Xristesi māǂgaoxasib
1 Tsî ge ge nēsi ra ǂanǂan du, ǃgâsado, ǀkhommi Elob dib hîa gu ge Masedoniab kerkhega ǃkhōǃoab xa. 2 ǂGui ǃgom ǃâitsâgu ǃnân ge ǃkharu tsîn kaise ǀgâsa, xawen ge māǂgaoxase kai ǃgâiaǂgaob ǀkha ge ǁguiba. 3 Tita ge ǁîn di ǁkhāsiba ǃoa tsî ǁnās xan ǃnāǂamsase ra mā ǃkhaisa ra ǃkhō-am. 4 Tsîn ge ǃnākorobe nē ǃoabas Elob khoen dis ǃnân nî amǃnâxa ǃkhaisa kaise ge ǀkhoma. 5 ǁÎn ge dīn ge sige ǃâubasensa ge ǃnāǂam hâ i, xawen ge ǁî-aitsama ǃKhūba ge māsen tsî ǁnās khaoǃgâ sige ge māsen, Elob di ǂâisa xu. 6 ǁNā-amaga ge ge Tituba ge ǂgaoǂgaoǃnâ, ǀnaib ge tsoatsoa khamib nî ǁkhāti sadu ǃnâ nē ǀkhommi di sîsenna dīǀoaǀoa ǃkhaisa. 7 Xawe ǂgoms, mîs, ǂans, hoa ôasasib tsî sige ǃoa du ūhâ ǀnammi ǃnâs ǁkhās khami, nē ǀnammi sîsenni tsîn ǃnâ ǃnā re.
8 Mîmā du tama ta hâ, xawe ta ge sadu ǀnammi nauna huis dib a ama ǃkhaisa ra ǂanǂui ǂgao. 9 Sadu a ǂan ǀkhommi sada ǃKhūb Jesub Xristub* diba xui-ao, mâtib ge ǃkhūb hâ hîa sadu ǃaroma ǀgâ ǃkhaisa, ǁîb di ǀgâsasiba xu du nî sado ǃkhūse.
10 Nēs ǂama ta ge ti mîǂgāba, sadu ǃgâib ǃoab nî īs ao nēti ra mā: Sadu ge a ǂguro, kurib ǃkharu hâse tsoatsoas ǀguis ose xawe ge sîsenni ǃaroma māsenxa ido. 11 Sîsenna nēsi dītoa, îb sadu turaxasib ǁnāsa dīs diba ǁî-e dīǀoaǀoas ǀkha sadu ǂâisa ǃoa ǀguitikō, î du mā du rana sadu ǁkhāsiba xu mā. 12 Mās di turaxasib ga aibe hâo, o-i ge ǁnā khoe-e mās di ǁkhāsib ǃnâ i ga hâ, o nî mā. Khoe-i ge ūhâ tama-i hâ xū-e mā tama hâ. 13-14 ǀNîna supubahe tsî du sado nî ǃgombahes ose, xawe ǀguitikōsiba xu. Ab sadu ǃnāǂamsasiba nē hâ ǁaeb ǃnâ ǁîn di tôasisasiba ǀoaǀoa, îb ǁkhāti naun di ǃnāǂamsasiba sadu di tôasisasiba ǀoaǀoa. 15 Xoamâihe hâ khami: “ǁNā-i ǃnāsase ge ǀhaoǀhao-i ge ǃnāǂamsase ūhâ tama-e tsî ǀorose ge ǀhaoǀhao-i ge tôasi tama-e.”
Titub tsî ǁîb ǀhōsagu
16 Ab Elob, ǁkhā ôasasiba ge sadu ǂama Titub di ǂgaob ǃnâ māba ganganhe re. 17 ǁÎb ge sige ǂgansab ge ǃkhōǃoa, xawe ǁkhāti ǁîb di ôasasib tsî māsenxasiba xu sadu ǁga ge ǃgû. 18 Tsî ge ge ǁîb ǀkha ǁkhāti ǃgâsab, aoǁnâs di sîsenni ǃGâiǂhôas dib ǃaroma kerkhegu tawa ǀgapise ǃgôahe hâba ra sî. 19 Tsî nēs ǀguisa tama i tsîb ge ǁkhāti kerkhegu xa ge ǁhûihe, sige ǀkhab nî ǃgûse, sige ga ǀnammi di sîsenna dīo, ǃKhūb ǂûb di ǂkhaisiba ǃoa tsî sige di huiǀnamxasiba nî ǁgause.
20 Sige ge khoe-i xare-i xa ge nē ǀkhaeba ge ra ǂharugu-ū ǀgaus ǂama tsūse ǂgā-amhe tide ǃkhaisa ra ǂgōsen. 21 Sige ge ǂhanuse dīs ai ǃammâisen hâ, ǃKhūb aiǃâ ǀguis ose, xawe khoen aiǃâs tsîna. 22 Tsî ge ge ǁîkha ǀkha ǁkhāti sige ǃgâsab, ǃnuriǃnāde ge ge ǃâitsâ tsî ôasab a ǃkhaisa ǂgui xūn ǃnâ mûba ra sî. Nēsib ge ǁîba ǁnās ǃgâ-ai sadu ǃnâb kai ǂgomǃgâsa ūhâ xui-ao a ôasa. 23 Titub xasa, ǁîb ge ti horesa tsî sadu di sîsenǁare-ao. Nau ǃgâsagu xasa, ǁîgu ge kerkhegu di apostel tsî a Xristub di ǂkhaisi. 24 ǁNā-amaga sadu ǀnammi di ǁgauǂuis tsî ǁîgu xa hâ koasens tsîna kerkhegu aiǃâ ǁgauǂui.
© Khoekhoegowab Elobmîs © Bible Society in Namibia, 2020.
