2 Gao-aogu 14 - Khoekhoegowab New Translation 2020 (KKG20)

Judab di gao-aob Amasiab

1 ǀGamǁî kurib Israeli gao-aob Joahasi ôab Joasi ǂgaeǂguis dib ǃnâb ge Joasi ôab Amasiaba ge Judab di gao-ao kai. 2 ǁÎb ge ǀgamdisi kurixab a hîa ge gao-ao kai tsî ǀgamdisikhoeseǀa kuriga Jerusalems ǃnâ gere ǂgaeǂgui. ǁÎb îs ge Jehoadins, Jerusalems di ge isa. 3 ǁÎb ge ǃKhūba a ǃgâibanab gere dī, xawe ǁîb di aboxab Davidi khami ge dī tama hâ i, tsî ǁîb îb Joasi khami gere dī. 4 ǁGôa-elon ra ǀgoreǀî-aihe ǃkhaideb ge khôaǁnâ tama ge i tsîs ge ǁaesa noxopa khauǁguibadi tsî ǀanǀanǁguibadi tsîna ǁnāpa sī gere ǁguiba.

5 Gao-aosis âb ge ǀgaisase mâǁapo, ob ge Amasiaba ǁîb îb, gao-aoba ge ǃgam hâ i ǂamkhoega ge ǃgam. 6 ǁÎgab ge ǃgam xaweb ge ǀgôan âga ǃgam tama ge i tsî Moseb ǂhanub ǃnâb ge ǃKhūba mîmā hâ i khami ge dī. “ǁGûn ge ǀgôan di tsūdīgu ǃaroma ǃgamhe tide tsî ǀgôan ge ǁgûn di tsūdīgu ǃaroma ǃgamhe tide; mâ khoe-i hoa-i ge ǁî-i tsūdīgu ǃaroma ǀgui nî ǃgamhe.”

7 Amasiab ge disiǀoadisi Edomǁîga ǂŌxaǃgoaǃnāb ǃnâ ge ǃgam tsîb ge Sela ti ǀon hâ ǃāsa torob ǃnâ dan tsî ǁîsa Jokteel ti ge ǀonǂgai tsîs ge nētsēs kōse ti a ǂansa.

8 Amasiab ge Israeli gao-aob Joasa ge haisiba, î kha toroba ǃkhamūgu. 9 Xaweb ge gao-aob Joasa nēti ge ǃeream: “ǀGui ǃnā-es ge Libanonni ai mâ ǁkhūhaisa sederhaisa ge haisiba: ‘Sa ôasa ti ôaba ǃgameb nîse mā re.’ Xawe i ge xamani-e ǁnāpa-u hā ǃkharu tsî ǁkhūsa ge dāǂkhū. 10 Sats ge Edomǁînats go dan, o kaise ra ǂnīǂnīsen. ǁNās ǀkha ǂâu, î oms tawa hâ. Tare-i ǃaromats kha tsūǀkhāba sats tsî sa ǁaes ǂama ra hā-ū ǂgao?”

11 Xaweb ge Amasiaba ǃgâ ǂgao tama ge i, ob ge gao-aob Joasa ǁîb toroǂnubis ǀkha ǃgûǂoa tsî Amasiab ǃoagu Bet-Semes Judab ǃnâ ǂnôas ǃnâ sī ge ǃkham. 12 Amasiab toroǂnubis ge ge danhe tsî gu ge ǁîb toroǃkhamaoga omdi âgu ǁga ge ǁhâ. 13 Tsîb ge Israeli gao-aob, Joasa Amasiaba ǃkhōsis ǃnâ ū, tsî Jerusalems kōse sī tsî ǃās di ǂnubiǂgoaba, Efraimdao-amsa xu ǁHôadao-ams kōse, ǁaubexa ǀgamkaidisi metergu kōse gaxu ǃkhaiba ge khôaǁnâ. 14 ǁÎb ge hoaraga ǀhaiǀurib tsî ǃhuniǀurib, hoaraga xūn Tempeli tsî gao-ommi ǃnâb ge hōn tsîna ū tsî Samarias ǁga ge ǃgû-ū. Khoen tsînab ge ǃkhōsabese ge ūsao.

15 Joasi ge dī xūn hoan tsî ǁkhoaǂgaoxasib âb Judab gao-aob ǃoagub ge torodī-ūb ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 16 Joasi ge ǁō tsî Samarias ǃnâ gao-aogu ǀhobadi tawa ge ǁkhōhe tsîb ge ǁîb ôab Jerobeamma ǁîb soas ǃnâ ge gao-ao kai.

Gao-aob Amasiab di ǁōb

(2 Kroniks 25:25-28)

17 Judab gao-aob Amasiab ge Israeli gao-aob Joasi di ǁōb khaoǃgâ noxopa disikoroǀa kuriga ge ûi. 18 Amasiab ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa.

19 Jerusalems ǃnâ gu ge ǁîba gu nî ǃgamse a ǀapeǀhao, ob ge Amasiaba Lakis ǁga ge ǃhū, xawe gu ge ǁîba ǃgôaǃgon tsî ǁnāpa sī ge ǃgam. 20 Tsîn ge ǁîb sorosa hāb ai ǃnao hâse Jerusalems tawa sī-ū tsî gao-aogu ǀhobadi tawa, Davidi ǃĀs ǃnâ ge ǁkhō. 21 Hoaraga ǁaes Judab dis ge ǁîb di disiǃnaniǀa kurixa ǀgôab Usiaba, ǁgûb soas ǃnâ ge gao-aodī. 22 Usiab ge ǁîb îb di ǁōb khaoǃgâ Elatsa ǁkhawa ū-oa tsî ge ǂnubikhâi.

Israeli gao-aob Jerobeammi

23 Disikoroǀaǁî kurib Judab gao-aob, Joasi ôab Amasiab ǂgaeǂguis dib ǃnâb ge Joasi ôab Jerobeamma ge Israeli di gao-ao kai, tsîb ge hakadisi kuriga Samarias ǃnâ gere ǂgaeǂgui. 24 ǁÎb ge ǃKhūba ǃgâiba tamana gere dī tsî ǁîb di aiǃgû-aob Jerobeammi, Israela ge ǁoreb ǃnâ ǂgaeǂguiǂgāb di ǂkhaba aiǁgausa gere sao. 25 ǁÎb ge Israeli di ǃhūǀgorade ge dī-unu, Hamats di dao-ams ǀapas ǃnâ ǁgoesa xu ǂŌxahurib ǃkhawagas ǃnâ ǁgoeb kōse. ǁNā ǃkhaisab ge ǃKhūb, Israeli di Eloba ǀnai ǁîb di ǃgāb, kēbo-aob Jonab Amitaib, Gathefers dib di ôab ǃnâ-u ge mîmâi hâ i.

26 ǃKhūb ge ǃgom tsâb Israelǁîn diba ge mû, ǁîn ge hui-ao-i xare-e ge ūhâ tama hâ i. 27 ǃKhūb ge Israelab hoaragase nî hîkākāsa ge ǂâibasen tama hâ i, ǁnā-amagab ge ǁîna Joasi ôab Jerobeammi ǃnâ-u ge huiǂui.

28 Jerobeammi ge dī xūn hoan, ǁîb di ǁkhoaǂgaoxa toroǃkhamdi tsî mâtib ge Damaskus tsî Hamats tsîra Israela hō-oabas tsîn ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 29 Jerobeammi ge ǁō tsî gao-aogu ǀhobadi tawa ge ǁkhōhe tsîb ge ǁîb ôab, Saxariaba ǁîba gao-aose ge saoǃgon.