Nikanori di ǀgapiǂâixasib
1 Nikanori ge Judab tsî ǁîb khoegu tsîn Samariab ǀkharib ǃnâ hâ ǃkhaisab ge ǁnâu, o ǁîb di ûiba ǃaoraxasi-i ǃnâ mâi tamaseb Sabbattsēs ai ǁîga ǁnāǂam ǁkhā ti ge mîǁgui. 2 Jodeǁîn hîa ge ǁîb di toroǂnubisa nî saose ǁgarihen ge ǁîba ǁnāti ī ǁgaora tsî ora xū-eb dī tide, xaweb nî hoana ra mû Elob xa ǃgôahe hâ tsî tsēdi hoadi xa ǃanu tsēs ase dīhe hâ tsēsa nî ǃgôa ǃkhaisa ge ǀkhoma. 3 Ob ge Nikanori, ǃhūbaib di kurusaben hoan xa ǃnaka hâ kurusabeba, ǀhommi ǃnâ i ge ǁîn nî Sabbattsēsa ǃgôa ǃkhaisa ge mîmā ǂgaeǂgui-ao-e hâ i ǃkhaisa ge dî. 4 On ge Jodeǁîna “Î, ûitsama ǃKhūb, ǀhommi ǃnâ ra ǂgaeǂguib ge Sabbattsēsa da nî ǃgôa ǃkhaisa ge mîmā” ti ge ǃeream.
5 Ob ge Nikanora “Tita ge ǃhūbaib ai ǂgaeǂgui-ao tsî ra mîmā du, î du sadu ǁâtanina ūkhâi tsî gao-aob ra mî khami dī” ti ge ǃeream. Xaweb ge ǁîb di ora ǀapesa sîsenǂui ǁkhā tama ge i.
Judab ge ǁîb toroǃkhamaoga torob ǃaroma ra aiǂhomi
6 ǁÎb di ǀgapiǂâixasib ǃnâb ge Nikanora ǁîb di dans Judab ǃoagub nî hōs di ǃgôasib ǃaromab ǂâiǂâisensao-e nî kurumâi ti gere koasen. 7 Xawe Judab ge ǀoasa ǂgomǃgâsa ǃKhūb di huib ǃnâ ge ūhâ i 8 tsî ǁnā-amaga ǁîb khoega, khākhoega gu ǃao tidega ge ǁnama. ǁÎb ge mâtib ge Hoaǀgaixaba ǃkharu ge ǁaeb ǃnâ ǁîga hui ǃkhaisa gu nî ǂâihō ǃkhaisa ge hōhōǃnâ gu tsî gu nî nēsis tsîna dansa hō ǃkhaisa ge ǁapoǁapo. 9 ǁÎb ge ǁîgab ge ǂhanub tsî Kēbo-aoga xu khomaibas ǀkha ǁîgu di ǂgomsa ge ǀasaǀasa tsî ǁîga ǀnai gu ge dan hâ i torogu xa ge ǂâiǂâiǃnâ. 10 Toro-aogu âb ge torob ǃaroma ǂhomisa, ob ge ǁîga mîmāde mā tsî ǁkhā ǁaeb ǃnâ Jodeǁî taman ǁîn ǃgaeǀhaoden ǃkhōmâi tama xui-ao ǂgomǃgâhe ǁoa ǃkhaisa ge ǁgauǂui. 11 ǁÎb ge ǁîb hoaraga khoega, ǁkhaukhōdi tsî ǁhâigôagu ǀkhas ose, ǁîb di ǂgaoǂgaoǃnâ ra mîdi ǀkha ge ǁâtani. ǁÎb ge ǁkhāti ǁîga ǁîb ge ǁgamba gu ǁhapos, aiǃnôa-i ǁîgu nî ǂgom ǃnâ i dis ǀkha ge ǂkhîǂkhî.
12 ǁÎb ge ǁîga ai-i Oniab, ǀgapiprister ge ib, kai tsî buruxa khoeb, ǃgamǃgamsens tsî tsamtsiǃnâsib dib, mâǂoa hâ ǃhoa-aob tsî ǂkhamsisa xu mâtib nî îǂhôa ûiba ûi ǃkhaisa ge ǁkhāǁkhāheb di-i xa ge ǁgamba. 13 ǁKhā ǀgaub aib ge Judaba ǃuri ǀûna ūhâ ǃgôaǃgôasa khoeb, khoesi ǃgôasib tsî gao-aosi ǁkhāsiba ūhâba ge mû. 14 Ob ge Oniaba ǃhoatsoatsoa tsî “Nēb ge Elob di kēbo-aob Jeremiab, hîa ǁîb di ǃgâsanna ǀnam tsî ǁaes tsî ǃanu ǃās Jerusalems tsîra kaise ra ǀgorebaba” ti ge mî.
15 Ob Jeremiaba ǁîb di amǀkhāb ǃomma ǀhōǂui tsî Judaba ǃhuniǀuri hoaǀkhāǀāgôaba ge mā tsî nēsa ra dīǃâ, 16 “Nē ǃanu hoaǀkhāǀāgôab ge Eloba xu hâ ǀkhaeba. Ū, î sa khākhoena hîkākā” ti ge mî.
17 Gā-ai mîdi Judab didi ge mâ-i hoa-e ge ǂgaoǂgaoǃnâ tsî ǂkham khoega kai khoegu khami gu nî ǃkham ǃkhaisa ge hōhōǃnâ. ǁÎn di ǃās, ǂgoms tsî Tempeli tsîn ge ǃaorosasib ǃnâ ge hâ i. Jodeǁîgu ge ǁae-e gu ǁore tide ti ǂâi tsî khākhoena ge ǁnāǂam tsî ǁkhoaǂgaose ǃomdi ǀkha gu nî ǁîgu ǀkha ǃkham ǃkhaisa ge mîǁgui. 18 ǁÎgu ge ǁîgu ǃgâsagu, ǃgâsadi tsî khoexakhoen ǃgâ-ai ǃanu Tempeli xa gere ǂâiǂhansen. 19 Tsî khoen Jerusalems ǃnâ ge hâ in ge mâtib torob hîa ǃgarob ǃnâ hâba nî dabasen ǃkhais xa gere ǂâiǂhansen.
Nikanori di danhes tsî ǁōb
20 Mâ khoe-i hoa-i ge tari-i nî toroba dan ǃkhaisa gere mû ǂgao. Khākhoegu di toroǃkhamaogu ge hātoroǃkhamaogu xa hâxōǀkhāhe tsî ǂkhoaga ǃgâi ǃkhaigu ai mâi hâse ge dāǁnâ. 21 Judab Makabaeub ge nē kai toroǂnubis, ǁîgu ge ūhâ i ǃkharagaǃnâgu ǁâtanin tsî ǁaixa ǂkhoagu tsîna ge kō. ǁNās khaoǃgâb ge Judaba ǀhommi ǃoa ǃomkha ǀhōǂui tsî ǃKhūb hîa buruxa dīna ra dīb, dansa ǁnān hîa ǀgaisa toroǂnubisa ūhân ose, ǁnā ǃkhaisa anu hâ-e ra mā ǃkhaisab ǂan xui-ao ǃKhūb ǃoa ge ǀgore. 22 Ob ge Judaba “ǃKhūtse, Hesekiab ge Judab di gao-ao i, ots ge ǀhomǃgāb hîa ge ǀguikaidisi tsî ǁkhaisadisikoroǀaǀoadisi khoegu Sanherib diga nî ǃgamba ge sî. 23 Nēsi ǁkhawa ǀhommi di ǃKhūtse, sa ǃgâi ǀhomǃgāba sî, îb sida khākhoena ǃhurib tsî ǃaob tsîn ǀkha ǀkhū kai. 24 Sa kai ǁkhāsib ǀkha nē ǂkhabadī-aon, hîa satsa ǃkhāǃkhā tsî sa ǃanu ǁaes sats ge ǁhûisa nî ǁnāǂamse go hāna hîkākā re” ti ge mî. ǁNātib ge Judaba ǁîb di ǀgoresa ge ǀamǀam.
25 Nikanori tsî ǁîb di toroǂnubis tsîn ge xâiǁnâdi tsî torotsanadi di ǀōb ǀkha ge dāǁnâ, 26 xawe Judab tsî ǁîb khoegu tsîn ge Eloba huib ǃaroma ra ǂgaiǀîse torob ǃnâ ge ǂgâ. 27 ǁÎgu ǃomgu ǀkha ra ǃkham tsî ǂgaogu ǃnâ ra ǀgorese gu ge Jodeǁîga ǃnonadisikoroǀaǀoadisis xa ǃnāsa khākhoega ge ǃgam. ǁÎgu ge nē huib hîa gu ge ǃkhōǃoab ǃaroma Eloba kaise ge gangan. 28 Torob ge toa, o gu dans ǃaroma kai ǃgâiaǂgaob ǀkha oagaru, hîa gu ge Nikanori ǀoasa torosarab ǃnâ ǁōǁgoe ǃkhaisa ge mû. 29 O gu ge ǃgari dommi ǀkha ǁîgu ǁgûsi gowab ǃnâ ǃKhūba ge koa.
30 Judab Makabaeub hîa ǂgaob tsî ǂâis ǀkha ǁîb khoena gere ǁkhaubab tsî ǂkhamsisa xu ǁîb khoena ǀnam ib ge ǁîb khoega Nikanori di danas tsî amǀkhāb ǁôab tsîna gu ǃgaoǁnâ tsî Jerusalems ǃoa nî ǃgû-ū ǃkhaisa ge mîmā. 31 ǃĀs ǃnâ gu ge sī, ob ge hoaraga khoena ǂgaiǀhao, pristerga altars aiǃâ mâ kai tsî ǁkhui-ommi ǃnâ ge hâ i khoega ge ǂgai kai. 32 ǁÎb ge ǁîna ǂūǁoa Nikanori di danas tsî nē ǂkhaba khoeb di ǁôab, ǃanu Tempeli Hoaǀgaixa Elob dib ǃoagub gere ǀhōǂuib tsîna ge ǁgau. 33 ǁNās khaoǃgâb ge nē eloxoresa aob di namma ǃgaoǂui tsî ǃârodi ǃnâb nî ǀhomanina ǂûmā tsîb danasa Tempeli ǃoa-ai, ǁîb di gâsib ge tare-e ǃaromaba bi ǃkhaisa nî ǁgauǂuise ǂgāmâi ti ge mîmâi. 34 Mâ khoe-i hoa-i ge ǀhommi ǃoa kōǃapa tsî ǃKhūb ǁîb ǀgaiba ǂhaiǂhai tsî ge ǁîb Tempeli nî ǃanuoǃnâ kaihe ǃkhaisa ǁkhaeba ge koa. 35 Judab ge mâ-i hoa-i nî ǃgāsa ǁgauǁgaus ǃKhūb huib disa mûse, Nikanori danasa ǁkhui-ommi di ǂnubiǂgoab ai ge ǂgāmâi. 36 ǀGuiǂâixase i ge nētsēs tātsēs tsîna ǀuruhe tide tsî mâ kurib hoaba Mordekaib Tsēs aiǃâ nî ǁâudīhe ǃkhaisa ge mîǀguihe. Nēs ge disiǃnonaǀaǁî tsēs, disiǀgamǀaǁî ǁkhâb Aramiagowab ǃnâ Adar ti ra ǀonǂgaiheb disa.
ǀUni mîdi
37 Nēs ge hoa xūn ge Nikanori ǀkha hā ǀgausa. Jerusalems ge ǁnā ǁaeba xu Hebreǁîn di ǂgaeǂguis ǃnaka hâ tsî ta ge ti ǂhôasa nēpa nî ǀamǀam. 38 ǃGâise tsî ǂhanuses ga xoasa, o ta ge ra gangan. Tsî ǂkhabusases ga xoasa tsî khoena ǃgâiba tama i, xawe ta ge dī ǁkhā ta a-e ge dī. 39 ǂAuxûi-i tamas ka io ǁgam-i ǀgui-e ās a ǂuruoǃnâ ǃkhaisa da ge a ǂan, xawe ǂauxûi-i ǁgam-i ǀkha habahe hâ i ge ǃgâi ǁkhoaxa ā-e ra dī. ǁNā ǁkhās khami i ge ǁkhāsib ǀkha xoahe hâ ǂhôa-e, khomai rana ǁkhoaxaba. Nēs ǀkha ta ge ra ǀamǀam.
© Khoekhoegowab Elobmîs © Bible Society in Namibia, 2020.
