Israelǁaes di ǂkhabadīgu
1 Tsūǀkhāb ǃnâ ta ge hâ. ǁKhunaǁaeb di ǂûn ǀnai ǀhaoǀhaotoahe hâ tsî draiben ǀnai ǃoraǁnâtoahe hâpa ǂû-e ra ôa khoe-i khami ta ge ī. ǂAuxûiǂû-i xare-i ge a ǀkhai tsî ǂguro ǁan hâ ǀnoma-i, ǁî-e ta kaise ra tura i tsîna. 2 ǂGomǂgomsa khoe-i xare-i ge ǃhūb ǃnâ a ǀkhai, ǂhauǃnâ khoe-i xare-i ge hâ tama hâ. Hoatsaman ge ǀaoǂnâxūn nîse ǃâuǁgoe; mâ-i hoa-i ge ǁî-i ǃgâsa-e ǁnoa-i ǀkha ra ǃkhēma. 3 ǃOmkha ân ge ǂkhabadīb ǃoa a ǂhomisa. ǂGaeǂgui-aogu tsî ǂhanuǂhanu-aogu tsîn ge ǁamaǃkhunimariba ra ǂgan; ǂamkhoegu ge ǁîgu ra ǂgao xūn xa ǀgui ra ǃhoa tsî gu ge ǁnā xūn ǃnâ ra ǀhûǀgui. 4 ǁÎgu hoagu ǃnâ ǃgâib ge ǁkhū-i khami ī, ǁîgu hoagu ǃnâ ǂhauǃnâb ge ǁkhū-ǁgâuǂnamib ǃgâ-ai a tsū.
ǁÎgu ǁkharab di tsēs ge go hā. Nēsi gu ge ǁîga ǂâiǂhansens ǃnâ hâ. 5 Tā sa ǀhōsa-e ǂgomǃgâ, tā sa horesa-i ai ǂgomaiǂnûi, î tā sa ǂganǃgâsiga ǁnās, sats ǀkha ra ǁgoes tsîn ǀkha ǀgoragu. 6 ǀGôab ge ǁgûba ra ǃharaxū tsî ǀgôas ge ǁgûsa ra mâǃoa tsî ǀuiǀgôasa ǀuiǁgûs âsa. Khoe-i omaris di khoen ge a ǁî-i di khākhoe.
7 Xawe tita ge ǃKhūb ai nî kō, tita ge Elob hîa nî huiǂui teba nî ǃâu. Ti Elob ge ti ǀgoresa nî ǁnâu.
ǃKhūb ge ǁaes âba nî sâu
8 Tā tita ǂama ǃgâiaǂgao re ti khākhoetse, ǁnā ta ka xawe ta ge ǁkhawa nî khâi. ǃKhaenab ǃnâ ta ga ǂnû, xaweb ge ǃKhūba ǃnâse nî ība te. 9 ǃKhūb di ǁkharaba ta ge nî tani, ǁîb ǃoagu ta ge ǁore amaga, ti ǁhōba ǂnoaguba te tsîb nî ǂhanuǂhanuba tes kōse. ǁÎb ge ǃnâb ǃoa nî ǂgaeǂguiǂui te, o ta ge ǁîb di ǂhanu-aisiba nî mû. 10 On ge ti khākhoena nēsa mû tsî taob xa nî hāǂamhe. ǁNān hîa tita ǃoa “Mâpab ǃKhūb sa Eloba hâ?” ti ra mîna. Tita ge ǃgangu ǃnâ ǁgoe ǂgoab khamin ǁîna ra dāǂkhūhesa nî mû.
11 Sa ǂnubiǂgoagu ǁkhawa nî omkhâihe tsēs ge nî hā. ǁNā tsēs aib ge sa ǀkhariba nî kaikaihe. 12 ǁNā tsēs ain ge sas ǃoa nî hā Asiriaba xu tsî Egipteba xu; Egipteba xu Eufratǃāb kōse tsî huriba xu hurib kōse tsî ǃhomma xu ǃhommi kōse. 13 Xawe ǃhūbaib ge nî ǃū-aisa ǁîb di ǁanǂgāsaben ǃaroma, ǁîn di dīgu ǃaroma.
ǃKhūb ge ǁaes âba nî ǀkhomxa
14 Sa ǁaesa sa haib ǀkha ǃûi re, sa gūn ǃaub ǃnâ ǀguri ǁan hâna, ǂûǂûxa ǃhūb ǃnâ. An Basanni tsî Gileadi tsîkha ǃnâ ǃû re, ǀnain gere dī khami.
15 Egipteba xu du ge doeǂoa ǁaeb ais ǁkhās khami ta ge buruxadīna nî mû kai du. 16 ǃHaodi ge nē ǃkhaisa mû tsî nî tao, ǁîdi ǀgaiba ǂoaǃnâ tsî. ǁÎdi ge ǁîdi ǃomga amdi ân ai nî ǁgui; ǁîn ge nî ǂganaǂgae. 17 ǁÎn ge ǀaob khami tsaraba nî nabe, ǃhūb ai ra ǂhana ǂhanaben khami. ǁÎn ge ǀkhū rase sâusenn hâ ǃkhaide xu nî ǂoaxa. ǁÎn ge ǃao rase ǃKhūb sida Elob ǃoa nî hā; kaisen ge sadu xa nî ǃao.
18 Sats khami ī Elo-i ge a ǀkhai. Sats ge ǁorena ra ǀûba tsî ûiǃgau hân sa ǁaes din di ǃûǂamsa ǁkhara tama hâ. Sats ge ǀamos kōse ǁaixa hâhâ tama hâ tsîts ge ǀamo ǀnamma ra ǁgau da. 19 Sats ge ǁkhawa nî ǀkhomxa da. Sats ge sida ǂhanuoǃnâsiga nî dāǂkhū; sats ge sida ǁoren hoana hurib di ǃgamsib ǃnâ nî aoǂgā. 20 Sats ge Jakob ǃoagu nî ǂgomǂgomsa tsî Abrahamma hâhâ ra ǀnamma nî ūhâba, sida aboxagats ge ǀnai mîmâiba hâ i khami.
© Khoekhoegowab Elobmîs © Bible Society in Namibia, 2020.
