Egipteǁîn di gâresib
1 Xawen ge eloxoresana sa ǀkhomoǃnâ ǁaiba ǀunis kōse ge tsâ. Sats ge tarenan nî dī ǃkhaisa, dīn nîs aiǃâ ge ǂan i. 2 Sats ge sa khoenan ge ǃgû kai tsî ǃnoesase ǂoa kai, xawen ǂâidi âna ǀkharaǀkhara tsî ǁîna nî ǃgôaǃgon ǃkhaisa ge ǂan i. 3-4 Egipteǁîn ge noxopan ǁîn di ǁō hân di ǀhobadi ai ra ǃoa tsî ā hîa ǀnai, tare-i ǃaroman ge nēna ǁîn ǀkha ī ǃkhaisa ge ǀuru tsîn ge ǁîn gere ǃgûn nîse ǀkhoma khoen a ǃhūsabe ti mîǁgui tsî ǁîna ge ǃgôaǃgon. Nēn hoan ge ǁîna anu hâ ǁkharaba tsâ tsîn nî ǃgau hâ tsûtsû-ain ǁîn xa ǃaromahe hâna ǃkhōǃoaga ge ī. 5 Sa khoen buruburuxa ǃgûs ǀkha aiǃgûgaru hîan ge ǁîn khākhoena ǁnaetisa tama ǁōba ge ǁō.
Elob ge ǁîb di khoena ǂgaeǂgui tsî ra sâu
6 Sa mîmās ais ge hoaraga kurusa ge ǀkharaǀkharahe, sa khoen ǂkhôadīhe tidega. 7 ǁÎn ge ǃâusa ǁîn di tentomdi ǂamǃnâ tsî ǂnâsa ǃhūba ǁgammi ge hâ i ǃkhaib ai ge mû. ǁNāpab ge ǀgâxa ǂgāba ǀApahurib di ǁgaoǃgabigu ǁaegu ge hâ i, ǁîna ǃgâusa supusupubas ǃaroma. 8 Sa khoen hoan, sa sâub ǃnaka hân ge nē buruxa sîsenna mû tsî ǁnāpa-u ge ǃgâu. 9 ǁÎn ge ǃû-aib ǃoan ra ǁkhowa-amǂuihe, o ra an hān tsî ǁkhaon hîa ra ǂgamn khami ǃgâiaǂgao tsî sats, ǃKhūts ǁîna ge huiǂuitsa ge koa. 10 ǁÎn tsîn ge ǁîn ge khobo i, ob ge ûiba ī i ǀgaub ǁga ge ǂâi-oa; mâtib ge ǃhūbaiba ûitsama xūn di soas ai ǀûitsina hā-ū, tsî ǃāba ǁaun di soas ai kai ǃgôab di ǁgūtsiǁgūbena hā-ū ǃkhais xa. 11-12 ǁÎn ge ǃgâi ǂû-e ega a ǂhâba, o di ge ǃhaude huriba xu ǂoaxa tsî ǁîna ge ǁâǁâ. ǃHau-i ge aiǃân ge mû tama hâ i aniǃnôa-e.
Egipteǁîn di ǁkharab
13 Xawe ǀgaisa ǃgurub ge ǁnā ǁore-aon ai nî hā ǁkharab di ǃkhâikhomsa ge mā. ǁÎn ge dīn ge ǂkhaba xūn ǀkhan ǃoaǂui hâ ǁkharaba ge tsâ. ǀGui ǁae-i tsîn ge ǃhaokhoena ǁnātikōse ge ǁkhan tama hâ i. 14 ǀNî khoen ge ǃhaokhoen ǁîn ǃoa gere hāna ǁkhoreǁharesa ge ǂgao tama hâ i, xawe nē ǁaes ge ǁîn di ǃhaokhoen ǁîna gere ǃgâidīna gere khobodī. 15 ǃHaokhoena ga ǁkhoreǁhare tama i ǁae-i hoa-i ge nî ǁkharahe, 16 xawe nē khoen hîa ge ǃhaokhoena aiǃâ dâxase ǁâudīgu ǀkha ǁkhoreǁhare tsî ǁîn ǁkhān khami ûi-ū hâ in ge ǁîna ega ǃgomse ge tsâ kai. 17 Nē khoen ge ǁkhāti Sodoms khoegu hîa ge ǂhanu-ai Loti di dao-ams tawa hāgu khami hoaragase ge ǂgī kaihe. ǁÎn ge hoaragase ǃkhaenab ǃnâ ge hâ i tsî i ge mâ-i hoa-e ǁî-i oms di dao-amsa nî hōse gere ǀnāǀnāma.
Elob di buruburuxa ǀgaib
18 Harps aib ge mâ ǁapab hoaba ǁîb di ǂhunuma ǀōǀgapiba ūhâ, xawe mâ ǀōb hoab ge ǃkharaga ǀōǀgaugab nî māse nau ǀōgu ǀkha ǀguiǀguihe ǁkhā. ǁNāti i ge ǁnā tsēdi ǃnâ, ǃhūbaib, ǂoab, ǀaes tsî ǁgammi tsîn ge ǁîn di sîsenxasiga māǃkhunigu, o ge ī i. Nēs ge ǃgāsase ī ge xūn ai mûhe ǁkhā. 19 ǃHūb di ǀgurun tsî xamarin ge hurib ǁga ge ī, tsîn ge hurib dina ǃhūb ǁga ge ǂoaxa. 20 ǀAes ge ǁgammi ǃnâs gere khau xawe ǁgammi xa ge ǀarihe ǁoa i. 21 ǀAes di ǁhabugu ge ûitsama xūn tsîna ǁîgu ǃnân gere ǃgûma xawe ge ǂhubi ǁoa i tsî ǀhomsi ǂû-i, ǃkhoa-i khami tsuni ǁkhā i tsîna ge tsuni kai tama hâ i.
22 ǃKhūtse, sats ge sa khoena ǀgapiǀgapi tsî ǃgôasiba ge mā. Sats ge tātsē ǁîna ǁnāǃgâ tama ge i tsî ǁîna hugaǀgui hoa ǃkhain ai gere hui.
© Khoekhoegowab Elobmîs © Bible Society in Namibia, 2020.
