Alsimub ge Judab ǃoagu ra ǃhoa
(1 Makabergu 7:1-21)1 ǃNona kurigu ǃkharu hâse gu ge Judab tsî ǁîb khoegu tsîna Seleukub ôab Demetriub ge Tripolis ǃnâ ǀgaisa toroǂnubis tsî ǂgui doe-omgu ǀkha ǂgâ ǃkhaisa ge ǁnâu. 2 ǁKhāti gu ge ǁîb ge gao-aob Antioxub tsî ǁîb di ǃûi-aob Lisiab tsîkha ǃgam, îb ǃhūba ūbasen tis tsîna ge mîbahe.
3 ǁNāpab ge Alkimu ti ge ǀon hâ i khoeb, ǀgapiprister ge ib, xawe Grikeǁî ǁnaetiga khâikhâisendi khaoǃgâ ge ūǃoaba ge hâ i. ǁÎb ge tātsēb ǁkhawa ǀgapiprister kai tide ǃkhais tsî tare-en nî Jodeǁîna ǁîba dī ǃkhais di ǃaobab ge hōǃâ, 4 o ǀguikaidisi tsî korodisiǀguiǀaǁî kurib ǃnâ gao-aob Demetriub ǃoa ge ǃgû. ǁÎb ge gao-aobab ge ǃhuniǀuri krons tsî palmǂgonab tsî Tempeli di ǀkheraǂgonagu tsîna mā, xawe ǁîb di ǀapedi xa xū-e ge khom tama hâ i. 5 Xaweb ge ǁîb di ǂkhaba ǀapesa sîsenǂuis di soasa Demetriub ge ǂnûsa ǃoa ǁkhauǂui bi tsî Jodeǁîn di ǀapedi xa dîǂuiǃnâ bi, o ge hō.
Ob ge Alkimuba ge mî: 6 “Jodeǁîn hîa ra Hasideaǁîn tis tsîna ǂgaihen tsî Judab Makabaeub ǂgaeǂguis ǃnaka hân ge torodīxa tsî ra khâikhâisen tsî ǁaesa tātsē ǂkhîb ǃnâ ǁnāxū tide. 7 ǁÎn xa ǃaromahe hâses ge ǃgôaǃgôasa ǃkhais ǀgapipristersis dis, ǃnaesa xu ta ge hōsa ta ǃaruǀî ūhâ tamasa. ǁNā-amaga ta ge nēpa go hā, 8 ǂgurose ta gao-aob xa ra ǂâiǂhansen, xawe ta ǁkhāti ti ǂhunuma ǃhūǁîn xas tsîna ra ǂâi xui-ao. 9 ǀGapiǃgôahesa Gao-aotse nē ǁhōb di xūn hoanats ga kōǃgâ toa, o toxopa sa ǃgâi tsî māǂgaoxa ǀgaub ǃnâ, sida ǁaes hâǃnâ ǁgâiǀāba ūbē re. 10 Judab ûi hâs kōse i ge sida ǁaes nî ǂkhîb ǃnâ ûi ǃkhaisa a īǁoa.”
Demetriub ge Nikanora, Judabab nî ǁnāǂamga ra sî
11 Alkimub ra gowaǀîs ǀkha toa, hîa gu ge Judaba ge ǃhuisa i ǀapemā-aoga ǃaruǀî Demetriuba, Judab ǃoagu ge khâikhâiǃnâ. 12 Gao-aob Demetriub ge ǁnātimîsi Nikanori, ǂkhoagu toroǂnubis di ǃkhōdana-ao ge iba, Judeaba nî ǂgaeǂguise ǁgaumâi tsî ǁnāǀî ge sî. 13 ǁÎb ge Judab nî ǃgamhe tsî saoǃgonaon nî ǀgaruǀgaruhe tsî Alkimub nî hoagu xa kai Tempeli di ǀgapipristerse mâihe ǃkhaisa ge mîmā. 14 Judeab di hoaraga Jodeǁî taman hîa ge Judaba xu ǃkhoenin ge Nikanori di toroǂnubis tawa, ǁîn ge Jodeǁîn ǂoaǃnâs tamas ka io tsūǃgâb nî ǁîn di aiǃgûsa ase nî ī ti ǂâi tsî Nikanori ǀkha nî mâǀhaose ǁîb tawa ge ǀhaoǀhaosen.
15 Jodeǁîn ge Nikanori ra ǁnāǂam nîse hā tsîn ra ǁîn di ǃhūb ǃnâ hâ ǃhaokhoena ǁîba mâxōǀkhā ǃkhaisa ge ǁnâu. ǁÎn ge ǃhūb ǀkha tsoroǀkhāsen tsî ǁîn di Elob, hîa ge ǁîb di ǁaesa ǀamoses ǁîb dise nî hâse ǁhûib tsî ge ǁîna ǂhâsib ǃnâ ǁnāxūǃgâ tama ge hâ ib ǃoa ge ǀgore. 16 Ob ge Judab, ǁîgu di ǂgaeǂgui-aoba, ǁîga torob hîa Adasas ǀgūse hâb ǃnâ gu nî ǃkhanase, ǁnāǀî gu ǃnoeaǃnauxase nî dāǁnâ ǃkhaisa ge mîmā. 17 Judab di ǃgâsab, Simonni ge Nikanori ǃoagu ge ǃkham, xaweb ge ǃâubasenhe tamase ge khākhoen xa dīhe ǁnāǂams ǃnâ nē toroba ge ǂoaǃnâ. 18 Xaweb ge Nikanora mâtigu Judab tsî ǁîb khoegu tsîna ǀkhoa tsî ǁkhoaǂgaoxase ǁîgu ǃhūb ǃaroma ra ǃkham ǃkhaisab ge ǁnâu, o torodīs ǀkhab nē ǃkhaisa ǀam kai tide ǃkhaisa ge mîǁgui. 19 ǁNā-amagab ge Posidoniub, Teodotub tsî Matatiab tsîga Jodeǁîn ǀkha gu khoexaǃnâsib mîmâisa nî dīse ge sî.
20 Nē khoexaǃnâsib mîmâis ge ǂōrisase ǃhoaǂamhes khaoǃgâb ge Nikanora ǁîb toroǃkhamaoga ge ǂanǂan tsî gu ge ǀguiǂâixase nē ǃkhaisa ge ǃkhō-am. 21 ǂGaeǂgui-aogu ge ǀgurihâse gu nî ǀhao tsē-e ge mîmâi. ǃGôasib di ǂnû-aiǃnaodi ge mâ toroǂnubis hoas di hâǃkhaiba xu hā-ūhe tsî ge mâihe. 22 Judab ge ǁîb di toroǃkhamaoga ǂhomisase, khākhoen nî ǀhôagaosib ǃnâ ǀnîsi ǁnāǂam gu ǃkhais ǃaroma ǃgâi ǃkhaigu ai ge ǀgoraǂgā, xawes ge ǂnûsa ǃgâise ge ǃgûǁnâ. 23 Nikanori ge nē ǂnûs khaoǃgâ ǁaero-e Jerusalems ǃnâ ge hâ. ǁÎb ge Jodeǁîna tsūse ge sîsenū tama hâ i tsî ǁnās ǃaroma ǁîba ge ǃnandi ǃnâ saoǃgâuxa khoen tsîna ge sî-oa. 24 Nē ǀgam khoekha ge ge ǃgâi ǀhōsagu kai tsîb ge Judaba, Nikanori di ǃgâi ǀhōsase ge hâhâ. 25 Nikanori ge ǃgame tsîb nî omaris ǀkha tsoatsoa ǃkhaisa Judaba ge ǂgaoǂgaoǃnâ. ǁNā-amagab ge Judaba nēsa dī tsî ǂkhîb ǃnâ ge ûi.
Nikanori ge Judaba ra mâǃoa
26 Alkimub ge mâti kha Judab tsî Nikanori hâkha ǃgâise hâ ǃkhaisab ge mû, o ǃgaeǀhaos di xoaǁnâba ū tsî gao-aob Demetriub ǃoa ge ǃgû. ǁÎb ge Nikanori ge ǀapexū-aob, Judaba ǁîb di saoǃgonaose ǁgaumâi xui-ao, Nikanori ǂhanub ǃoagu îǂhôaoǃnâ ti gao-aoba ge mîba. 27 Nē ǂhumi ǀhapiǂgā-amdi ge gao-aoba kaise ge ǁaixa kai, tsîb ge ǁaib ǃnâ Nikanori ǃoa xoa tsî ǁîba ǃgaeǀhaos ǀkhab ǂkhîoǃnâ ǃkhaisa mîba tsî Judab Makabaeub nî ǃkhōhe tsî Antioxs ǃoa sî-oahe ǃkhaisa ge mîmā.
28 Nē haisi-amsab ge hō, ob ge Nikanora kaise ge tsû, ǁîb ge khoeb ǀkhab ge dī ǃgaeǀhaosa, tsū xū-eb ǁnā khoeba dī tama, hîa khôa ǂgao tama hâ i xui-ao, tare-eb nî dī ǃkhaisa ge ǀū i. 29 Xawe i ge ge īǁoa i ǁîb nî gao-aob di mîmâisa kō-īǀkhā ǃkhaisa, ǁnā-amagab ge mâtib nî Judaba ǃnui ǃkhaisa gere ǀapeǀape. 30 Judab ge Nikanori ǁîb ǃoagu khākhoexa tsî tsū ǃkhaisa ge mûǂan tsî ǁnā-i a ǂkhaba ǁgauǁgau ǃkhaisa ge ǂan. ǁNā-amagab ge ǂgui ǃgôab di saoǃgonaon ǁîb dina ǀhaoǀhao tsî Nikanora xu ge gaubē.
31 Nikanori ge Judab xab kaise gā-aibahe ǃkhaisab ge mûǂan, o kai tsî ǃanu Tempeli ǃoa, pristergu ra ǁguibade dī ǁaeb ǃnâ ǃgû tsî Judabab nî māǁnâhe ǃkhaisa ge mîmā. 32 Xawe gu ge pristerga nūs ǃnaka mâpab Judaba gau hâ ǃkhaisa gu a ǀū ti ge mî. 33 Ob ge Nikanora amǀkhāb ǁôaba ūkhâi tsî “Judaba go ga ti ǃomǁae ǃkhōsabese māǁnâ tama i, o ta ge Elob di Tempela ǃhūb kōse ǃkhom, altarsa hîkākā tsî nē ǃkhais ai Dionisuba tempela nî omba” ti ge nū. 34 ǁNās khaoǃgâb ge ge ǃgû, o gu ge pristerga ǁîgu di ǁôaga ǁnātimîsi ǀhommi ǃoa ǀhōǂui tsî Elob hîa ǂgomǂgomsa ǁKhauba-aob, sida ǁaes dib ǃoa ge ǀgore: 35 “ǃKhūtse, sats ge xū-i xare-e ǂhâ tama hâ, xawe i ge satsa ge ǃgâiba i, sa Tempela nēba om tsî sida ǁaegu ǁansa. 36 Sats ǀguits ge ǃanu tsîb ge sa Tempela ǀgū ǁaeb ǃnâ ge ǃanuǃanuhe, ǁnā-amaga ǁîb di ǃanusiba ǀamose ǁkhauba re.”
Ratsib ge ǁîb di ǃhūb ǃaroma ra ǁō
37 Jerusalems di ǂgaeǂgui-aogu di ǀguib, Ratsib ti ge ǀon hâ ib ge Nikanori tawa ge ǃnuriǃgâhe. ǁÎb ge khoen âbab ge ǂgui ǀgaugu ai hui tsî ǁîn xa ǀgapiǃgôahe hâ i tsî “Jodeǁîn di ǁGûb” ti ǂansa i ti gere mîhe. 38 Khākhoexagusib ge hâ i ǁaeb aib ge ǀnai Jodeǁî ǂgoms di ûiba gere ǁkhauba tsî ǁîb di îǂhôasib ǃaroma ǁnâuǃgâǃkhaib ǃnâ ge ǂhai. 39 Mâtikōseb Jodeǁîna ǃhuisa ǃkhaisab nî ǁgaugab ge Nikanora korokaidisis xa ǃnāsa toroǃkhamaoga Rasiba nî ǃkhōse ge sî. 40 ǁÎb ge nē ǃkhōs nî Jodeǁîna kai ǂkhôab ase ība ti ge ǂâi. 41 Toro-aogu ra Ratsib ge hâǃnâ i ǂgō-omma xāǂgā tsî omǂnamib di dao-amde ǂhāǁkhowa-am, hîa gu ge ǀaesa hā-ūhe tsî di nî dao-amde ǃkhāǂhubihe ǃkhaisa ge mîmā. Ratsib ge ǂoasoa-i ǀkhai ǃkhaisab ge hōǃâ, o ǁîb di hoaǀkhāǀāgôab ǀkha 42 ǂkhaba khoen ǃomǁaeb nî ǁōs xab nî ǃgôasib ǃnâ ǁō ga ǃkhāǃansensa ge dītsâ.
43 Xaweb ge Ratsiba ǁkhamasa mâsib hîa ge hâ ib ǃnâ gôab ǀkha ǃkhāsāsen tsî ǁō tama ge i. Toro-aogu ge ǂguise ǃnā-oms ǃnâ ǂgâxa, ob ge ǂnubiǂgoab ǃoa ǃkhoe tsî ǁkhoaǂgao khoeb khami ǃnaka ge mâ i ǂnubis khoen ǁaegu ge uriǁgôa. 44 Nē ǂnubis khoen ge ǃhaese ge mâ-oa tsîb ge ǁîn ge mâ-oa xu ǃkhaib ai ge ǁnā. 45 Ganupe ûitsama tsî ǁkhoaǂgaoseb ge khâi tsî ǀaob ra ǁîb ǀhapina xu ǂnâse ǂnubis khoen ǃnâ-u ǃkhoeǃkharu tsî ǀgapi ǃgareǀuib ai ge ǂoa. 46 Kaiseb ge ǀnai kai ǀaoba ǂoaǃnâ hâ i, xui-aob ge ǁîb di ǃnāxūna hoa ǀgam ǃomkha ǀkha ǂgaeǂui tsî khoen ǁga ge ao. Tsîb ge ǁnāti ra dīse ǃKhūb ûib tsî ǀoms dib ǃoa ǀgore tsî gere ǂgan, îb ǁkhawa ǁnā xūna mā-oahe. ǁNā ǀgaub aib ge ge ǁō.
© Khoekhoegowab Elobmîs © Bible Society in Namibia, 2020.
