ǁKharab, ǃhobasens tsî ǃâubasens
1 Tita ge ǁnā aota, Elob di ǁaixasib ǃnâ ge tsâ ta.
2 ǁÎb ge tita ǂgaeǂgui tsî ǃkhaenab ǃnâ ge ǃgû kai, ǃnâb ose.
3 Amaseb ge ǃommi âba tita ǃoagu ge daba, hoaraga tsēsa.
4 ǁÎb ge ti soros tsî khōba kaira kai, tsî ti ǂkhōga ge khôa.
5 ǁÎb ge ǃgāb tsî ǀhupub di ǂnubiǂgoab ǀkha ge ǁgâuǂnami te.
6 ǁÎb ge ǃkhae ǃkhaidi ǃnâ ge ǁan kai te, ǁnān ǂomxase ǁō hân khami.
7 ǁÎb ge ti ǂnamipe ǂnubiǂgoaba ge ǂnubi, ǂoa ǁkhā ta tidese; ǁîb ge ti bronsǂaiǃgae-ūdade ge ǃgomǃgom.
8 Huib ǃaroma ta ra ǂgai, xaweb ge ti ǀgoresa ǁnâu tama hâ.
9 Ti daogab ge ǀuidi ǀkha ge ǂnubiǂgan, ti ǃgûǂgarogab ge ge gama kai.
10 Elob ge beri tamas ka io xammi, ǂganǃgâsa ǃkhaidi ǃnâ tita ǃâuǁgoeb khami ge ī.
11 Tita daoǁnani tsîb ge ǃâdi ǃnâ ǀkhauǃā te, tsî ǃū-aisase ge ǁnāxūǁgui te.
12 Khās âba ǂgaeǃnâ tsîb ge ǁîb ǂāb di ǁnoraxūse ge dī te.
13 ǁÎb ge ǂāgu âba ti ǃnaira ǃnâ ge ǂgâ kai.
14 Hoaraga khoen di âixū kai ta ge, tsîn hoa tsēsa ǃhōtsanade ra ǁnae.
15 ǁÎb ge au xūn ǀkha ge ǁâǁâ te, alsemmab ge ge āsi te.
16 ǁÎb ge ti ǁgûna ǁkhaeǀuirodi ǀkha khôa, tsî tsaob ǃnâ ge ǁgâiǂgā te.
17 ǂKhîb ge ti ǀomsa xu ǃnūse dībēhe hâ, ǃgâiǃgâ-e ta ge a ǀū.
18 Tsî ta ge “Ti ǂkhaisib ge bē hâ, ǃKhūb ai ǀgui ta ge ǃâubasen hâ” ti ra mî.
19 Ti ǃgom tsâb tsî omosib xa ǂâi re, alsemmi tsî tsabab xa.
20 Ti ǀoms ge ǀûs ose ǁîn xa ra ǂâi, tsîs tita ǃnâ ra ǃgamǃgamhe.
21 ǁÎna ta ǂgaob ǃnâ ra ūbasen tsî ta ge ǁnā-amaga nî ǃâu.
22 Hâhâ ra ǀnammi ǃKhūb dib ge ǃaromas ge hîǀhuruhe tama da hâsa, ǀkhomxaǂgaosigu âb toa tamasa.
23 Mâ ǁgoas hoasa gu ge a ǀasa, sa îǂhôasib ge a kai.
24 “ǃKhūb ge a ti amǃnâ, ǁnā-amaga ta ge ǁîb ai nî ǂgomaiǂnûi” ti ta ge ra mîbasen.
25 ǃKhūb ge a ǃgâi, ǁnān ǁîb ai ra ǂgomaiǂnûin, ǁîba ra ôan ǃoagu.
26 ǃGâi i ge a ǃnōsase ǃKhūb di ǃgâiǃōsiba ǃâubasensa.
27 Khoeb ǃaroma i ge ǃgâi, ǂkhamsis âb ǃnâ jokhoesa tanisa.
28 Ab ǀguri, ǃnōsasib ǃnâ ǂnû, ǃKhūb ga ǁîba ǂgōǀauo.
29 Ab ams âba tsarab ǃnâ ǂgā, ǀnîsis kom ǃâubasensa hâo ti.
30 Ab ǁnā-i hîa ra ǂnau bi-e nau xōsa mā, tsî ǃharaxūb xa ǁâ.
31 ǃKhūb ge ǀamose ǂhābē da tide.
32 ǁÎb ga ǃoaǃoa ob ra ǀkhom, ǁîb hâhâ ra ǀnammi di kaisib ǃoa.
33 ǁÎb ǂgaoba xu khoen ôana ǃoaǃoa tama hâ xuige.
34 Hoaraga ǃkhōsaben ǃhūb din ga ǁîb ǂaira ǃnaka dāǂkhūǂkhūheo,
35 khoeba ǂhanu-aisib âba Hoan xa ǀGapib mûǁae ǀhana,
36 khoeba ǂhanub ǁhō-i ǃnâ gāxaǃnâsa, ǁî ǃkhaisab kha ǃKhūba mû tide.
37 Tari-e xū-e ra mî-e, tsî i ra ī, ǃKhūb ga ǁnāsa mîmā tama io?
38 Hoan xa ǀGapib mîmās ai tamasa ǃgâin tsî tsūn ra hāsa?
39 Ob kha khoeba ǁnâi tarexa nî ǀara, ǁîb ǁoren ǃaromab ga ǁkharaheo.
40 A da sada daoga ôaǃnâ tsî ǃKhūb ǃoa dabasen re.
41 A da sada ǂgaogu tsî ǃomgu tsîna Elob ǀhommi ǃnâ hâb ǃoa ǀhōǂui tsî mî:
42 “Sida ge ge ǃûǂam tsî da ge ge mâǃoaxa i, tsîts ge ǀûba da tama ge i.
43 “Sats ge ǁaixasib ǀkha ǃgū-aisen tsî sida ǃgôaǃgon tsî ǀkhomoǃnâse ge ǃgam.
44 Sats ge ǃâus ǀkha ge ǃgū-aisen, ǀgores tsîn ǃkharu ǁoase.
45 Sats ge sida ǀapose ge dī, aoxūxūse ǁaedi ǁaegu.
46 “Sida khākhoen hoan ge sida ǃoagu ge ǂapenam
47 ǃAob tsî āb ge ge hāǂam da; hîkākās tsî khôaǂkhūs tsîna.
48 ǁGamǃārogu khamib ǁgamroba ti mûra xu ra dâu, ti ǁaes ôas di ǂkhôahes ǃaroma.
49 “Ti ǁgamrogu ge ǀû tamase nî dâu,
50 ǃKhūb nî ǀhomma xu kōǁnâ tsî mûs kōse.
51 Ti mûs ge ti ǀomsa ra ǃoaǃoa, ǀgôadi ti ǃās didi ǃaroma.
52 “Amasen ge ti khākhoena ǀhapiose ani-i khami ge ǃau te.
53 Ti ûiban ge tsaus ǃnâ gere ǀamǀam ǂgao, tsî ǀuin ǀkha ge ǂnoa te.
54 ǁGamgu ge ti danasa ge dâuǂam, o ta ge ǃgaoǁnâhe ta go ti ge ǂâi.
55 “Tsaus di ǃgamsiba xu ta ge ra ǂgaiǀî tsi ǃKhūtse.
56 Sats ge ti ǀkhomasa ge ǁnâu: ‘Tā ǂgaes âtsa ǂganam, ti ǀhâimâinǀoms ai.’
57 ǂGaiǀî tsi ta ge tsēs aits ge ǀgūse ge hā tsîts ge ‘Tā ǃao’ ti ge mî.
58 “ǃKhūtse sats ge ti ǂnoaguǃkhaide ge ū; ti ûibats ge ge sâu.
59 Sats ge ti ǁgâiǀāba ge mû, ti ǂhanu-aisib ǃoa ǀgoraǃgâ re.
60 Sats ge ǁîn di ǀkhaoba hoaba ge mû, hoaraga ǀapedi tita ǃoagun ūhâde.
61 “ǃKhūtse sats ge ǃharaxūs âna ge ǁnâu, hoaraga ǀapedi tita ǃoagun ūhâde.
62 Tita ǃoagu ra khâin di amǁgaugu ge hoa tsēsa tita ǃoagu ra ǀape.
63 ǁÎn di khâis tsî ǂnûs ǃnâ ta ge ra mû, mâtin tita ra ǃhōsa.
64 “ǃKhūtse ǁîn di mādawa-amsa ǁîna mādawa-am re, ǃomgu ân di sîsenni ǃoa.
65 ǂGaogu ân ai ǃgū-aixūsa ǁgui, îb sa ǀâxareba ǁîn ai hâ re.
66 ǁÎna ǃgôaǃgon ǁaixasib âts ǃnâ, î ǁîna ǃKhūb di ǀhommi ǃnaka hîkākā re.”
© Khoekhoegowab Elobmîs © Bible Society in Namibia, 2020.
