Jerusalems ge ra ǁkharahe
1 Ob ge Gagaba ūkhâi te tsî aiǂoasǀkhāb dao-ams, ǃKhūb ommi dis ǃoa ge ūsī te. Tsî ǁnāpa gu ge dao-ams tawa ǀgamdisikoroǀa khoega ge hâ i, tsî ǁîgu ǁaegu ta ge ǁaes di ǂammâisakha Asuri ôab Jasanjab, tsî Benajab ôab Pelatjab tsîkha ge mû.
2 Ob ge Eloba tita ǃoa ge mî: “Khoenôa ǀgôatse, nēgu ge ǂkhababa tita ǃoagu ǀape tsî nē ǃās ǃnâ ǂkhaba ǀapemāde ra mā khoega. 3 ǁÎgu ge ra mî: ‘Omde oms di ǁaeb ge noxopa ǀgū tama hâ, nē ǃās ge a sâiǃnâsū tsî sida ge a ǁgan.’ 4 ǁNā-amaga ǁîgu ǃoagu kēbo; khoenôa ǀgôatse kēbo re!”
5 Ob ge ǃKhūb di Gagaba tita ai ge hā tsî tita ǃoa ge mî: “Mî re: Nētib ge ǃKhūba ra mî: ‘Israeli ommi didu ge nēti ra ǂâi, tita ge tarena du ra ǂâi ǃkhaisa a ǂan. 6 Sago ge ǂgui khoena nē ǃās ǃnâ ge ǃgam tsî ǁîs di ǃganga ǃgamhe hân di sorodi ǀkha ge ǀoaǀoa.’
7 “ǁNā-amaga ta ge tita ǃKhū Elota nēti ra mî: ‘ǁNān ǃgamhe hân ǁîs ǃnâ go ge ǁguin ge a ǁnā ǁgan tsî nē ǃās ge a sâiǃnâsū, xawe ta ge tita sago ǁnāpa xu nî ǁgariǂui. 8 Sadu ge gôaba ge ǃao, xawe ta ge ǁnā gôaba sadu ǂama nî hā kai,’
tib ge ǃKhūb Eloba ra mî.9 “Tita ge sado ǁnā ǃāsa xu ūǂui tsî ǃhaokhoen ǃomǁae nî māǁnâ, tsî ta ge sado nî ǀgoraǃgâ. 10 Sadu ge gôab xa nî ǃgamhe; Israeli di ǃhūǀgoras tawa ta ge nî ǀgoraǃgâ du. Tsî du ge tita a ǃKhū ǃkhaisa nî ǂan. 11 Nē ǃās ge sado sūse iba tide, tsî du ge ǁîs ǃnâ hâ ǁganse ī tide; tita ge Israeli di ǃhūǀgoras tawa nî ǀgoraǃgâ du. 12 O du ge tita a ǃKhū ǃkhaisa nî ǂan. Ti ǂnûiǂgāde du ge ge sao tama hâ i tsî ti ǂhanuga ge ǃkhōǀgaipe tama hâ i, xawe du ge sadu ǂnamipe hâ ǁaedi di ǂhanuga gere ǁnâuǀnam.”
13 Tsî tita ra kēbo hîab ge Benajab ôab, Pelatjaba ge ǁō. O ta ge tita ti ais ai ǁnāǁgoe tsî ǃgari dommi ǀkha ǂgai tsî ge mî: “Okha ǃKhū Elotse, Israeli di ûiǃgau hân tsînats kha nî ǃgamǂui?”
Elob di mîmâis ǃhūsaben ǃoa
14 ǁNā ǃnubais ge ǃKhūb di mîsa tita ǃoa ge hā: 15 “Khoenôa ǀgôatse, nēn ge a sa ǃgâsan, sa ǂhunuma ǀaokhoen, sa ǀhûǁare ǃhūsaben, hoaraga ommi Israeli din, ǁîn xas ge Jerusalems di ǁanǂgāsaben ge mîsa: ‘ǁÎn ge ǃKhūba xu ǃnūse ge bē, nē ǃhūba da ge sida ūhâxūse ge māhe.’
16 “ǁNā-amaga mî: ‘Nētib ge ǃKhūb Eloba ra mî: Tita ga ǁîna ǃnūse ǁaedi ǃnâ dībē tsî ǁîna ǃhūgu ǃnâ ge ǀgaruǀgaru, xawe ta ge tita ǁîna ǂkhari ǁaero-i kōse ǃanusise nî ība ǁnā ǃhūgu, ǁîgu ǃnân ge sīgu ǃnâ.’
17 “ǁNā-amaga mî: ‘Nētib ge ǃKhūb Eloba ra mî: Tita ge sado ǁaede xu tsî ǁnā ǃhūgu ǁîgu ǃnâ du ge ǀgaruǀgaruhe hâ iga xu nî ǀhaoǀhao. Tita ge sado Israeli ǃhūba nî mā-oa.’ 18 ǁNāpan ga oasī, on ge ǁnāpa xu ǁîb ǃnâ hâ ui-uisa xūn hoan tsî ǁîb di ǁgaidīn hoana dībē. 19 Tita ge ǁîna ǀguiǂâixa ǂgaoba mā tsî ǀasa gagasa ǁîn ǃnâ nî ǂgā; tita ge ǀuiǂgaoba ǁîna xu ūǂui tsî ǁîna ǁganǂgaoba nî mā. 20 ǁNā-amagan ge ǁîna ti ǂnûiǂgāde sao, ti ǂhanuga ǃkhōǀgaipe tsî ǁîga nî ǁnâuǀnam. On ge ǁîna tita ǁaese nî ība tsî ta ge tita ǁîna Elose nî ība. 21 Xawe ǁnān ǂgaob ân ǀkha ǁîn ui-uisasigu tsî ǁîn ǁgaidīgu tsîna ra saoǃgonn, ǁîn dīga ta ge danadi ân ai nî ǀhaoǀhao,”
tib ge ǃKhūb Eloba ra mî.Elob ǂkhaisib ge Jerusalemsa xu ra bē
22 O gu ge xeruga ǁîgu ǁgaboga ge ūkhâi, ǀnūdi ǁîgu xōǀkhā hâse tsîb ge ǂkhaisib Israeli Elob diba ǁîgu ǂamai ge hâ i. 23 Tsî ǂkhaisib ǃKhūb dib ge ǃās ǁaeguba xu khâi tsî ǃās aiǂoasǀkhāb ai ǁgoe ǃhommi ai sī ge mâ. 24 ǁNās khaoǃgâb ge Gagaba tita ūkhâi tsî ai-i ǃnâ Elob di Gagaba-u Xaldeab ǃnâ ǃkhōsaben tawa ge ūsī. O i ge ai-i hîa ta ge mû-e ge bēxū te. 25 Tsî ta ge ǃkhōsabena ǃKhūb ge ǁgau te xūn hoana ge mîba.
© Khoekhoegowab Elobmîs © Bible Society in Namibia, 2020.
