Israelǁaes ǃaroma hâ ǀgores
1 ǀHommi tsî ǃhūbaib tsîkha di Elotse, sida ǀgoresa ǁnâu, î sâu da re. 2 Ab sa ǃaoba mâ ǁaes hoasa hāǂam. 3 ǃHao ǁaede ǁnāǂam, în sa ǀgaiba ǂanǃgâ! 4 Sidats gere sa ǃanusibats nî ǁgau da ga sîsenūs ǁkhās khami ǁîna sîsenū, î sa ǂkhaisiba sida ǁgau. 5 On ge sida ge ǂan is ǁkhās khami, Elo-i ǀkhai, xawets sats ǃKhūtsa hâ ǃkhaisa nî ǂan. 6 ǀAsa ǁgauǁgaude mā, ǀasa buruxa dīna dī; sa ǂkhaisa ǀgaiba ǁgau da. 7 Sida khākhoen ǀkha ǁaixa, îts mâ-i ǁîn di-i hoa-e hîkākā. 8 Sats ge ǂkhaba khoenats nî hîkākā ǁaeba ge mîmâi; ab ǁîba toxopa ǃhaese hā re. O da ge sats ge dī kai dīgu xa hâ ǁgaeǂhôana, sida ôana da nî ǁgambase ūhâ. 9 ǀGui-i xare-i sa khoena ge tsûtsû khākhoen di-i ga ûiǂoa, o ab sa ǁaiba ǀae-i khami ǀgam tsî ǁîna hîkākā. 10 ǁNā khākhoeǂgaeǂgui-aogu “Sige ge hūs ǂhâǂhâsa khoege, ǃhūbaib ǃnâ” ti ra mîga hoaragase hîkākā. 11 Hoaraga ǃhaodi Israelǁaes dide ǁkhawa ǀhaoǀhao, î ǁîna ǁîn ǃhūba hūgats ge ǁîna mā hâ i khami mā-oa. 12 ǃKhūtse, Israelǁîn, sa ǀons ai sa ǁaes ase ǂansan, hîats ge sa ǂguroǃnaesabe ǀgôab ase ǂgaina ǀkhomxa re. 13 Sa ǃhūbaisi ǁanǃkhais, Jerusalems, sa Tempeli mâǃnâsa ǀkhomxa re. 14 Sa Tempeli, Sionǃhommi ai mâba koatsanade ra ǁnae tsî sa buruxadīgu xa ra ǃhoa khoen ǀkha ǀoaǀoa re. 15 Sa khoen hîats ge tsoatsoas ǃnâ kuruna ǃkhō-amba. Sa ǀons ǃnâ ge mîhe kēbode dīǀoaǀoa. 16 ǁNān ǁîn di ǂgomǃgâsa sats ǃnâ ūhâna mādawa-am, îb ǃhūbaiba ǁnā kēbo-aogu a ǂhanu ǃkhaisa mû. 17 Sats ge hugaǀgui sa ǁaes ǃoagu ge tsauraǃnâ i; tsî sa ǃoaba-aoda ǃoa ǀgore da ka, o ra ǃgâ. On ge ǃhūbaib ai hân hoana nî mûǂan sats a ǃKhū, ǀamosiba xu hâ Elots a ǃkhaisa.
ǀNî xūn ge nau xūn ǃgâ-ai ǃgâi
18 Mâ ǂûǃnôa-i hoa-i ge a ǂûhe ǁkhā, xawe ǀnî ǂûn ge naun ǃgâ-ai ǃgâise ra ǁkhoa. 19 Nams ǁganni di ǁkhoaba, ǀnîsi i a xamari-i di ǃkhaisa a hōǃâ ǁkhās khamis ge gā-ai ǂâisa khoe-i ga ǂhumi, o ǂanǂui ǁkhā. 20 ǂHanuse ǂâi tama khoe-i ge tsūǃgâba ǃaroma ǁkhā, xawe hōǃâsa ūhâ khoe-i ge mâti i ǂhanu ǀgaub ǃnâ nî ǃeream ǃkhaisa a ǂan.
21 Khoes ge tarib hoaba ǁîs aob ase ūǃoa ǁkhā, xawe khoeb ge ǁîs a hoadi xa ama-ai tib ra ǂâi khoesa a ǁhûi ǁkhā. 22 Khoes ga îsa, os ge khoeb aisa ra ǃnâ. ǀNî xū-i ǃnāsaseb aorekhoeba tarekhoes ǃnâ hâ anusasib ose, ǁîs ǃoa ra kō-i a ǀkhai, 23 xawe khoes ga tsauraǃnâsib tsî khoexaǃnâsib ǀkha ǃhoa, ob ge ǁîs aoba nau khoegu ǃgâ-ai a ǃgâiǃgâ. 24 Khoeb ga ǃgame, ob ge hūgas ǃgâ-ai ǃgâi xū-e ūhâ; taras ǁîba hui tsî nî ǂgaoǂgaoǃnâsa.
25 Ūhâxūn ga omǂnamihe tama io, o gu ge ǃnari-aoga ǂgâ tsî aitsama nî huisen. Aob ga tara-e ūhâ tama io, ob ge sâoǃnâse nî hâma. 26 Tari-e ǁâtanisen hâ ǃnari-ao-i, ǃāsa xu ǃāsa ǃoa ǃgûgaruse ǀgui ra hâma-e nî ǂgomǃgâ? ǁNā ǀgaub ǀguib ǃnâts ge omo-aob, mâ tsuxub hoaba ǀkhara ǃkhai-i ai ra ǁomma a ǂgomǃgâ ǁoa.
© Khoekhoegowab Elobmîs © Bible Society in Namibia, 2020.
