1 Sige ge Elob di sîsenǁare-aoge ase khoexaǃnâse ra ǂgan du, î du tā Elob di ǀkhomma ǁause ǃkhōǃoa, 2 nētib ra mî xui-ao:
“Ūǃoahesa ǁaeb ǃnâ
ta ge ge ǁnâu tsi
tsî ǃgâiǃōsib di tsēs
ai ta ge ge huiǂui tsi.”
Mû, nēb ge Elob ǀkhomma ūǃoas di ǁaeba, nēs ge ǃgâiǃōsib di tsēsa.
3 Sige ge ǃoabas âge nî tsūse ǂgā-amhe ǃkhaisa ǂgao tama hâ, ǁnā-amaga ge ge ra ǁgū, îs tā ǃnôa-aiǃnaose khoe-i xare-i di daob ǃnâ hâ. 4 Xawe ge ge hoan ǃnâ Elob di ǃoaba-aoge ase ra koasen. ǁNāsa ge ge ǃnāsa mâǃkharus ǀkha ǃoab ǃnâ, tsūǀkhāgu ǃnâ tsî ǃgomsigu ǃnâ ra dī. 5 Sige ge ǂnaudi, ǃkhōsis tsî khâikhâisendi, ǃgom sîsengu, ǁomǁoas tsî ǃâs ǀkha hâs ǃnâ ge hâ i. 6 Sige ge ǃanusib, ǂans, ǃnūǃnâxasib tsî ǃgâisib ǀkha Elob di ǃgāge ase, ǃAnu Gagab ǀkha ama ǀnammi ǃnâ ra ǁgausen. 7 Mîs amab dis tsî ǁkhāti ǀgaib Elob dib ǃnâ. ǁÂtanin ǂhanu-aisib din ǀkha amǀkhāb tsî ǁareǀkhāb ǁôab ǃnâ, ǁnāǂam-ū tsî nî ǁkhāti ǁkhaebasenūse. 8 ǀNî khoen ge ra ǃgôasiba mā ge tsî ǀnîna ǃgôaoǃnâsiba. ǀNîn ge tsū xūna sige xa ra mî tsî ǀnîna ǃgâi xūna. ǀNîn ge ǂhumi-aoge ti ra mî, xawe ge ge amaba ra ǃhoa. 9 ǂAnsabe tamase, xawe hoan xa ǂanhese. ǁŌb ǀgūse ge ge hâ i, xawe ge ge a ûitsama, ǂnauhe ra, xawe ǃgamhe tamase, 10 ǃoa ge ra xawe ge hūgaǀgui ǃgâiaǂgaob ǃnâ hâ, ǀgâsaǃâ, xawe ge ǂguina gagasise ra ǃkhūǃkhū tsî ge xū-i xare-e ūhâ tama, xawe hoana ūhâse.
11 Korinteǁîdo, ǂhauǂgaruse sadu ǀkha ǃhoa tsî ge ge sige ǂgaoga harase sadu ǃoagu ge ǁkhowa-am. 12 Sige ge sige di ǀnamtsâsiga sadu ǃoagu ǃkhō-oa tama hâ, xawe du ge sado sige ǃoagu ra ǃkhō-oa. 13 Ti ôan ǃoa ta ra ǃhoa khami ta ge ra ǃhoa-ū du: Sadu ǂgaoga ǁkhāti harase ǁkhowa-am.
ǀŪben ǃoagu hâ ǃkhâikhoms
14 Tā ǂgomoǃnân ǀkha ǀgui jokhoesa ǂgae. Mâ ǃgaeǁaresab kha ǂhanu-aisiba ǁgauoǃnâsib ǀkha ūhâ? Tsî mâ ǀhûǁaresab kha ǃnâba ǃkhaenab ǀkha ūhâ? 15 Tsî mâ ǃgaeǀhaosab kha Xristuba* ǁgâuab ǀkha ūhâ? Tsî mâ amǃnâ-e-i kha ǂgomsabe-e ǂgomoǃnâ-i ǀkha ūhâ? 16 Tsî mâ ǁnâuǃāgu-eb kha Elob Tempela ǁgôa-elon ǀkha ūhâ? Sadu kom ûitsama Elob di Tempeldo, Elob ǂûb ge mî khami:
“ǁÎn ǃnâ ǁan,
ǁîn ǃnâ ǃgû
tsî ta nî ǁîn di Elo
tsîn nî ǁîna ti ǁae kai.”
17 ǁNā-amaga
“ǁÎna xu ǃgû,
î du ǁîna xu ǀgora” tib ra ǃKhūba mî.
“Î du ǃanuoǃnâ-i xare-e tā tsâǀkhā,
o ta ge nî ūǃoa du.
18 Tita ge nî sadu Î
tsî du ge sado nî ti ôa,
tib ra Hoaǀgaixa ǃKhūba mî.”
© Khoekhoegowab Elobmîs © Bible Society in Namibia, 2020.
