ǃOataras tsî ǀgoraǃgâ-aob tsîra di ǂkhōs*
1 Jesub ge ǁîb ǁkhāǁkhāsabega* ǂkhō-e ge ǁgamba, ǁîgab nî ǁkhāǁkhāse, khoe-i hūgaǀgui nî ǀgorehâhâ tsî ǂkhabuǂâi tidesa. 2 “ǂAnǂansa ǃās ǃnâb ge Eloba ǃaoǃgâ tama tsî khoen tsîna ǃgôasi-e ge ūhâba tama ǀgoraǃgâ-aoba ge hâ i. 3 ǁKhā ǃās ǃnâs ge ǃoatarasa ge ǁan hâ i. ǁÎs ge ǃnuriǃnādi kōse ǁîb ǃoa hā tsî ǁîb tawa ‘Ti ǂhanu-aisiba ǂnoaguba te re, ti mâǃoa-aob ǃoagu!’ ti gere mî. 4 Gaxu ǁae-eb ge nē ǀgoraǃgâ-aoba ge ǂkhā, xawe ǀunis ai ǁîb ǂûb ǃnâ ge mî: ‘Eloba ta ga ǃaoǃgâ tama i tsî khoena ǃgôa tama i, 5 xawe hoa ǃgomsigu nē ǃoataras ra mā te gu ǃaroma ta ge nî dī ǁîsa ǁîs ǂhanugas nî hōsa. ǁNāsa ta ga dī tama i, os ge ega hā nî ǂkhaba-ū te!’ ”
6 Ob ge ǃKhūba ǃaruǀî ge mî: “ǃGâ, tare-eb ǁnā ǂhanuoǃnâ ǀgoraǃgâ-aoba ra mîsa. 7 O Eloba ǁnâi ǁîb di ǃkhōǂuisaben, tsēs tsî tsuxub tsîna huib ǃaroma ǁîba ra ǂgaiǀîna ǂhanu-aisiba hā-ūba tide? ǁÎba ǁîna huis ǀkha ǀhaweb nî? 8 Mîba du ta ra, ǃhaeseb ǁîna ǂhanu-aisiba nî mā ǃkhaisa. Xawe Khoen Ôaba hāb kao ǂgom-e hōb nî ǃhūbaib ai?”
Fariseb tsî ǁgui-aimariǃkhōǃoa-aob* tsîkha di ǂkhōs
9 Jesub ge ǁkhāti ǁnān hîa ǂgomǃgâsen hân, Elob aiǃâ a ǂhanun tsî nauna sora hân ǃaroma nē ǂkhōsa ge ǁgae. 10 “ǀGam khoekha ge Tempeli ǃoa ǀgore nî sīse ge ǃgû. ǀGuib ge Fariseba tsî naub ge ge ǁgui-aimariǃkhōǃoa-ao* i. 11 Fariseb ge ǀguri sī mâ tsî ǁîb ǂûb ǃnâ nēti ge ǀgore: ‘Elotse gangan tsi ta ge ra nau khoen khami ta ī tama ǃkhaisa. ǃNari-aon, gāxaǃnân tsî ǃgamekhôa-aon khami, tsî ta ge ǁkhāti ra gangan, ǁnā mâ ǁgui-aimariǃkhōǃoa-aob khamis tsîna ta ī tamasa. 12 ǀGam ǃnāra ta wekheb ǃnâ ǂûtama* hâ tsî ū ta hân hoana xu disiǁîǃâsa ra mā.’ 13 Xawe ǁgui-aimariǃkhōǃoa-aob ge ǃnūse ǁîba xu mâ tsî ǀhommi ǃoa kōkhâis tsîna ge ǂgao tama hâ i, xawe ǃoa hâse ǁkhaib âb ai ǂnau tsî ge mî: ‘Elotse, ti ǁore-aota ǀkhomxa re!’ ” 14 Ob ge Jesuba ge mî: “Mîba du ta ra nē ǁgui-aimariǃkhōǃoa-aob ge Elob ǀkha ǂhanu-ai kaihe hâse ge ǁaru xawe Fariseb ose. ǀGapiǀgapisen ra-i hoa-i ge nî ǃgamǃgamhe tsî ǃgamǃgamsen ra-i hoa-i ge nî ǀgapiǀgapihe.”
Jesub ge ǂkhari ǀgôarona ra ǀkhae
(Mateub 19:13-15Markub 10:13-16)15 ǀNî khoen ge ǁîn di ǂkhari ǀgôarona Jesub ǃoa ge ǀkhī-ū, îb ǁîna ǃomkha ǁgui-ai. ǁKhāǁkhāsabegu ge ǁîrona ge ǀkhī-ūna mû tsî ǁîna ge ǃgabe, 16 xaweb ge Jesuba ǀgôarona ǁîb ǃoa ǂgaiǀgū tsî ge mî: “An ǀgôarona tita ǃoa hā, î ǁîna tā ǂhani, nēti īn dib kom Gaosib Elob dibao. 17 ǂÂis ǃnâ nēsa ūhâ re! Elob Gaosiba ga ǀgôaro-i khami ǃkhōǃoa tama i-i ge amase ǁîb ǃnâ ǂgâ tide.”
ǃKhū hâ khoeb
(Mateub 19:16-30Markub 10:17-31)18 Jodeǁî danaǂgaeǂgui-aob ge Jesuba ge dî: “ǃGâi ǁKhāǁkhā-aotse, tare-e ta kha nî dī, ǀamo ûiba ta nî hōse?”
19 Ob ge Jesuba ge ǃeream bi: “Tare-i ǃaromats ǃgâi ti ra ǂgai te? Khoe-i xare-i ge ǃgâi tama hâ, Elob ǀguib. 20 Sats ge mîmādi ‘ǃGamekhôats ge tide; ǃgamts ge tide; ǃnarits ge tide; khoe-ets ge ǂkhabase ǂgā-am tide; sa îb tsî sa îs tsîrats ge nî ǃgôa’ ti ra mîde a ǂan.”
21 Ob ge nē ǂkham khoeba Jesuba ge ǃeream: “ǂKhamsisa xu ta ge nē mîmādi hoade ǃkhōǀgaipe hâ.”
22 Jesub ge nēsa ǁnâu, ob ge ǁîb ǃoa ge mî: “ǀGui xū-ets ge tôasi hâ. Ūts hân hoana sī ǁamaxū, î marisa ǀgâsana mā, ots ge ǁuiba ǀhommi ǃnâ nî ūhâ. Tsî ǁnās khaoǃgâ hā, îts tita sao.” 23 Tsî nēsab ge ǁnâu, ob ge nē khoeba kaise ge ǃoa, kaiseb ge ǃkhū hâ i amaga.
24 Tsî Jesub ge ǃoab ra ǃkhaisa mû, ob ge ge mî: “Mâtikōse i kha a ǃgom, ǃkhū hâ khoen ǃaroma Elob Gaosib ǃnâ ǂgâsa! 25 Kaise i ge ǃnaiba nî supuba nali ās ǃnā-u ǃkharusa, ǃkhū hâ khoe-e Elob Gaosib ǃnâ ǂgâs xa.”
26 On ge ǁnâu gena ge dî: “Tari-e ǁnâi nî sâuhe?”
27 Ob ge Jesuba ge ǃeream: “Khoena a īǁoasaban ge Elob tawa a īǁkhā.”
28 Ob Petruba ge mî: “Kō re, sige ge ū ge hân hoana ǁnāxū tsî satsa ge sao.”
29 “Ā” tib ge Jesuba ge ǃeream: “Tsî nēsa ta ge ra ǁapoǁapoba go: Amase i ga khoe-e Elob Gaosib ǃaroma oms, taras, ǃgâsagu tamas ka io ǁgûra tsî ǀgôan hoana ǁnāxū, 30 o-i ge nē ǁaeb ǃnâ ǂguiǃnâguse nî hō-oa tsî ǃgoaxaǁaeb ǃnâ ǀamo ûiba.”
Jesub ge ǃnonaǁî ǃnāsa ǁîb ǁōb xa ra ǃhoa
(Mateub 20:17-19Markub 10:32-34)31 Jesub ge disiǀgamǀa ǁkhāǁkhāsabega ū tsî ǁîgu ǃoa ge mî: “Mû, Jerusalems ǃoa ge ge ra ǃgû, tsîn ge hoa xūn kēbo-aogu ge Khoen Ôab xa xoana ǁnāpa nî dīǀoaǀoahe. 32 ǁÎb ge Jodeǁî tamana nî māǁnâhe, ǁîba ǃhō, mîǁgaiǁgai tsî nî ǂara-aina. 33 ǁÎn ge ǂnau tsî nî ǃgam bi, xawe ǃnonaǁî tsēs aib ge ǁōba xu nî khâimâ.”
34 Xawe gu ge ǁkhāǁkhāsabega nēn xa xū-i xare-e ge ǃkhā tama hâ i, mîdi ge ge ǂganǃgâsaba gu i tsî gu ge tare-i xab ra ǃhoa ǃkhaisa ge ǁnâuǃā tama hâ i.
Jesub ge ǂgī ǀkhope-aoba ra mû kai
(Mateub 20:29-34Markub 10:46-52)35 Tsî Jesub ge Jerixosa ǀgū, ob ge ǁnāpa ǂgī khoeba daob xōǀkhā ge ǂnôa i, ǀkhope rase. 36 ǂNubis khoen ra ǃkharu ǃkhaisab ge ǁnâu ob ge “Tare-e ra ī?” ti ge dî.
37 “Jesub Nasaretǁîb ge nēpa-u hā ra ǃkharu” tin ge ge mîba bi.
38 Ob ge ǃgari dommi ǀkha ge ǂgai “Jesutse, Davidi Ôatse, ǀkhomxa te re!” ti.
39 Ais ai ge garu i khoen ge ǃgabe bi tsî ge ǃnō kai bi. Xaweb ge ǃaruǀîǀgui ǃgarise “Davidi Ôatse, ǀkhomxa te re!” ti ge ǂgai. 40 Ob ge Jesuba mâ tsî ge mîmā, îb nē ǂgī khoeba ǁîb ǃoa hā-ūhe. Tsî ǀgūb ge ob ge Jesuba ge dî bi: 41 “Tare-e ta nî dība tsi ǃkhaisats kha ra ǂgao?”
“ǃKhūtse, mû ta nî ǃkhaisa ta ge ra ǂgao” tib ge ge ǃeream.
42 Ob ge Jesuba ǁîb ǃoa ge mî: “O ǁnâi mû re! Sa ǂgoms ge go ǂgauǂgau tsi xuige.”
43 Tsîb ge ǁnātimîsi ge mû ǁkhā tsî Jesuba sao tsî Eloba gere gangan. Tsî nē ǂnubis khoen ge nēn hoanan ge a mû, o Eloba ge koa.
© Khoekhoegowab Elobmîs © Bible Society in Namibia, 2020.
