Gao-aob Hiskiab ge ǃgom ǀaesenni khaoǃgâ ǁkhawa ra ǂgau
(Jesaja 38:1-8, Jesaja 21-222 Kroniks 32:24-26)1 ǁNā ǁaeb ǃnâb ge Hiskiaba ǁō ǁgab ges kōse ge ǀaesen. Ob ge Amob ôab kēbo-aob Jesajaba ǁîb tawa sī tsî ge mî: “ǃKhūb ge ra mîba tsi, îts hoa xūna ǂhomisase ūhâ, ǂgauts tide tsîts nî ǁō xuige.” 2 Ob ge Hiskiaba ais âba ǂnubiǂgoab ǁga ǃoa kai tsî ge ǀgore: 3 “ǃKhūtse ǂâi re satsa ǂgomǂgomsa tsî ǀguiǂâixase ǃoaba tsî ta hoaǁae satsa a ǃgâibana gere dīs xa.” Tsîb ge tsûsase ge ā.
4 Jesajab ge gao-aoba xu ge ǃgû, xaweb ge gao-ommi omǂnamib tsînab ǃkharu tama hîa ǃKhūba ǁîba ge mîba, 5 îb Hiskiab, ǃKhūb ǁaes di ǂgaeǂgui-aob ǁga oa tsî ǁîba sī mîba: “Tita ǃKhūta, sa aboxab Davidi di Elota ge sa ǀgoresa ǁnâu tsî sa ǁgamrona go mû. Tita ge nî ǂgauǂgau tsi tsîts ge ǃnona tsēdi ǃnâ Tempeli ǁga nî ǃgû. 6 Tita ge disikoroǀa ûikuriga nî ǀaroba tsi; tsî ta ge sats tsî nē ǃās Jerusalems tsîna Siriab gao-aoba xu nî huiǂui. Tita ge ti ǃgôasib ǃaroma tsî ti ǃgāb Davida ta ge mîmâiba mîmâis ǃaroma nē ǃāsa nî ǁkhauba.”
7 Ob ge Jesajaba gao-aob sîsenaoga ge mîba, î gu ǀnomanaru-e ū tsî gao-aob ǀhapis ai ǂnûi, ob ge ge ǂgau. 8 Ob ge Hiskiaba ge dî: “Mâsa ǁgauǁgaus ǃKhūb nî ǂgauǂgau te tsî ta ǃnona tsēdi khaoǃgâ Tempeli ǁga nî ǃgû ǁkhās disa?”
9 Ob ge Jesajaba ge ǃeream: “ǃKhūb ge ǁîb mîmâisab nî dīǀoaǀoa ǃkhais di ǁgauǁgausa nî mā tsi. Sommi dā-aiǃharodi ai aisǀkhāb ǁga disi ǃharode tamas ka io khaosǀkhāb ǁga disi ǃharode nî ǃgûsats ra ǂgao?”
10 Ob ge Hiskiaba ge mî: “Somma aisǀkhāb ǁga disi ǃharode ǃgû kais ge a supu. ǁÎba disi ǃharode khaosǀkhāb ǁga oa kai re.”
11 Jesajab ge ǃKhūb ǃoa ge ǀgore, tsîb ge ǃKhūba somma disi ǃharode ge oa kai, gao-aob Axasi ge dī hâ i dā-aiǃharodi ai.
Babilonsa xu hâ sîsabegu
(Jesaja 39:1-8)12 ǁNā ǁaeb ǃnâb ge Babilons gao-aob Merodax Baladanni, Baladanni ôaba gao-aob Hiskiab ǀaesen hâ ǃkhaisab ge ǁnâuo, ǁîba sîǂkhanidi tsî ǀkhaexū-i tsîna ge sîba. 13 Ob ge Hiskiaba sîsabega ǁkhoreǁhare tsî ǁîb di ǃkhūsiba ge ǁgau; ǁîb di ǀhaiǀurib tsî ǃhuniǀurib, ǁîb di ǂûǁkhoaǁkhoa-ūxūn tsî ǃgâihamxūn tsî ǁîb di ǁâtanin hoana. ǁÎb di sâuǃnâ-omgu tsî ǁîb di gaosib hoab ǃnâ i ge ǀgui xū-i tsîna ge hâ tama hâ i, ǁîgab ge ǁgau tama hâ i-e. 14 Kēbo-aob Jesajab ge Hiskiab tawa sī tsî ge dî: “Nē khoega mâpa xu gu ra hā tsî tare-e gu mîba tsi?”
Ob ge Hiskiaba ge ǃeream: “ǁÎgu ge ǃnūseba xu, Babiloniaba xu ge hā.”
15 “Tarena gu go ǁîga sa gao-ommi ǃnâ mû?” tib ge Jesajaba a dî, ob ge Hiskiaba ge ǃeream: “ǁÎgu ge hoaraga xūna go mû. ǀGui xū-i tsîn ge sâuǃnâ-omgu ǃnâ hâ tama hâ, ǁîga ta ǁgau tama-e.”
16 Ob ge Jesajaba gao-aob ǃoa ge mî: “ǃKhūb Hoaǀgaixab ge ra mî 17 ǁaeb ǃgoaxasa, sa gao-ommi ǃnâ hâ xūn hoaragan, sa aboxagu ge nēs kōse ǀhaoǀhao hâ in hoaragan Babiloniab ǁga nî ǃgû-ūheba. ǀGui xū-i tsîn ge ǃgau tide. 18 ǀNîn sa ôananôagub din tsîn ge ǃgû-ūhe tsî Babiloniab gao-aob di gao-ommi ǃnâ sī nî ǃgādīhe.”
19 Gao-aob Hiskiab ge nē ǃkhais, ǂkhîb tsî ǃnorasasib ǁîb ûiǁaeb ǃnâ nî hâ ti ra ǂâibasense ǁnâuǃā tsî Jesajab ǃoa ge mî: “ǃKhūb di ǂhôas hîats go mîba tes ge a ǃgâi.”
Hiskiab di ǁōb
(2 Kroniks 32:32-33)20 Gao-aob Hiskiab ge dī xūn hoan, ǁîb ǁkhoaǂgaoxa dīgu, ǁgamǁkhaeb tsî ǁgammi dâuǃkhaib, ǁgam-e ǃās ǃnâ ǂgâ-ūs ǃaromab ge kurukha tsîn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 21 Hiskiab ge ge ǁō tsîb ge ǁîb ôab Manaseba ǁîb soas ǃnâ ge gao-ao kai.
© Khoekhoegowab Elobmîs © Bible Society in Namibia, 2020.
