Eksodus 27 - Khoekhoegowab New Translation 2020 (KKG20)

Altars

1 “Akasiahain ǀkha hakaǀkhāxa altars ǀgamkaidisi tsî ǀgamdisi sentimeterga gaxu tsî ǂhabas tsî ǀguikaidisi tsî ǃnonadisi sentimeterga ǀgapisa kuru. 2 Altars a kuru-ūsa hain ǂûna xu mâ ǁhôas hoas, altars dis ǃaroma ǁnâba ǃgaoǂui tsî hoaraga altarsa brons-i ǀkha ǃkhûǀkhā. 3 Sao ra xūn altars tawa nî sîsenūhena brons-i ǀkha kuru: Xapadi, xaraodi, ǀgapiǃoredi, ferkhegu tsî ǂnomǃoredi tsîna. 4 Haka tani-airâide ǁhôadi ai ūhâ rostersa brons-i ǀkha kuru. 5 Nē rostersa altars di rams ǃnaka ǂgā, altars ǁaegub kōses nî sīse. 6 Tani-aihaikha akasiahain ǀkha kuru, î brons-i ǀkha ǃkhûǀkhā. 7 ǁÎkha taniǁaeb ai, hoa ǀkhākha ai râidi ǃnâ ǃkhāǃkharu. 8 Tita ge ǃhommi ai ǁgau tsi ǀapeǁguib ǃoa altarsa ǃhupuse ǂhaba ǃnaodi ǀkha kuru.

ǃKhūb di Tentommi ǁgâuǂnamib

(Eksodus 38:9-20)

9 “Tentommi di ǁgâuǂnamiba tsaura lapin ǀkha ǂomsa ǂgāmâisagu ǀkha kuru. ǃKhawagasǀkhāb ǁgâuǂnamib dib ge hakadisihakaǀa meterga nî gaxu, 10 ǀgamdisi haiga ǀgamdisi bronsǂaidi xa ǂkhâǃnâhe hâse, ǀhaiǀurib ǀkha kuruhe hâ ǃgaeǁare-ūdadi tsî ǂgurihaigu ǀkha. 11 ǁKhās ǁkhās ge ǁgâuǂnamib di ǀapasǀkhāb ai nî dīhe: Hakadisihakaǀa meterga gaxu, ǀgamdisi haigu, ǀgamdisi bronsǂaidi ǃnâ mâgu xa ǂkhâǃnâhe hâse, ǀhaiǀurib ǀkha kuruhe hâ ǃgaeǁare-ūdadi tsî ǂgurihaigu ǀkha. 12 Huriǂoasǀkhāb di ǂgāmâisagu ge nî ǀgamdisiǀgamǀa meterga gaxu, disi ǂgurihaigu tsî disi ǂaidi ǀkha. 13 Aiǂoasǀkhāb, ǂgâ-ams ǀkhāb ais tsînab ge ǁgâuǂnamiba ǀgamdisiǀgamǀa metergu di ǂhabasiba nî ūhâ. 14 ǂGâ-ams ǀkhāb, aiǂoasǀkhāb ai gu ge ǂgāmâisaga ǃnanikaidisi tsî ǃnanidisi sentimeterga nî ǂhaba, ǃnona ǂgurihaiga, mâb hoaba ǁîb di ǂais ǀkha. 15 Tsî nau ǀkhāb ai ǁkhās ǁkhāsa: ǂGāmâisagu ge ǃnanikaidisi tsî ǃnanidisi sentimeterga nî ǂhaba, ǃnona ǂgurihaigu tsî ǃnona ǂaidi ǀkha. 16 ǂGâ-ams ǃaromab ge khoese meterga gaxu ǂgāmâisab ǂhoa, ǂhoaǀapa tsî ǀapa tsaura lapin ǀkha ǂomsa tsî îsase anisaba nî mâihe. ǁÎb ge haka ǂgurihaigu tsî haka ǂaidi xa nî ǂkhâǃnâhe. 17 Hoaraga ǂgurihaigu ge ǀhaiǀurib ǀkha ǃkhûǀkhāhe, ǃgaeǁare-ūdadi hoade ǀhaiǀurib ǀkha kuruhe tsî ǂaidi hoade brons-i ǀkha nî ǃkhûǀkhāhe. 18 ǁGâuǂnamib ge hakadisihakaǀa meterga gaxu, ǀgamdisiǀgamǀa meterga ǂhaba tsî ǀgamkaidisi tsî ǀgamdisi sentimeterga nî ǀgapi. Tsî ǂgomasa tsaura lapin ǀkha ǂomsa ǂgāmâisagu, bronsǂaide ūhâga kuru. 19 Hoaraga xūn Tentomma ǂnubis ǃaroma ra sîsenūhen tsî hoaraga ankerǀurigu ǁgâuǂnamib digu hoaga brons-i ǀkha kuru.

ǃAmǀaes nî kōǃgâhe ǀgaus

(Levitikus 24:1-4)

20 “Israelǁîna mîmā în ǃūmû ǀkhera-oli-e ǃamǀaes ǃaroma ǀkhī-ū, mâ ǃoes hoasab ǃamǀaekandelara nî ǃamhese. 21 Aronni tsî ǁîb ôagu ge ǃKhūb di Tentommi ǃnâ, ǃGaeǀhaos ǂGaes ǁîb ǃgâb ai mâ ǂgāmâisab ais ai ǃamǀaekandelara nî mâi. ǁÎgu ge mâ tsuxub hoabab ǃamǀaekandelara nî khauhâhâ ǃkhaisa nî kōǃgâ. Israelǁîn tsî ǁîn surib tsîn ge nē mîmāsa hoaǁae nî ǁnâuǀnam.”