Lukab 14 - Khoekhoegowab New Translation 2020 (KKG20)

Jesub ge ǀaesen hâ khoeba ra ǂuruǂuru

1 Sabbattsēs aib ge Jesuba ǂgaeǂgui-ao Farisegu ǀguib di oms ǁga ge ǃgû, ǁnāpab sī nî ǂûse tsî khoen ge Jesuba ǂōrisase gere ǃkhē. 2 Tsîb ge ǁgamǀaeba ūhâ khoeba Jesub ǃoa ge hā, 3 tsîb ge Jesuba Moseb ǂhanub* di ǁkhāǁkhā-aogu tsî Farisegu* tsîna ge dî “Khoe-e Sabbattsēs ai ǂuruǂuru ǁkhāts a?” ti.

4 Xawe gu ge ge ǃnō. Ob ge Jesuba ǀaesen hâba ū, ǂuruǂuru bi tsî ge ǃgû kai bi. 5 Ob ge Jesuba ǁîgu ǃoa ge mî: “ǀGuib sago dib di ǀgôab, tamas ka io gomab ga tsaub ǃnâ Sabbattsēs ai ǁnāo, ǁnātimîsits ǁî-e ūǂui tide, Sabbattsēs ga xawe?”

6 Xawe gu ge xū-i xare-e ge ǃeream ǁoa i.

ǃGamǃgamsens tsî khoexaǃnâsib

7 Tsî Jesub ge mâtin ra ǀnî ǁkhausana tāb tawa ǃgôasib di ǂnûǃkhaide ǁhûiǂuibasen ǃkhaisa mû, ob ge ǁkhausana nē ǂkhōsa* ge ǁgamba: 8 “Khoe-i ga ǃgameǁâus ǃoa a ǁkhau tsi, ots ge tā ǂoaǂamsa ǂnûǃkhais ai sī nî ǂnû. Sats xa ǀgapi khoe-i ge ǀnîsi ǁkhauhe hâ. 9 Tsîb ge sakho hoakho ǁkhau hâba sats ǃoa hā tsî nî mî, ‘Nē ǃkhaisa xu aibe ǁnā khoeba khâiba.’ Ots ge taob ǀkha ǃgâb ai hâ ǂnûǃkhais ǁga nî ǃgû. 10 Xawe ǁkhauhets kao, o ǁnâi ǃgâb ai hâ ǂnûǃkhais ai sī ǂnû. Tsî oms ǀhonkhoeb ga hā, ob ge sats ǃoa a mî ǁkhā ‘Horesatse, nēpa ais ai hā ǂnû re.’ Ob ge ǃgôasib âtsa hoan mûǁae nî kai. 11 ǀGapiǂâixan hoan ge nî ǃgamǃgamhe tsî ǁî-aitsama ra ǃgamǃgamsenn ge nî ǀgapiǀgapihe.”

12 Jesub ge ǁkhāti ǁkhau-aob ǃoa ge mî: “ǂÛǀhao-ets ga tsēǃgâǁaeb ai tamas ka io ǃuia dīo, tā sa ǀhōsan tamas ka io ǃgâsan tamas ka io ǀaokhoen tamas ka io ǃkhū hâ ǁanǁare-aon ǀguina ǁkhau, ǁîn tsîn ǁkhawa ǁkhau tsi tsî ǁnāti nî mādawa tsina. 13 ǂÛǀhao-ets ga dīo, ǀgâsan, ǃhoran, ǃhom hân tsî ǂgīn tsîna ǁkhau re. 14 Ots ge nî ǀkhaehe, mādawan nî xū-en ūhâ tama amaga. Elob nî mādawa tsi, ǃgâina gere dīn di ǁōba xu khâis ǃnâ xui-ao.”

Kai ǂûǀhaos xa hâ ǂkhōs

(Mateub 22:1-10)

15 ǁÎb ǀkha tāb tawa ǂnôan di ǀguib ge nēsa ǁnâu tsî Jesub ǃoa ge mî: “ǀKhaeheb ge hâ ge ǁnā khoeb Elob Gaosib ǃnâ ǂûǀhao-i ǃnâ nî amǃnâxaba.”

16 Ob ge Jesuba ǁîb ǃoa ge mî: “ǂAnǂansa khoeb ge ǂûǀhao-e dī tsî ǂgui khoena ge ǁkhauǂui. 17 Tsî ǁâudīb ǁaeb ge ǀoa, ob ge ǃgāb âba ge sîǂui, îb ǁkhausana sī mîba: ‘Hā re, hoan ge go dītoahe tsî ǂûn ge ǂhomisase mâ.’ 18 Xawen ge nē-e xu nau-i ǁga ge ǀhapiokaisentsoatsoa. ǂGurob ge ǃgāba ge mîba: ‘ǃHūǃâsa ta go ǁama tsî ta ge ǁîsa ǃhaese sī nî kō. ǂGan tsi ta ra, ǀhapio kai te.’ 19 Naub ge ‘Disi gomaga ta go ǁama tsî ta ge ǁîga sī ra ǃâi. ǂGan tsi ta ra, ǀhapio kai te’ ti ge mî. 20 ǀNîb ge ‘ǀAse ta go ǃgame tsi ta a sī ǁoa’ ti ge mî. 21 Ob ge ǃgāba oa tsî ǀhonkhoeb âba sī ge mîba. Ob ge ǀhonkhoeba ǁaixa tsî ǃgāb âb ǃoa ge mî, ‘ǃHaese ǃgûǂoa ǃās di daogu tsî ǃgangu ai, î ǀgâsan tsî ǃhoran tsî ǂgīn tsî ǃhom hân tsîna hā-ū.’ 22 Ob ge ǃgāba oaǀkhī tsî ge mî, ‘ǃGôahesatse, sa mîmās ge go dīǀoaǀoahe tsîb ge noxopa soaba oms ǃnâ hâ.’ 23 Ob ge ǀhonkhoeba ǃgāb ǃoa ge mî, ‘ǃGûǂoa daogu ai tsî ǂgarogu ai, î ǁkhau în ǂgâxa, îs ti omsa ǀoa. 24 Amase ta ra mîba du ǀgui-i ǁkhauhe go hâ in di-i tsîn ti ǂû-i xa tsâ tide ǃkhaisa.’ ”

ǁKhāǁkhāsabesis* di ǂgaoǀkhās

(Mateub 10:37-38)

25 Kai ǂnubis khoen ge Jesuba gere sao, ob ge dabasen tsî ǁîn ǃoa ge mî: 26 “Tita ra sao khoe-i ge a ti ǁkhāǁkhāsabe ǁoa, ǁî-i di îb tsî îs, taras, ǃgâsab tsî ǃgâsas tsî ǁî-i di ûib ǂûba ǁnāxū tsî-i ga hoan ǂamai tita ǀnam tama io. 27 ǁÎ-i di ǃgâuhaiba* tani tsî ga tita sao ǁoa-i ge a ti ǁkhāǁkhāsabe ǁoa. 28 Sadu ǀgui-i ga ǂgō-omma omsa ǂâiǃnâǁgui, o du kom aibe ǂnû tsî ǂganǀgaub tsî mari-i nē sîsenna dītoas ǃaroma ǂâu hâ ǃkhaisa ra kō-o. 29 Tsîts ga ǂâusa mari-e ūhâ tama i nē ǂgō-omma dītoas ǃaroma ǃgaoǃgaobats ǁgui hâs khaoǃgâ; on ge mû ran hoana ǃhō tsi tsoatsoa tsî nî mî, 30 ‘Omtsoatsoa tsî xaweb ge sîsenna a dītoa ǁoa’ ti. 31 Tamas ka io mâ gao-aoǃnôaba torobab nî ǃkhams aiǃâ aibe ǂnû tsî ǀapeǀape tide, iseb a ǁkhāsa ǁîb di disiǀoadisigu ǀkha naub ǀgamdisiǀoadisiga ūhâba mâǃoasa? 32 Tsî ǁkhā tamab ga io, ob ge ganupeb nauba a ǃnū hîa sîsabega ra sî, ǂkhîba kha nî dīse.” 33 ǁNā-amagab ge Jesuba ge ǀamǀam: “Sadu di ǀgui-i tsin ge a ti ǁkhāǁkhāsabe ǁoa, ū-i hân hoana i ga ǁnāxū tama io.

Harebeoǃnâ ǂō-i

(Mateub 5:13Markub 9:50)

34 “ǂŌ-i ge a ǃgâi, xawe ǂō-i ga a ǁkhoao, o tare xū-i ǀkha i ǁkhawa nî ǁkhoaǁkhoahe? 35 O i ge ǃhūb tamas ka io ǀarub tsîna xū-e harebeba tama hâ. O i ge ra aoxūhe. ǂGaera ūhâ-e, a-i ǁnâu.”