Ptolemib ge Siriaba ra ǁnāǂam
1 Egipteb di gao-aob Ptolemib ǃNaniǁîb ge huri-ammi di ǃhūb khami ǂgui toroǃkhamaogu di toroǂnubis tsî ǁkhāti ǂgui doe-omgu tsîna ge ǀhaoǀhaobasen. ǁÎb ge Aleksanderi di gaosiba ǀhôagaose ūbasen tsî ǁîb di gaosib tawa gere ǀaro ǂgao. 2 ǁNā-amagab ge ǂkhîb di mîdi ǀkha Siriab ǃoa ge ǃgû tsîn ge ǁanǂgāsabenna dao-amde ǁkhowa-amba tsî ge ǁkhoreǁhare bi. Gao-aob Aleksanderi ge ǁîna, Ptolemib ge ǁîb di ǀuiǁgû-i xui-aon nî nēsa dī ǃkhaisa ge mîmā. 3 Xaweb ge Ptolemiba ǀapasǀkhāb ǃnâb garu khami, mâ ǃās hoas ǃnâ toroǃkhamaoga gere hâ kai. 4 Asotus tawab ge sī, on ge khoena ǂhubiǁnâhe hâ tempeli, Dagonni dib, ǃās tsî ǂnamipe ǁgoe ǃādi hîkākāhe hâ ǀgaub tsîna ge ǁgau bi. ǁNāpa di ge ǁō hâ khoegu di sorode, mâ ǃkhai-i hoa-i ai ge ǁgoe i. Jonatanni ge torob ǃnâ ǂhubiǂui khoegu di sorodi ge Ptolemib daob amǃgâ ge ǀhaoǀhaoǁguihe hâ i. 5 Khoen ge tare-eb ge Jonatanna dī ǃkhaisa, ǁîbab nî ǀhapimāga ge mîba bi, xaweb ge xū-i xare-e khom tama ge i. 6 Jonatanni ge gao-aoba Jopas tawa kai ǂkhaisib ǀkha ge ǀhao-ū, tsî kha ge tawedegu tsî ǁnā tsuxuba ǁnāpa ge hâ. 7 Jonatanni ge Jerusalems ǃoab nî oas aiǃâ ǁîba Eleuteruǃāb kōse ge ǃgûǀkhā. 8 Nē ǀgaub aib ge gao-aob Ptolemiba ǂkhaba ǀapedi Aleksanderi ǃoagub ge ūhâ idi ǃnâ-u huri-ammi tawa Seleusias di ǀapas kōse ǁgoe ǃādi hoade ge ūbasen.
9 ǁNāpa xub ge Ptolemiba gao-aob Demetriuba nēti ge haisiba: “Akhom ǃgaeǀhao-e dī. Ti ôas ge nēsi a Aleksanderi di tara, xawe ta ge ǁîsa ū-oa tsî satsa nî mā tsîts ge sa îb di gaosiba nî ǂgaeǂgui. 10 Tita ge Aleksandera ta ge ǁîsa mā ǃkhais xa kaise ra ǃhausen, ǁîb gere tita ǃgam ǂgao amaga.” 11 Ptolemib ge nē ǀhapimāsa Aleksanderi ǃoagu, ǁîb gere Aleksanderi gaosiba ǂgao xui-ao ge dī. 12 ǁÎb ge ǁîb ôasa Aleksandera xu ū-oa tsî Demetriuba ge mā. ǁÎb ge Aleksanderi ǀkhab ge ūhâ i khoexagusiba ge khôa tsî kha ge ǂhaisase ge khākhoebagu. 13 Tsîb ge Ptolemiba Antioxs ǃnâ ǂgâ tsî Siriab kronsa aitsama ge ūbasen tsî ǁnā ǀgaub ai Egipteb tsî Siriab tsîkha di kronra hoara ge ūhâ i.
14 Gao-aob Aleksanderi ge ǁnā ǀkharib di khoen gere khâikhâisen xui-ao, ǁnā ǁaeb ǃnâ Silisiab ǃnâ ge hâ i. 15 Xaweb ge Ptolemib ge dī xūnab ge ǁnâu, o ǁîb ǃoagu nî torodīse ge dāǁnâ. Ptolemib ge kai toroǂnubis ǀkha ǂoa tsî Aleksandera ǀhao-ū tsî hoaragase ge dan bi. 16 Tsî Aleksanderi ge ǁkhaubaheb nîga Arabiab ǃoa ǃkhoeni, ob ge gao-aob Ptolemiba ǃaruǀî ǀgui ge ǀgai. 17 Xaweb ge Sabdiel ti ǀon hâ Arabiaǁîba, Aleksanderi danasa ǁhāǁnâ tsî Ptolemiba ge sîba. 18 ǀGam tsēra ǁnās khaoǃgâb ge gao-aob Ptolemib tsîna ge ǁō tsî gu ge ǁîb di toroǃkhamaogu hîab ge ǀgaisa hâǃkhaigu ǃnâ ǁnāxū hâ iga ǁanǂgāsaben xa ge ǃgamhe. 19 ǀGuikaidisi tsî ǃnanidisihûǀaǁî kurib ǃnâb ge Demetriub ǀGamǁîba ge gao-ao kai.
Jonatanni tsî Demetriub ǀGamǁîb hâkha di ǃgaeǀhaos
20 ǁNā ǁaeb ǃnâb ge Jonatanna, Judeab di khoegu hoaga Jerusalems di ǁkhui-omma nî ǁnāǂamse ge ǀhaoǀhao. ǁÎgu ge ǁnāǂams ǃaroma ǂgui ǁnāǂamūxūn torob dina ge kuru. 21 Xawen ge eloxoresa Jodeǁîn hîa ǁîn di ǂhunuma ǁaesa ǃhuisana, gao-aob Demetriub ǀGamǁîb ǃoa ǃgû tsî Jonatanni Jerusalems di ǁkhui-omma xāǂgā hâ ǃkhaisa sī ge mîba. 22 Demetriub ge nēsab ge ǁnâu, o kaise ǁaixa tsî ǃnoesase Ptolemais ǃoa ge ǃgû. ǁÎb ge Jonatanna ǁkhui-omma xāǂgāsa ǀû tsîb ǃhoaǁares ǃaromab ǁîb ǀkha ǃhaese Ptolemais ǃnâ nî ǀhao ti ge xoaba.
23 Jonatanni ge nē ǂhôasab ge ǃkhōǃoa, o nē xāǂgās nî aiǃgû ǃkhaisa ge mîmā, tsîb ge ǀnî Jodeǁî ǂgaeǂgui-aogu tsî pristerga ǁîb ǀkha nî ǃgûse ge ǁhûi tsî ǁî-aitsama ûib âba ǃaorosasib ǃnâ ge mâi. 24 ǁÎb ge anaǂamsarab, ǀhaiǀurib tsî ǃhuniǀurib tsî ǀnî ǀkhaexūn tsîna ū tsî gao-aob ǁga Ptolemais ǃoa ge ǃgû. ǁNā ǀgaub aib ge gao-aob tawa ge ǃgâiǃgâibasen. 25 Jonatanni ǃoagun ge ǀnî ǂhanuo eloxoresa khoen, ǁîb ǂhunuma ǁaes dina ǀanaǃgâde dī, 26 xaweb ge gao-aoba ǁîb saoǃgonaogu ge dī hâ is ǁkhās khami ǁîb ǀkha ge sîsen. ǁÎb ge Jonatanni di hoaraga ǀapemā-aogu tsîn mâ ra mû, hîa ǁîba ǃgôasiba mā 27 tsî ǀgapipristersisa ǁapoǁapo, aibekam ǃgôasiga ǀasa kai tsî ǁîba hoa ǃharodi xa ǀgapi ǃharos “Gao-aob di ǀHōsagu” dis ǃnâ ge ǁgaumâi.
28 Jonatanni ge Judeab ǀkharib tsî Samariab di ǃnona ǀkharigu nî gao-aob xa ǁgui-aimarisa xu ǃnora kaihe ǃkhaisa ge ǂgan. Tsîb ge ǁnātib ga gao-aoba dī, ob nî gao-aoba disiǀoadisi kiloxramgu di ǀhaiǀuriba matare ti ge mîmâi. 29 Gao-aob ge ǁnās ǀkha ǂkhîǂâixa tsî nēs ǂama sîǂkhani-e Jonatanna ge xoaba.
30 “Gao-aob Demetriuba xu ǁîb ǃgâsab Jonatanni tsî Jodeǁîn ǃoa; tawedes.
31 “Sa ǂans ǃnaka ta ge sats xa ta xoa hâ sîǂkhanis di xoaǁnâba ǀaokhoeb Lasteneba ra sîba:
32 “ ‘Gao-aob Demetriuba xu ǀaokhoeb Lasteneb ǃoa; tawedes. 33 Tita ge Jodeǁîna ǁîn ge sida ǀkhan ge dī ǃgaeǀhaosa ǃkhōǀgaipe tsî ǁîn di ǁguiǂamde dīǀoaǀoa amaga, ǁîn ge dī ǃgâi xūn ǃaroma nî ǃgâidī. 34 Tsî ta ge Judeab tsî ǃnona ǀkharigu Efraimmi, Lidab tsî Arimateab digu, hîa Samariaba xu Judeab kōse ǁgoegu tsî hoa ǃhūgu nē ǃhūkha diga ǁîn di ǂhanuga ra ǁapoǁapoba. Hoan ǁguibade Jerusalems ǃnâ ra ǁguibana ta ge gaosi ǁgui-aimarin, gao-aob ra kurikorobe ǃhanaǂûn tsî haiǂûna xu ǃkhōǃoana xu ǃnoraǃnora tsî ǁîna Tempela nî mā. 35 Tita ge ǁkhāti mataredi ǁgui-aimarin, disiǁîǃâs, daob ǃgâunadi di ǁgui-aimarin, ǂō-i ǁgui-aimarin tsî ǀō-aisa ǁgui-aimarina xus tsîna ǁîna nî ǃnoraǃnora. 36 Tsî ǀgui xū-i nēn di-i hîa nē sîǂkhanis ǃnâ mîhe hâ-i tsîn ge ǃgoaxaǁaeb ǃnâ ǂgae-oahe tide.
37 “ ‘ǀOasa xoaǁnâb nē mîmās diba dī tsî du nî Jonatanna mā, îb ǁîba ǂanǂansa ǃkhaib ǃanu ǃhommi dib ai mâi ǃkhaisa du ge ra ǂgaoǀkhāhe.’ ”
Jonatanni ge Demetriub ǀGamǁîba ra hui
38 Tsî gao-aob Demetriub ge ǁîb ǂgaeǂguis ǃnakab ǂkhîba ǃhūb ǃnâ hâ tsî i ǃaruǀî mâǃoa-e a ǀkhai ǃkhaisab ge mû, o hoaraga toroǃkhamaoga ǁgâudi ǃoa ge sîǁaru tsî Grikeǃhūba xub ge ǀkhupi hâ i toroǃkhamaogu ǀguiga ge hâ-oa kai. Nēs ge ǁîb îgu ǃnaka gere ǃoaba toroǃkhamaogu hoaga, ǁîgu di hōǂgāsa gu ge ǂoaǃnâ xui-ao ge ǂkhîoǃnâ kai. 39 Ob ge Aleksanderi di mâxōǀkhā-aogu di ǀguib, Trifob ti ge ǀon hâ iba, Demetriub di hoaraga toroǃkhamaogu ra ǃgae ǃkhaisab ge mûo, Arabiaǁîb Imalkueb, hîa ge Aleksanderi di ǂkham ǀgôab, Antioxub di kaikai-ao ib ǃoa ge ǃgû. 40 Trifob ge ǁnāpa gaxuse hâ tsî Imalkueb nî ǀgôaba, ǁgûb soas ǃnâb nî gao-aose mâi biga mā bi ǃkhaisa gere ǁgari. ǁÎb ge ǁkhāti Imalkueba, Demetriub ge dī hâ i mîmādi tsî mâti gu ge toroǃkhamaoga ǁîba ǃhui ǃkhais tsîna ge mîba.
41 Jonatanni ge gao-aob Demetriuba ge haisiba, îb ǁîb di toroǃkhamaoga Jerusalems di ǁkhui-ommi tsî Judeab di ǀgaisa hâǃkhaiga xu ūbē, ǁîn ra Jodeǁîna hoaǁae ǃkhamū xui-ao. 42 Ob ge Demetriuba ge ǃeream: “Sa ǂgansa ta ge nî dī. Tsî īǁkhāsib ga hâ, o ta ge sats tsî sa ǁaes tsîna ǀgapi ǃgôasiba nî mā. 43 Xawe nēsi ti toroǃkhamaogu ti ǀkha ǁaixa hâ, xuige sa toroǃkhamaoga sîba te, î gu ǃkhamhui te.”
44 Jonatanni ge ǃnonaǀoadisi ǁkhāǁkhāsa toroǃkhamaoga Antioxs ǃoa ge sî tsî ǁîb tawa gu ge hā, ob ge gao-aoba ge ǃgâiaǂgao. 45 O gu ge ǀguikaidisiǀgamdisiǀoadisi khoega gao-aoba nî ǃgamse ǃās ǃnâ ge ǀhao. 46 Xaweb ge gao-aoba gao-ommi ǃnâ ge ǃkhoeniǂgâ. Khoegu ge ǃās di ǃgangu ǃnâ ǀhao tsî ge ǃkhamtsoatsoa. 47 Ob ge gao-aoba Jodeǁî toroǃkhamaoga huiheb nîga ge ǂgai, tsî gu ge hoatsama ǁîba nî huise ǁnāǀî ge ǃnoeǃnoesen. ǁÎgu ge hoaraga ǃāsa ǃgûǃnâǃganu tsî ǁaubexa ǀguikaidisiǀoadisi khoena ge ǃgam. 48 ǁÎgu ge gao-aob di ûiba ge sâu, xawe gu ge ǃāsa ǁkhâuǁnâǃnâ tsî ge khauǃkhū. 49 Tsî khoen ge Jodeǁîn ge hoaraga ǃāsa gaoǂam ǃkhaisan ge mû, o ǁkhoaǂgaosiba ǂoaǃnâ tsî gao-aoba ge ǀkhoma, 50 îb ǂkhîba dī tsî Jodeǁîna, ǁîn tsî ǁîn ǃāsa ǁnāǂamsa ǂkhā. 51 Nēs ǀkha gu ge ǁâtanina aoǁgui tsî ǂkhîba ge dī. ǁNā ǀgaub ain ge Jodeǁîna gao-aob tsî hoaraga khoen ǁîb gaosib ǃnâ hâna xu ǃgôasiba ge ǃkhōǃoa tsî ǂgui xūn ǁkhâuǁnân gen ǀkha Jerusalems ǃoa ge oa. 52 Demetriub ge gao-aose ǁîb gao-aosi trons ai ge ǂnû tsîb ge ǃhūba ǂkhîb ǃnâ ǁîb ǂgaeǂguis ǃnaka ge hâ i, 53 xaweb ge ǁîba, ǁîb di mîmâidi hoade khôa tsî Jonatanni ǃoagu ge dabaǂnûisen. ǁÎb ge Jonatanna ǁîb di îǂhôa ǃoabas ǃaroma mādawas ǃās ǃnâ, ǁîba ǁgâiǀās ǀkha ge aiǃgû.
Jonatanni ge Antioxub ǃNaniǁîba ra mâxōǀkhā
54 ǁAe-i ǃkharu hâseb ge Trifoba ǂkham ǀgôab Antioxub ǀkha oahā tsî ǁîba gao-aosi kronsa ge ǀgapa. 55 Hoaraga toroǃkhamaogu, Demetriub ge ǃgû kai hâ igu ge ǂkham gao-aoba nî ǂkhâǃnâse ge oahā. ǁÎgu ge Demetriub ǃoagu ǃkham tsî ge dan bi, tsîb ge ge ǃkhoeni. 56 Trifob ge ǂkhoaga ǃkhō tsî Antioxsa dan tsî ge ūbasen. 57 ǂKham gao-aob Antioxub ge Jonatanni ǃoa xoa tsî ǁîba ǀgapipristersis tsî haka ǀkharigu di ǂgaeǂguis ǃnâ ǁapoǁapo tsî “Gao-aob di ǀHōsab” ti hâ ǂgaiǂamsa ge mā bi. 58 ǁÎb ge ǁîba ǃhuniǀuri ǃoreb tsî tāb di ǂûǃnâxapan tsîna ge sîba, tsîb ge ǁîba ǃhuniǀuri āǃnâxapaga xu ā, ǂhoaǀapa anaǂamsaraba ana tsîb ǃhuniǀuri ǃgaesenna ǃhōs ai nî ǁgui ǃkhaisa ge mā-am. 59 ǁKhātib ge Jonatanni di ǃgâsab, Simonna Fenisiab di huri-amma xu Egipteb di ǃhūǀgoras kōse hâ ǀkharib di gowoniase ge ǁgaumâi.
60 Jonatanni ge ǁîb di toroǂnubis ǀkha Kai Siriab di ǃādi ǃnâ-ū ge ǃkharu tsî gu ge Siriab di toroǃkhamaogu hoaga ǁîb tawa ge ǀarosen. ǁÎb ge ǁnāpa xu Askelons ǃoa ge ǃgû tsî ǁnāpa khoen xa ǁkhoreǁharehe tsî kai ǃgôasib ǀkha ǃkhōǃoahe. 61 ǁNāpa xub ge Gasas ǃoa ge ǃgû, xawen ge Gasas di khoena ge ǂganamǂui bi. ǁÎb ge ǃāsa xāǂgā, ǂhubiǁnâ tsî ǁîs ǂnamipe hâ ǃkhaigu ǃnâ ge hâ i xūna ge ǁkhâuǁnâ. 62 Gasas khoen ge ǂkhîba ge ǂgan tsîb ge Jonatanna ǁîn ǀkha ǂkhîba ge dī. ǁÎb ge ǂgaeǂgui-aogu di ôaga ǃkhōsabese ū tsî Jerusalems ǃoa ge sî. Tsîb ge ǁnāpa xu ǃaruǀî Damaskus kōse ge ǃkharu.
63 Jonatanni ge Demetriub di ǂamkhoegu ge kai toroǂnubis ǀkha Kades, Galileab ǃnâ ǂnôas tawa, ǁîba nî ǁîb ǃharosa xu ūǁnâse hā ǃkhaisa ge ǁnâu. 64 Ob ge ǃgâsab Simonna Judeab ǃnâ ǁnāxū tsî Demetriub toroǃkhamaogu ǃoagu nî torodīse ge ǂoa. 65 Simonni ge Betsursa xāǂgā tsî ǁîs ǃoagu gaxuse ge ǃkham. 66 Khoen ge ǂkhîbagusa ge ǂgan tsîb ge Simonna ǁnāsa ge ūǃoa. ǁÎb ge ǃāsa ūbasen, ǁîna sauruǂui tsî toroǃkhamaoga ǁnāpa ge hâ kai.
67 Jonatanni tsî ǁîb di toroǂnubis ge Galileahurirob tawa hâǃkhaiba ge ǂnaumâi. Sao ra ǃnauǁgoagab ge ǁîb di toroǂnubis ǀkha Hasorǂgāb ǃoa ge ǃgû, 68 tsîs ge ǁnāpa ǃhaokhoegu di toroǂnubisa ǁîb ǀkha ge ǀhao. ǁÎgu ge Jonatanni a ǀūse gu nî ǁîba ǃhomgu ǃnâ ǁgoe-amse, toroǃkhamaoga ǁnāpa ge ǁnāxū hâ i. 69 Tsî ǁîba ge ǁgoe-am hâ i toroǃkhamaogu ge ǂoaxa tsî ǁnāǂam, 70 os ge Jonatanni di hoaraga toroǂnubisa dabasen tsî ge ǃkhoeni. Absalommi ôab Matatiab tsî Kalfib ôab Judab hâkha hîa ge ǂgaeǂgui-ao i kha oseb ge ǀguib tsîna ǃgau tama ge i. 71 Jonatanni ge saran âba doaǃā, tsaraba ǁîb danas ai tsoro tsî ge ǀgore. 72 ǁNās khaoǃgâb ge khākhoegu ǃoagu sī ǃkham tsî ge dan tsî gu ge ǀgaruǀgaruhe hâse ge ǃkhoeni. 73 ǁÎb di toroǃkhamaogu hîa ge ǃkhoeni hâ igu ge nēsa gu ge mû, o dabasen tsî ǁîb ǀkha ǀhao tsî khākhoega ǁîgu di hâǃkhaib, Kades tawa ge hâ ib kōse ǃgôaǃgon tsî hâǃkhaiba ge ūbasen. 74 ǁNātsē gu ge ǁaubexa ǃnonaǀoadisi toroǃkhamaogu khākhoen diga ge ǃgamhe. ǁNās khaoǃgâb ge Jonatanna Jerusalems ǁga ge oa.
© Khoekhoegowab Elobmîs © Bible Society in Namibia, 2020.
