1 ǃKhū, ti Î tsî ti ûib di ǀhonkhoetse. Ti mîdi xa ra ǃaromahe tsūǃgâba xu huiǂui te re. A di ǁîde tā ti ǁnāsa ǃaromaba. 2 Ti ǂâidi ǃaroma ta ka ǂnauhe, îb Gā-aisiba ti ǁnâuǃāba ǁgauǃnâ, ǃkhaisa ta ge ra ǁkhore. Dīsā ta ka, o ta nî sâuhesa ta ge ǂgao tama hâ; ǀgui ǁore-i xawe-i nî kōǃkharuǀkhāhe ǃkhaisa ta ge ǂgao tama hâ. 3 O ta ge ǃaruǀî ǁore tsî nē tsūdība xu nau tsūdība dī tide. On ge ti khākhoena tita taotao tsî tita ǂama ǃgâiaǂgao tide.
4 Elotse, ti Î tsî ti ûib di Elotse, ǀgapiǂâixasiba tita xu ūbē, 5 î ǂkhaba turaga xu sâu te re. 6 Xūǃgunuxasib tsî turab tsîkha xa ta nî danhesa xu sâu te re. Tā nē taotaosa turagu ǃnâ ǁnāxū te re.
Nūs
7 Ti ôado, tare-e ta ǂhanu gowaǀîs xa ra mî ǃkhaisa ǃgâ re. Tita xa du ra ǁkhāǁkhāhe ǀgaub ai du ga dī, o di ge sadu mîde tātsē ǃnui du tide. 8 ǁOre-aon ge ǁîn di ǂhunuma ǀgapiǂâixasib tsî nauna mîǁgaiǁgais xa ra ǃkhōhe.
9 Tā mîmâidets ga dī, o nū, î tā Elob di ǃanu ǀonsa mâ ǁaeb hoaba ǂgai. 10 ǃGā-i, hoaǁae ra ǂnauhe i ge hūgas tsîna ǂnaoxaǀkhā tama i tide. Khoe-i Elob di ǀons tawa ra nū i ge tātsē ǁoreo tide. 11 Mâb hoab, ǃKhūb di ǀons ǃnâ hoaǁae ra nūb ge a ǁore-ao tsî ra ge ǁîb tsî ǁîb di omaris tsîra, ǁîs ǀguitikōse ǁîb ǀkha ǀhapixa xui-ao, ǃKhūb xa nî ǁkharahe. ǁÎb di nūs ga ǂguro ǃharib ai hînaoǃnâ hâ i, xawes tsînab ge ǀûbahe ǁoa. ǁNās ǃaromab ge ǁîb ûib tsî hoaraga omaris khoen di ûib tsîna ǃgomsigu xa nî ǀoa.
ǀUrisa ǃhoa-ain
12 Tā i Israelǁî-i xare-e tātsē ǂkhaba xūna ǃKhūb xa mîs ǃnâ ǀhapixa kaisen. Nēs ǃnâ ga ǀhapixa khoe-i hoa-i ge ǁōba anu hâ. ǁNāti ra ǃhoa khoen ge ǂgoab ǃnâ ra ǃhobosen hāgūn khami ī tsî eloǃaoǃgâxa khoen ge ǁnāti ī ǀurisa ǁnaetiba xu nî ǃûisen. 13 Tā ǀurisa gowaba ǃhoasa ǁnaetikaisen, ǁnāb a ǁore xuige. 14 ǃGôaǃgôasa khoen ǀkhats ra ǃhoa hîats ge ǁî-aitsama ǀurusen tsî ǁnaetib ǃoa ǀurisa mîsa sîsenū tsî gâ khoese ī ǁkhā ǃkhais xa ǂâi re. ǁÎn ge sats a gâ ti nî ǂâi tsî mâtikōse i sa îra taotaosaba. Kaisets ge nî tao tsî tātsēts ga ǃnae tama hâ ǃkhaisa nî ǁkhore. 15 ǀUrisa gowaba sîsenūs di ǁnaetibats ga ūhâ, ots ge ûits hâs kose tātsē ǁî-e xu ǁkhaesen tide.
ǁGoe-ūgus di ǁoren
16 ǂGuiǃnâgu ǁoreǀgaugu ge hâ tsîts ge ǁîgu ǀkha ǃKhūba ǁaixa kai ǁkhā, xawe ǁgoe-ūgus ge ǀgamsa, ǁhabu ra ǀaes, ǀarihe ǁoas, aitsama ǀgui a ǂhubiǂui ǁkhās khami ī. Khoeb hîa ǀnî xū-e tama ī tsî ǁgoe-ūgus ǀguisa hâbab ge nē ǃkhais ǀkha, ǁnā ǀaes xab nî hîkākāhes kose nî aiǃgû. 17 Nēti ī khoeb ǃaroma di ge hoa tarekhoede a turahesa tsîb ge ûib hâs kōse tātsē ǂâu tama hâ.
18 Khoeb hîa ǁîb taras ǃoagu ǂgomǂgomsa tamab ge ǁîb ǃnâ ra ǂâi: “ǀGui khoe-i tsîn tātse ǂan tide. Nēpa i ge a ǃkhae tsî i ge ǀgui khoe-i tsîna mû te tide. ǂÂiǂhansen ta nî xū-i ge a ǀkhai. Hoan xa ǀGapib ge ǁorena ǂan tide.” 19 Nē khoeb ge nau khoen ǀguina ra ǃao. ǁÎb ge ǃKhūb di mûra disiǀoadisi ǃnāde sores ǃgâ-ai ǃgāsa tsî sada ra dī xūn hoana, sâu da ka, xawe ra mû ǃkhaisa hōǃâ tama hâ. 20 ǃKhūb ge mâ xū-i hoa-e, ǃhūbaibab nî ǂnubis aiǃâ tsî ǁnās khaoǃgâs tsîna a ǂan. 21 ǂGomǂgomsa tama ǃgame-aob ge ǃâubasen tamab hâ ǁaeb ǃnâ nî ǃkhōhe, tsîb ge ǂhaisasib ǃnâ nî ǁkharahe.
22 ǁNās ǁkhās xase i ge ǁkhāti, ǁîs aoba ǂgomǂgomsaba tama taras tsî ǀnî khoeb di ôa-e ǁîs di aoba ra ǁorabas ǀkha ī. 23 ǂGuro ǃkhais ais ge ǁîsa Hoan xa ǀGapib di ǂhanuba ge ǃûǂam. ǀGamǁî ǃkhais ais ge ǁîs aob ǃoagu ge tsūdī. Tsî ǃnonaǁî ǃkhais ais ge ǃgamekhôa tsîs ge ǀnî khoeba ǀgôa-e hōba ǃkhais ǀkha aitsama taosib ǃnâ ge mâisen. 24-25 ǀGôan ge ǁîs ǁoren ǃaroma nî tsâ. ǁÎn ge ǀhûhâsib ǃnâ hâǃkhai-i tamas ka io omari-e ūhâ ǁkhā tide. ǁÎs ge ǀhûhâsib di ǂgaeǂgui-aogu aiǃâ nî hā-ūhe, tsî gu ge ǁîga ǁîs tsî ôasan tsîna nî ǁkhara. 26 ǁÎs ge ǁîs di ûib hoaragaba taosib ǃnâ nî hâ tsîn ge khoena ǁîsan ra ǂâihō ǁaeb hoab ai nî ǀâxare si. 27 Khoen ǁîs di ǁōb khaoǃgâ ga ûiǃgaun ge ǃKhūba ǃaoǃgâs, xūn hoan ǃgâ-ai ǃgâi ǃkhaisa nî mûǂan. ǃKhūb di mîmāde ǁnâuǀnams ǃgâ-ai a ǃgâi xū-i xare-i ge a ǀkhai.
© Khoekhoegowab Elobmîs © Bible Society in Namibia, 2020.
