Huib ǃaroma hâ ǀgores
Davidi ǀgores
1 ǃKhūtse ǂgaes âtsa ǂō, î ǁnâu-am te re,
ǀgâsa tsî ta ǂhâb ǃnâ hâ xuige.
2 Ti ûiba sâu re, sats ǃoagu ta a ǂgomǂgomsa xuige;
sâu te re, sats ti Elotsa, sa ǃgāta, sats ai ǂgomaiǂnûi hâ ta xuige.
3 ǀKhomxa te re Elotse,
hoaraga tsēsa ta ge satsa ra ǂgaiǀî.
4 Sa ǃgāba ǃgâiǃgâiǂgao re ǃKhūtse
sats ǃoa ta ge ti ǀomsa ra ūkhâi.
5 Sats ǃKhūts ge ǃgâi tsî a ǀûbaǀnam,
tsîts ge ǃnāǂamsa hâhâ ra ǀnamma ǁnān satsa ra ǂgaiǀîna ūba hâ.
6 ǃKhūtse sa ǂgaesa ti ǀgoresǀî ǂō re
î ti ǀkhomabasens di domma ǃgaoǃgâ re.
7 Ti ǂōǂōsib di tsēs ai ta ge ra ǂgaiǀî tsi
sats ra ǁnâu-am te xui-ao.
8 Sats khami ī elo-i a ǀkhai ǃKhūtse;
ǀgui-i di sîsengu tsîn ge sagu ǀkha a ǀgopeǀnōhe ǁoa.
9 Hoa ǁaedi sats ge kurudi
ge hā tsî sa aiǃâ nî ǃhonǁgoa ǃKhūtse
tsîn ge sa ǀonsa nî ǂkhaiǂkhai.
10 Sats ge a kai tsî buruxana ra dī
sats ǀguits ge a Elo.
11 ǃKhūtse ǁkhāǁkhā te re sa daoba,
î ta sa amab ǃnâ ǃgû
tsî ti ǂgaob hoab ǀkha ǃoaba tsi.
12 Kare tsi ta ge nî ti ǂgaob hoab ǀkha ǃKhū, ti Elotse
tsî ta ge ǀamose sa ǀonsa nî kaikai.
13 Kaib ge a sa hâhâ ra ǀnamma ti ǃoagu,
sats ge ti ǀomsa ǁŌhân Hâǃkhaib di ǃgamsiba xu ge huiǂui.
14 Elotse, ǀgapiǂâixa khoen ge tita ǃoagu ge khâi
ǀhaes di ǀkhomoǃnâ khoegu ge ti ûiba ra ôa
tsî gu ge satsa ǃgôasi-e ūhâba tama hâ,
15 xawe sats ǃKhūts ge ǀkhomxaǂgao tsî a ǀkhomxa Elotsa,
ǃnūǃnâxa tsîts ge sa hâhâ ra ǀnammi tsî ǂgomǂgomsasiba ra ǁgauǂui.
16 Tita ǃoa ǂnan î ǀkhomxa te re
sa ǀgaiba sa ǃgāba mā re, î sa ǃgās di ôaba sâu re.
17 Sa ǃgâisib di sao-e ǁgau te re, în ǁnān tita ǁkhan hâna mû ǁkhā
în sats xa taotaohe re, sats ǃKhūts ra hui tsî ǁkhaeǂgao te amaga.
© Khoekhoegowab Elobmîs © Bible Society in Namibia, 2020.
