Huib ge ǀgūse hâ
ǁNaeǃnans ǂgaeǂgui-aob ǃoa
Koraxi ôagu di Psalms
1 ǃKhūtse sats ge sa ǃhūba ge ǀkhomxa;
Jakob di tsūǀkhābats ge ge ǀkharaǀkhara.
2 Sa khoen di ǁorenats ge ǁîna ge ǀûba,
sats ge ǁoreb âna ge ǃgū-ai.
3 Sa ǁaibats ge ge ū-oa,
sa ǀaexa ǁaixasiba xuts ge ge dabasen.
4 ǁKhawa ǀasaǀasa da re sida ǃgâiǃōsib di Elotse,
î ǁaixasib sida ǃoaguts ūhâba dībē re.
5 ǀAmosets kha sida ǀkha nî ǁaixa?
ǃHaosa xu ǃhaos kōseb kha sa ǁaiba nî hâ?
6 ǁKhawats kha ûi-ûi da ǂgao tama hâ,
în sa khoena sats ǃnâ dâ?
7 ǃKhūtse sa hâhâ ra ǀnammi di ǃgaeǀhaosa ǁgau da re
î sa ǃgâiǃōsiba mā da re.
8 ǃKhūb Elob ra mî xū-i hoa-e ta ge nî ǃgâ;
ǁîb ge ǂkhîb xa nî ǃhoa ǁîb khoen, ǁîb ǂgomǂgomsan ǀkha,
xawen tā ǁîna ǁkhawa gâresib ǃoa oa re.
9 Amaseb ge ǃgâiǃōsiba ǁnān ǁîba ra ǃaoǃgâna a ǀgūba,
tsîb ge ǂkhaisib âba sada ǃhūb ǃnâ nî ǁan.
10 Hâhâ ra ǀnammi tsî ǂgomǂgomsasib tsîkha ge ra ǀhao;
ǂhanu-aisib tsî ǂkhîb tsîkha ge ra ǁoagu.
11 ǂGomǂgomsasib ge ǃhūba xu ra ǀkhī
tsî ǂhanu-aisib ge ǀhomma xu ra kōǁgôaxa.
12 ǃKhūb ge ǁkhāti ǃgâiba nî mā
tsîb ge sada ǃhūba ǁîb ǂûtaniba nî ūǀkhī.
13 ǂHanu-aisib ge ǃKhūb aiǃâ nî ǃgû
tsî ǁîb dāǃharodi di daoba nîra ǂhomi.
© Khoekhoegowab Elobmîs © Bible Society in Namibia, 2020.
