Egipteba xu Moab ǁga hâ ǃgûs
1 Sao radi ge doedi Israeli ôan, Egipteba xu ge doeǂoan dide, ǁîn di ǂnubidi ǃoa, Moseb tsî Aron hâkha ǂgaeǂguis ǃnaka. 2 ǃKhūb di mîmās ǃoab ge Moseba mâ ǃkhais hîan gere ǂnaumâis hoas di ǀonsa gere xoamâi.
3 Israelǁîn ge disikoroǀaǁî tsēs kurib di ǂguro ǁkhâb dis ai Egipteba xu ge doeǂoa, ǁnās ge Pasxaǁâudīb tsēs khaoǃgâ hâ tsēs aisa. ǃKhūb di sâub ǃnakan ge ǁîna hoaraga Egipteǁîn di mûǁae kaiǃās Ramesesa xu ge ǃgû. 4 ǁNā ǁaeb ain ge Egipteǁîna ǁîn di ǂguroǃnaesagu ǃKhūb ge ǃgamga gere ǁkhō. Nē dīǃkhais ǀkhab ge ǃKhūba ǁîb a Egipteb di elogu xa ǀgaisa ǃkhaisa gere ǁgau.
5 Israelǁîn ge Ramesesa xu ǃgû tsî Sukots tawa sī hâǃkhaiba ge ǂnaumâi. 6 Sao rasen ge ǁîna Etams, ǃgaroǃhūb di ǀnomam ge ǁgoe is tawa sī hâǃkhaiba ge ǂnaumâi. 7 ǁNāpa xun ge ǁîna Pi-Hahirots, Baal-Sefons aiǂoasǀkhāb ai ǁgoes ǁga oahā, tsî Migdols ǀgūse ge hâǃkhaiba ǂnaumâi. 8 ǁÎn ge ǃaruǀî Pi-Hahirotsa xu ǃgû tsî ǀApahurib ǃnâ-ū ǃkharu tsî Etamǃgaroǃhūb ǃnâ ge ǂgâ; ǃnona tsēdi ǀgaiba ǃgû tsîn ge ǁîna Maras tawa sī hâǃkhaiba ge ǂnaumâi. 9 ǁNāpa xun ge Elims tawa sī hâǃkhaiba ge ǂnaumâi, disiǀgamǀa ǁgamǀaudi tsî hûdisi palmhaidi tsîn ge ǁnāpa hâ i xui-ao.
10 Elimsa xu dāǁnâ tsîn ge ǀApahurib ǀgūse sī hâǃkhaiba ge ǂnaumâi. 11 ǁNāpa xun ge Sinǃgaroǃhūb ǃnâ sī hâǃkhaiba ge ǂnaumâi. 12 Sao rasen ge Dofkas tawa sī hâǃkhaiba ge ǂnaumâi, 13 tsî ǁnāpa xu Alus tawa. 14 ǁNās khaoǃgân ge Refidims, ǁîn nî ā ǁgam-i tsîna ge ūhâ tama hâ is tawa sī hâǃkhaiba ge ǂnaumâi.
15-37 Refidimsa xu Horǃhommi ǁga garu daob ain ge ǁîna sao ra ǃkhaidi ai hâǃkhaiba ge ǂnaumâi: Sinaiǃgaroǃhūb, Kibrot-Hatafas (tamas ka io “Turab ǀHobadi”), Haserots, Ritmas, Rimon-Peres, Libnas, Risas, Kehelatas, Seferǃhommi, Haradas, Makelots, Tahats, Teras, Mitkas, Hasmonas, Moserots, Bene-Jakans, Hor-Hagidgads, Jotbatas, Abronas, Esiongebers, Sinǃgaroǃhūb (ǁnās ge Kadesa), tsî Horǃhommi Edomǃhūb di ammi ai sī ǁgoesa.
38-39 ǃKhūb di mîmās aib ge prister Aronna Horǃhommi ai ge ǂoa. ǁÎb ge ǀguikaidisi tsî ǀgamdisiǃnonaǀa kurixab a hîa ǁnāpa ge ǁō, Israelǁîn ge Egipteba xu doeǂoas khaoǃgâ, hakadisiǁî kurib koroǁî ǁkhâb di ǂguro tsēs ai.
40 Arads di gao-aob Kanaanni ǃkhawagasǀkhāb dib ge Israelǁîn ra hāsa ge ǁnâu.
41-49 Horǃhomma xu Moabǂgāgu ǁga garu daob ain ge Israelǁîna sao ra ǃādi ai hâǃkhaiba ge ǂnaumâi: Salmonas, Punons, Obots, Lim-Abarims di ǃhomxa ǀkharib Moabǁîn ǀkharib ǃnâ, Dibon-Gads, Almon-Diblataims, Abarimǃhomgu Neboǃhommi ǀgūse ǁgoegu tsî Moab ǃgoaǃnāgu Jordanǃāb ǃoagu Jerixos ǀkhāba xu ǁgoegu ǃnâ, Bet-Jesimots tsî Akasiaǃgoaǃnāb tsîra ǁaegu.
ǁGui-aidi Jordanǃāba ǃgâus aiǃā
50 Moabǂgāgu Jordanǃāb ǃoagu Jerixos ǀkhāba xu ǁgoegu ǃnâb ge ǃKhūba Moseba 51 sao ra ǁgui-aide Israelǁîn ǃaroma ge mā: “Jordanǃāba du ga ǃgâu tsî Kanaanǃhūb ǃnâ sī, 52 o du ge hoaraga ǁanǂgāsaben ǁnā ǃhūb ǃnâ hâna nî doeǁgaǂui. ǁÎn di ǀui tsî ǀuri-īgu tsî ǁîgu ra ǃoabaǃnâhe ǃkhaigu hoaga hîkākā. 53 ǃHūba ūbasen î ǁanǃnâ, tita ra ǁîba mā du xuige. 54 ǂNōgusa aos ǀkha ǃhūba ǃkharagagu ǃhaodi tsî ǃhaoǃnādi tsîn ǁaegu ǀgora, kai ǃhūba kai ǃhaosa mā, tsî ǂkharisa ǂkhari ǃhūba mā. 55 Xawe du ga ǃhūb di ǁanǂgāsabena doeǁgaǂui tama i, on ge ǁîna mûs ǃnâ hâ ǃnaoǃâro-i tamas ka io ǁgans ǃnâ mâ ǁkhūb khami ī, tsî sadu ǃoagu nî ǃkham. 56 ǁÎna du ga doeǁgaǂui tama i, o ta ge sado nî hîkākā, ǁîn ǃaroma ta ge ǀape hâ i khami.”
© Khoekhoegowab Elobmîs © Bible Society in Namibia, 2020.
