Elob ǃgâisib ǃaroma hâ koatsanas
ǁNaeǃnans ǂgaeǂgui-aob ǃoa
Davidi Psalms
1 Elotse Sions tawan satsa ra kare
tsîs nūsa satsa nî matarehe.
2 Sats sida ǀgorede ra ǁnâu-amts
ǃoan ge hoaraga khoena nî hā.
3 Sida dīsādi ge ra ǀgaidā da
xawets ge sida ǃûǂamde ra ǀûba da.
4 ǀKhaehe i ge hâ ǁnā-i, ǁî-ets ra ǁhûi tsî ǀgūǀgū-e
î-i sa ai-omgu ǃnâ ǁan ǁkhā.
Sida ge sa ommi di ǃgâisib xa nî ǁâ
ǃanu ǃkhaib sa Tempeli dib ǀkha.
5 Sats ge buruxa dīgu ǀkha ge ǃeream da,
Elotse sats hîa sida ra ǃnoraǃnorats,
sida di ǂgomǃgâts, ǃhūbaib di ǀams kōse,
hurib di ǃnūsib kōse.
6 Sats ge sa ǀgaib ǀkha ǃhomga ge ǂnubi;
ǀgaib ǀkha anahe hâtsa.
7 Huriba ra ǃnōǃnōts;
ǃgabigu di ǂkhupib
tsî khoen di ǂkhupiba ra ǃnōǃnōtsa.
8 Tsîn ge ǁanǂgāsaben ǃnūse ǁan hân tsîna
sa buruxa sîsenga ra ǃao.
Sats ge sores di ǁhais tsî ǁîs di ǂgâsa ra ǃgâiaǂgao kai.
9 Sats ge ǃhūba sari tsî ǃnāǂamsase ra ǃkhū kai
Elob di ǃārogu ge ǁgam-i xa ǀoa hâ
tsîb ge ǁnā ǀgaus ai ǃhoroba ra aiǂhomi.
10 ǃHūǃgaohe hâ ābats ge ǃnāǂamsase ǁgam-e ra mā;
ǃgaokhâihe hâ ǃhūbats ge ra ǂhauǂhau;
ǀnanub ǀkhats ǁîba tsautsau
tsî ǃīǂoaxa rana ra ǀkhae.
11 Sats ge kuriba sa ǃgâisib ǀkha ra ǀgapa
tsî di ge sa dāǃharode ǁnuiba ra ǂnâ kai.
12 ǃGaroǃhūb ǃû-aidi ge ra ǂnâ
tsî ǃhomgu ge dâb ǀkha anasen hâ.
13 ǃÛ-aidi ge gūn xa ǀoa hâ;
ǃgoaǃnāgu ǃhorob ǀkha ǃgū-aihe hâ
tsîn ge dâb ǀkha ra ǂgaiǂui, ā ǁîn ge ra ǁnae.
© Khoekhoegowab Elobmîs © Bible Society in Namibia, 2020.
