1 Ob ge Elisaba ge mî: “Tare-eb ǃKhūba ra mîba tsisa ǃgâ re. Nē ǁaeb ǁkhāb ai du ge ǁari, Samarias ǃnâ ǃnona kiloxramgu mel-i tamas ka io ǃnani kiloxramgu ǃhoro-e, disiǀguiǀa kiloxramgu ǀhaiǀurib ai nî ǁama.”
2 Ob ge gao-aob di ǂhunuma ǃgāba Elisab ǃoa ge mî: “ǃKhūb ga ǀhommi di mûǂuidaode ǁkhowa-am tsî nēsi ǀapi kai, xawes tsînas ge ǁnāsa ī ǁkhā tide.”
“Aitsamats nî mû, xawets ge ǁnā ǂûn xa ǂû tide” tib ge Elisaba ge ǃeream.
Siriab toroǃkhamaogu ge ra ǁhâ
3 Haka ǃomamaxa khoegu, ǃās di dao-ams tawa ge hâ i gu ge ge mîǀîgu: “Tare-i ǃaroma ge ǁō ge nîs kōse nēpa nî hâ? 4 ǃĀs ǃnâ ǂgâs tsîn ge xū-e hui ge tide, ǁnāpas tsîna ge ǃâs xa nî ǁō xui-ao. Nēpa ge ga hâs tsîna ge ge nî ǁō. A ge Siriaǁîgu di hâǃkhaib ǁga ǃgû; ǀnîsi gu ge nî ǃgam ge tamas ka io, sage ûiba nî sâu.” 5 ǃKhaeǃgû i ra hîa gu ge ǁîga Siriaǁîgu di hâǃkhaib ǁga ge ǂoa, xawe i ge sī gu geo, khoe-i xare-e ge ǀkhai i. 6 ǃKhūb ge Siriaǁîga kai toroǂnubis, hān tsî torokunidi ǀkha ra ǀkhīs di ǀō-e hâǃkhais ǃnâ ge ǁnâu kai. Tsî gu ge Israeli gao-aob ge Hetǁî tsî Egipteǁî gao-aogu tsî toroǃkhamaoga a ǃgae, ǁîga gu nî ǁnāǂamse ti ge ǂâi. 7 Tsî gu ge ǁnā ǃoe, ǁîgu tentdi, hān, dâukin tsî ǁîgu hâǃkhaib hoab tsîna ǁnāti ǁnāxū tsî ge ǁhâ.
8 Nē haka khoegu ge hâǃkhaib ǀgūse gu ge sī, o tents ǃnâ ǂgâ, ǂû tsî ā; tsî ǀhaiǀurib, ǃhuniǀurib tsî saran tsîna ǁnāpa xu ū tsî sī ge sâu. ǁNās khaoǃgâ gu ge ǀnî tents ǃnâ ǂgâ tsî ǁkhās ǁkhāsa ge dī. 9 Xawe gu ge ǁîgu ǃnâ ge mîǀîgu: “Sage ge ǂhanu tamase ra dī. Nē-i ge ǃgâi ǂhôa-e, tsî ge ge ǁî-e sage ǃnâ ǀgui a ūhâ ǁoa. ǁGoas kōse ge ga ǂanǂan tamase hâ, o ge ge nî ǀhapixa xuige a ge nēsi ǃgû tsî gao-aob ǂamkhoega sī mîba.” 10 Tsî gu ge Samarias ǁga oa tsî ǃās di ǃûi-aogu ǁga ge ǃhao: “Siriaǁîgu di hâǃkhaib tawa ge go sī hâ i, xawe ge ge khoe-i xare-e mû tamas ka io ǁnâu tama go i. Hān tsî dâukin tsîn ge noxopa ǃgaemâisase mâ tsî tentdi tsîn ge ǁnāti ǀgui a ǁnāxūmâisa.”
11 ǃÛi-aogu ge nē ǃkhaisa ge ǂhôa tsîs ge gao-ommi tsîn ǃnâ ge ǂanǂanhe. 12 Gao-aob ge ǁnā tsuxuba khâimâ tsî ǂamkhoegu âb ǃoa ge mî: “Tare-e gu Siriaǁîga ra ǀapeǀape ǃkhaisa ta ge nî mîba go. ǁÎgu ge nēpa da ǃâtsūǀkhāb ǃnâ hâsa a ǂan, ǁnā-amaga gu ge hâǃkhaiba xu ǂoa tsî ǃaub ǃnâ sī go gaugausen, î gu ǂûna da ga ôaǂoao, sada ûitsamase ǃkhō tsî ǃās tsîna ū.”
13 Ob ge ǂamkhoegu di ǀguiba ge mî: “Nē ǃās ǃnâ ǃgau hâ khoen ge naun hîa ge ǀnai a ǁōn ǁkhān khami ǀgui nî hābahe, xuige koro khoega ǃgau hâ hān ǀkha sî, î da tare-i nî īsa mû.” 14 On ge ǀnî khoega ǀgam torokunira ǀkha sî tsî ge mîmā, î gu tare-i go Siriaǁîn toroǂnubis ǀkha ī ǃkhaisa sī ǂanǂui. 15 ǁÎgu ge Siriaǁîga Jordanni kōse ge saoǃgon. Hoaraga daob ain ge Siriaǁîgu ge ǃnoesasib âgu ǃnâ aoxū saran tsî xūn tsîna ge ǁgoe i. O gu ge sîsabega oa tsî gao-aoba sī ge ǂanǂan. 16 On ge Samarias di khoena ǃāsa xu ǂoa tsî Siriaǁîgu hâǃkhaiba xu sī ge ǁkhâuǁnâbasen. Tsî i ge ǃKhūb ge mî hâ i khami, ǃnona kiloxramgu mel-i tamas ka io ǃnani kiloxramgu ǃhoro-e, disiǀguiǀa kiloxramgu ǀhaiǀurib ai gere ǁamaxūhe.
17 Gao-aob ge ǁîb di ǂhunuma ǃgāba ǃās di dao-amsa ge ǃûi kai, xaweb ge ǁîba khoen xa ǁnāpa ge dāǃanhe, Elisab ge gao-aob ge ǁîb tawa sīo, ǁîb ǃoa mî hâ i khami. 18 Elisab ge gao-aoba a mîba, ǁnā ǁaeb sao ra tsēs dib ai i ǃnona kiloxramgu mel-i tamas ka io ǃnani kiloxramgu ǃhoro-e, disiǀguiǀa kiloxramgu ǀhaiǀuriba Samarias ǃnâ nî ǂgansa, 19 ob kom ǂamkhoeba ge ǃereamo: “ǃKhūb ga ǀhommi di mûǂuidaode ǁkhowa-am tsî ǀapi kai, xawes tsînas ge ǁnāsa ī ǁkhā tide.” Ob kom Elisaba ge mîo: “Aitsamats nî mû, xawets ge ǁnā ǂûn xa ǂû tide.” 20 Nēs ge ǁîb ǀkha ge ī. ǁÎb ge ǃās di ǂgâ-ams tawa khoen xa ge dāǃanhe.
© Khoekhoegowab Elobmîs © Bible Society in Namibia, 2020.
