Tā ǃguriǃgurisen
1 Tā ǃnorats nîga mari-i ai mûmâinǃgâ. 2 Tā ǀgaisa tsîts ǂâusase gā-ai, hoa xūn hîats ǂhâba hânats nî hōga ti ǂâi. 3 Tā, ǃKhūb nî amase ǁkhara tsi xuige “Tari-e ti ǂamai ǀgaiba ūhâ ǁkhā?” ti mî. 4 Tā ǁoreba dī tsîts nî ǃkhoeni ti ǂâi; ǃKhūb ge satsab nî ǁkhara ǁaeba nî ǃâu. 5 Tā ǁnātikōse Elob di ǀûbas ai ǂgomaiǂnûi tsî nē ǁoreba xu nau ǁoreb ti ǁore. 6 Tā ǁîb ǀkhommi ǁnātikōse kai tsîb nî mâtikōsen ga sa ǁorena ǂgui, xaweb nî ǀûba tsi ti ǂâi. ǀKhommab ge ra ǁgau, xaweb ge ǁore-aon ǀkhab ǁaixa hâ ǀgaub tsîna ra ǁgau. 7 Nēsi ǃKhūba sa ǁoren ǃaromats ǃhausen hâ ǃkhaisa mîba. Tā ǁaris ǁga ǃâu. ǃKhūb ǀases timîsi sa ǀkha ǁaixa tsî satsa ǁōb ǀkha ǁkhara ǁkhā xui-ao. 8 Tā ǂhanuoǃnâ ǃkhūsib ai, ǁîb tsūǀkhāb di tsēs ai ǃgâi-i xare-e harebeba tsi tide xuige mûmâinǃgâ.
Amabesib tsî ǁîǃgôasens
9-10 ǂGomts ra-i ǃnâ mâǁapo tsî mîts ra-i tawa mâ. Tā khoe-i hoa-e ǂkhîǂkhî ǂgao tamas ka io khoe-i ra mî xū-i hoa-e ǃkhō-am. 11 ǃGâs ǃaroma hugaǀgui ǂhomisen hâse hâ, xawe ǃereams ǃaroma ǁaeba ū. 12 Tare-ets nî mî ǃkhaisats ga ǂan, o ǀgui ǃeream tsîts ga tare-ets nî mî ǃkhaisats ga ǀū, o ǃnō. 13 ǃHoas ge ǃgôasib tamas ka io taosiba hā-ū ǁkhā tsî sats ra mî xū-i ge hîkākā tsi ǁkhā.
14 Tā ǀgamnamxa ti ǂgaihe, î tā ǃnuide sa nams ǀkha ǁgui; taosib ra ǃnari-aob ǃoa hā tsî ǁkhō ǀgoraǃgâs ra ǀgamnamxab ǃoa hā xuige. 15 Tā kai-i tamas ka io ǂkhari-i kas hoasa, hîkākā nî xū-e dī,
© Khoekhoegowab Elobmîs © Bible Society in Namibia, 2020.
