Mixa 4 - Khoekhoegowab New Translation 2020 (KKG20)

ǃKhūb ge hoaraga ǃhūbaiba nî gaoǂam

(Jesaja 2:2-4)

1 ǁAeb ge nî hā,

Tempeli mâ-ai ǃhommi

hoa ǃhomgu xa nî ǀgapi

tsî ǃnâugu hoaga nî ǃnāba.

O di ge ǁaedi hoade ǁîb ǁga nî ǃkhoe,

2 tsîn ge ǁîdi khoena nî mî:

“Hā, î da ǃKhūb di ǃhommi ai ǂoa,

Jakob Elob di Tempeli ǃoa.

ǁÎb ge mâti da nî ûisa nî ǁkhāǁkhāda

tsî da ge sada ǁîb di daogu ǃnâ nî ǃgû.

Sionsa xub ge ǂhanuba ra ǂoaxa;

Jerusalemsa xus ge ǃKhūb di mîsa ra hā.”

3 ǁÎb ge ǁaedi ǁaegu nî ǀgoraǃgâ,

tsî ǃnūse hâ ǃhaodi ǁaegu hâ ǂkhababa nî ǀamǀam.

ǁÎn ge gôagu âna ǃhūǃgao-ūdadi ǃnâ nî kuruǃkhuni

tsî ǁhâigôagu âna ǁaraǂao-ū gôadi ǃnâ.

Os ge nē ǃhaosa naus ǃoagu torodī tide,

tsîn ge ǃaruǀî torodīs ǃoa aiǂhomisen tide.

4 Mâ-i hoa-i ge ǁî-i draibehais ǃgao

tsî ǀnomahais ǃgao nî ǂnû,

tsî i ge khoe-i xare-e ǁîna ǃaoǃao tide.

ǃKhūb Hoaǀgaixab ge nēsa go mî.

5 Mâ ǃhaos hoas ge ǁîs eloba ǃoaba tsî nî ǁnâuǀnam, xawe sida ge ǃKhūb sida Eloba ǀamos kōse ǃoaba tsî nî ǁnâuǀnam.

Israels ge ǃkhōsisa xu nî oaǀkhī

6 “ǁNā tsēs ai ta ge ǃhorana nî ǀhaoǀhao”

tib ge ǃKhūba ra mî.

“Tita ge ǁnān doeǁgabēhe hân tsî ǂōǂōsiga ta ge tsâ kaina nî ǀhaoǀhao. 7 Tita ge ǃhorana ǃgau hâ ǃhaose nî dī tsî doeǁgabēhe ge hâ ina kai ǃhaose. Tita ǃKhūta ge ǁîn ǂama Sionǃhommi ai nî gao, nēsisa xu ǀamosib kōse.”

8 Sats ǃûiǂgō-omts gūn ditse, Sionni ôas di ǀgaisa hâǃkhaitse. Sats ge ǁkhawa ǂguros khami gaosis âtsa nî hō-oa. Jerusalems ge ǁkhawa nî danaǃā kai. 9 Tarexas ǁnāti ǃgarise ra ǃau? Gao-ao-es ūhâ tama? Sa ǀapemā-aoba ūbēhe hâ, os ǁoratsûb ǃnâ hâ taras khami tsûb xa go hāǂamhe? 10 Tsûb xa ǂhansen re Sions ôase, ǁoratsûb ǃnâ hâ taras khami, nēsis ǃāsa xu ǂoa tsî ǂgā-ai ǃkhaib ai sī nî ǁan xuige. Sas ge Babiloniab ǁga nî ǃgû, xawes ge ǁnāpa xu nî huiǂuihe. ǁNāpab ge ǃKhūba sa khākhoen di ǃomǁaeba xu nî ore si. 11 ǂGui ǃhaodi ge nēsi sas ǃoagu ra khâimâ. ǁÎdi ge ra mî: “As Sionsa ǃanuoǃnâ kaihe, î da ǁnāsa aitsama mû.” 12 Xawen ge ǁîna ǃKhūb di ǂâisa a ǀū; ǁîn ge ǁîb di ǀapesa ǁnâuǃā tama hâ. ǁÎb ge ǁîna ǃhoroǃgaeǀkhādi khami dāǃnâǃkhais ǃaroma nî ǀhaoǀhao. 13 “Sionni ôase, khâi îs dāǃnâ. Tita ge sasa ǀuri ǁnâkha tsî ǂai ǁkhoradi tsîna nî mā, tsîs ge ǂgui ǃhaode nî ǂkhūǂkhū. Sas ge ǁîn ge ǁkhâuǁnâ hâ i xūna ǃKhūba nî khaiba, ǁîn di ǃkhūsiba hoaraga ǃhūbaib di ǃKhūba.”