Numeri 9 - Khoekhoegowab New Translation 2020 (KKG20)

ǀGamǁî Pasxaǁâudīb

1 ǃKhūb ge Moseb ǃoa Sinaiǃgaroǃhūb ǃnâ ǀgamǁî kurib di ǂguro ǁkhâb ai, Israelǁîn ge Egipteba xu ǃgûs khaoǃgâ ge mî: 2-3 “Disihakaǀas nē ǁkhâb dis ai, soresǂgâb ain ge Israelǁîna Pasxaǁâudība hoaraga ǁgui-aidi tsî ǁgaragu ǃoa nî tsēdī.” 4 ǁNātib ge Moseba Israelǁîna ge mîmā, Pasxaǁâudīban nî tsēdīse. 5 ǁÎn ge disihakaǀaǁî tsēs ǂguro ǁkhâb dis di ǃoes ai Sinaiǃgaroǃhūb ǃnâ ǁnāsa ge dī. Israelǁîn ge ǃKhūb ge Moseba mîmā khami ge dī.

6 Xawen ge ǁnāpa khoena ge hâ i, Pasxaǁâudība ǁnā tsēs ai ge amǃnâxa ǁoa ina, ǁō hâ khoe-i sorosan ge tsâǀkhā tsî ǃanuoǃnâ xui-ao. ǁÎn ge Moseb tsî Aron hâkha tawa sī 7 tsî ge mî: “Sida ge ǁō hâ sorosa da ge tsâǀkhā xui-ao a ǃanuoǃnâ, xawe tare-i ǃaroma da nau Israelǁîn hoan ǀkha ǃKhūb di ǁguibasa māsa xu nî ǁaraǂuihe?”

8 Ob ge Moseba ge ǃeream: “Tita nî ǁguiǂamsa ǃKhūba xu hōs kōse ǃâu.”

9 ǃKhūb ge Moseba ge mîba, 10 îb Israelǁîn ǃoa mî: “Sadu di ǀgui-i tamas ka io sadu surib di-i ga ǁō hâ khoe-i sorosa tsâǀkhās ǀkha ǃanuoǃnâ kaisen, tamas ka io ǃnū daob ai hâ, xawe noxopa Pasxaǁâudība tsēdī ǂgao, 11 o-i ge ǁnāti ī khoe-e sao ra ǁkhâb ai Pasxaǁâudība tsēdīsa a mā-amsa, disihakaǀaǁî tsēs ǀgamǁî ǁkhâb dis di ǃoes ai. ǁÎsa khūkhū-e ūhâ tama pere-i tsî au hain tsîn ǀkha tsēdī. 12 Tā xū-i xare-e nau ǁgoas kōse ǃgau tsî tā ǀgoa-i di ǂkhōna khôa. Pasxaǁâudība hoaraga ǁgaragu ǃoa tsēdī. 13 Khoe-i hîa a ǃanu-i tsî daob ai ǃgû tama i tsî Pasxaǁâudība tsēdī tama-i ge ǃaruǀî ǁîb khoen di ǀgui-i ase ǃgôahe tide, mîmâisa ǁaeb ai-i ǁî-i ǁguibasa ǁguiba tama xui-ao. ǁÎ-i ge ǁnā-amaga ǁî-i ǁoreb ǃaroma nî ǁkharahe.

14 “ǃHaokhoe-i sadu ǁaegu ǁan hâ-i ga Pasxaǁâudība tsēdī ǂgao, o-i ge ǁguihe hâ ǂhanugu tsî ǁgaragu ǃoa nî tsēdī. Nēsits ga ǂhunuma khoe tamas ka io ǃhaokhoe, xawets ge ǀgui ǂhanub ǃnâ-u ǀgui nî ǃkharu.”

ǀAexa ǃâus

(Eksodus 40:34-38)

15-16 ǃKhūb di Tentommi ge ǂnaumâihe tsēs ais ge ǃâusa ǁgôaxa tsî ǁîba ge ǃgū-ai. Tsuxub ǃnâs ge ǃâusa ǀaes khami gere mûsen. 17 ǃÂus ga khâi ǁae-i hoa-en ge Israelǁîna ǁîn hâǃkhaiba khôakhâi tsî ǃâus ga ǁgôaxa ǃkhais ai ǁkhawa sī gere ǂnaumâi. 18 ǃKhūb mîmās ain ge khoena hâǃkhaiba khôaǁnâ tsî ǁkhawa ǁîb di mîmās ai gere ǂnaumâi. ǃÂus Tentomma ǃgū-ai hâs kōsen ge ǁkhā hâǃkhaib tawa gere hâ. 19 ǃÂus ga gaxu ǁaeba Tentomma ǃgū-ai, on ge ǁîna ǃKhūba ǁnâuǀnams ǃaroma doe tama ge hâ i. 20 Xawe ǀnî ǁaeb ais ge ǃâusa Tentomma ǀoro tsērodi ǀguide gere ǃgū-ai; xawe mâti ǀgui i ga ī, xawen ge ǃKhūb di mîmās ai hâ tsî ǁîb mîmās ai ǀgui gere doe. 21 ǀNî ǁaebas ge ǃâusa ǃuisa xu ǁgoas kōse ǀgui gere hâ, on ge khoena ǃâus ra khâi khami gere doetsoatsoa. ǃÂus ra khâi khamin ge ǃaruǀî gere doe. 22 Nēsi i ga ǀgam tsēra, ǁkhâb, kurib tamas ka io ǁnās xa a gaxu, xawes ga ǃâusa Tentomma ǃgū-aiǀgara, on ge khoena doe tama ge hâ i; xawes ga ǃâusa khâi, on ge gere doe. 23 ǁÎn ge ǃKhūb ge Moseb ǃnâ-u mîmā khami ǁîba ǁnâuǀnam tsî hâǃkhaiba ǂnaumâi tamas ka io gere khôaǁnâ.