ǁOreǁguibasa ra ǂgaoǀkhāhe ǁhōgu
1 ǁOreǁguibadi ge sao ra ǁhōgu ǃaroma a ǂhâbasa.
Khoe-i ga ǂhanusise ǂgaikhâihe ǀhûhâsib ǃnâ-i ge mû tsî ǁnâu xū-e ǀhûǀguitimîs ǃaroma tsî ǁnā xū-e ǀūxūo, o-i ge ra ǁore tsî ǁnā-amaga ǁkharaba anu hâ.
2 Khoe-i ga ǀūǂamse ǃanuoǃnâ xū-e tsâǀkhāo, aiǁgause, ǁō hâ ǀgoa-i, goma-i, ǀguru-i tamas ka io ǂhanabe-i kas hoasa tsî ǁnās khaoǃgâ tare-e-i go dīsa mûǂano, o-i ge ǁî-e ǃanuoǃnâ tsî a ǀhapixa.
3 Khoe-i ga ǀūǂamse ǃanuoǃnâ xū-i, khoe-e xu ǃhui hâ-e tsâǀkhāo, tare-i ǀgui-i ka xawe, o-i ge tsūse i go dī ǃkhaisa i ra mûǂan ǁaeb ai ǃanuoǃnâ tsî a ǀhapixa.
4 Khoe-i ga ǁae tamase nū, tare-i ǀgui-i ǂamas ka xawe, o-i ge tsūse i go dī ǃkhaisa i ra mûǂan ǁaeb ai a ǀhapixa.
5 Khoe-i ga ǀhapixa-i a ǃkhaisa mûǂan, o-i ge ǁî-i ǁorena nî ǁguiǁnâ, 6 tsî ǁkharab ase gūs tamas ka io pirisa ǃKhūba nî ǁguiba. Pristeri ge ǁî-i ǁoren ǃaroma ǂkhîbagus ǁguibasa nî dī.
7 Khoe-i ga ǀgoa-e ǁguibasa ǁkhāba tama i, o-i ge ǁî-i ǁoren matares ase ǃKhūba ǂnaira tamas ka io ǂnabura nî ǀkhī-ūba, ǀguisa ǁoreǁguibas ǃaroma tsî nausa khauǁguibas ǃaroma. 8 ǁGuiba-ao-i ge ǁîra pristeri tawa nî ǀkhī-ū tsîb ge ǁîba ǂguro anisa ǁoreǁguibas ǃaroma nî ǁguiba; pristeri ge ǁîsa nî ǁgēdom, xawes ǃaosa danasa xu ǀgora tamase, 9 tsî ǀnî ǃâb ǁîs ǀaob diba altars di ǀkhāb ai nî ǀgapi. ǃGau ra ǀaobab ge altars di ǃgaoǃgaob ai nî ǁhōǂui. Nēs ge ǁoreǀûbas di ǁoreǁguibasa. 10 ǁNās khaoǃgâb ge ǁgaragu ǃoa ǀgamǁî anisa khauǁguibas ǃaroma nî ǁguiba. Nē ǀgaus aib ge pristera ǁguiba-ao-e ǂkhîbagus ǁguibasa nî dība, tsî-i ge ǁoren â-e nî ǀûbahe.
11 Xawe i ga khoe-e ǂnaira tamas ka io ǂnabura tsîna ǁkhāba tama io, o-i ge ǀgui kiloxrammi mel-i hîa ǀkhera-oli-i tsî ǁkhoaǁkhoamûxūn ose hâ-e ǁoreǁguibas ǃaroma nî ǀkhī-ū. Nēs a ǁoreǁguiba tsîs ǃhoroǁguiba tama xui-ao. 12 ǁGuiba-aob ge nē mel-e pristeri tawa nî ǀkhī-ū tsîb ge pristera ǁî-e ǃoms ǃnâ nî ū, ǃKhūb di ǃgôasib ǃaroma i ge hoaraga-e ǁgauǁgaus ase ǁguibahe, tsî altars ai ǂûǁguibas ase nî ǂhubihe. Nēs ge ǁoreǀûbas di ǁguibasa. 13 Nē ǀgaus aib ge pristera ǁguiba-ao-i ǂkhîbagus ǁguibasa nî dība, tsî-i ge ǁoren â-e nî ǀûbahe. Tsî ǃgau ra mel-i ge a pristeri di, ǃhoroǁguibas tawa ra dīhe khami.
Matare-oas ǁguibadi
14 ǃKhūb ge sao ra ǁgaraga Moseba ge mā: 15 Khoe-i ga ǀūǂamse ǃKhūba i ga mā hâ ǃnâu mataresa mā tama i, o-i ge ǃKhūba ūo baib tamas ka io piriba matares ase nî ǀkhī-ūba. ǀGoa-i di ǁkhāsib ge xoaǁguisa ǁgaragu ǃoa nî ǀnōhe. 16 ǁKhāti i ge mā tama i ge hâ i ǃnâu māde matare-oa tsî ǁnās ai ǀgamdisi persentga nî ǀaro. ǁÎ-i ge māsa pristera nî mā tsîb ge pristera ǁguiba-ao-e ǂkhîbagus ǁguibasa nî dība, tsî-i ge ǁoren â-e nî ǀûbahe.
17 Khoe-i ga ǀūǂamse ǃKhūb ge mîmā xūn dīhe tidese in hoana ǃûǂam, o-i ge ǀhapixa tsî ǁkharaba anu hâ. 18 Matare-oas ase i ge ǁî-e pristeri tawa ǁguibas ǃaroma ūo aore ǀgoa-e nî ǀkhī-ū. ǀGoa-i di ǁkhāsib ge xoaǁguisa ǁgaragu ǃoa nîra ǀnōhe. Pristeri ge ǁguiba-ao-e ǂkhîbagus ǁguibasa nî dība ǀūǂamse i ge dī ǁoren ǃaroma, tsî-i ge ǁoren â-e nî ǀûbahe. 19 Nēs ge ǃKhūb ǃoagu i ge ǁî-e dī ǁoren matare-oas ǁguibasa.
© Khoekhoegowab Elobmîs © Bible Society in Namibia, 2020.
