tita ge ǂan ǂgomts ra ǃkhaisa!”

28 Ob ge Agripaba Pauluba ge ǃeream: “Satsa kha nē ǃnubu ǁaerob ǃnâts nî tita Xristeǁî kai ti ǂâi hâ?”

29 Ob ge Pauluba ǁkhawa ge mî: “Nēsib ga ǁaeba ǃnubu tamas ka io gaxu, xawe ta ge Eloba ra ǀgore, îb sats ǀguitsa tama i tsî naun hîa nētsē tita ra ǁnâuna tita khami ī kai, nē ǃgae-ūdan ǀguin ose.”

30 On ge gao-aob, mûǂamaob, Bernises tsî nau hoaraga khoen ǁîn ǀkha ge hâ ina ge khâi. 31 Tsîn ge ǃoan geo nēsa ǃhoaǂam tsî ǁîǃnābe ge mîǀîgu: “Nē khoeb ge amase ǁōb tamas ka io ǃkhō-oms di ǁkharabab nî ǁgui-aibahe ǁkhā ǃûǂam-e dī tama hâ.” 32 Tsîb ge Agripaba ǁnā ǁaeb ai Festub ǁga “ǁÎb ge ga ǃnoraǃnorahe hâ Kaesari aib ga ǂgaimāsen tama hâo” ti ge mî.