1 ǁNān ǂhanuoǃnâ ǂhanuga ra dīn ge ǀâxarexūsa, ǁnān nau khoena ra ǁgâiǀā ǂhanumāde ra dīna. 2 ǁNān ǂhâb ǃnâ hâna ǂhanu-aisiba xu ra ǁkhaebēn tsî ǀgâsana ǁîn di ǂhanuga ra ǀhanana. ǁÎn ge ǃoatarade xu ǃnari tsî ǃguniǀgôan xūna ra ǀhana. 3 ǀGoraǃgâtsēs ai tare-e du nî dī, hîkākāhes ga ǃnūseba xu hāo? Tari-i ǃoats kha ǃgomsib tsēs ai nî ǁhâ? Mâpa du sadu ǃkhūsiba nî sâu? 4 Sadu nî ǃkhoe ǃkhai-i ǀkhai, xawe du ǃkhōsaben ǀkha nî ǃhon tamas ka io ǃgamhe hân ǀkha nî ǃgamhe. Xawes tsînab ge ǃKhūb ǁaiba bē tide; ǁîb ǁôab ge sadu ǃoagu ǀhōǂuisase hâ.
Asiriab gao-aob Elob xa ǁâtanise ra sîsenūhe
5 Asiriatse, ti ǁaib di ǁnâuhaitse, ti ǁaixasib ǃnâ ta ra ǂnau-ū ǃnabatse! 6 Asiriaba ta ge eloxoresa ǁaes ǃoagu ge sî, ǁîba ta ge ǁaixa-ū ta hâ khoen ǃoagu ge mîmā. ǁÎnab nî ǀhana tsî ǃnari-aise, ǁînab ǃganni ǃnâ ǁgoe ǂgoab khami nî dāǃgâse.
7 Xawe Asiriab gao-aob ge nēs ǀkha ǃgûǀhao tama hâ, tamas ka iob ge ǁîba ǁnāti ǂâibasen tama hâ; ǁîb ǂâibasens ge ǁîna hîkākā tsîb ǂgui ǁaede hoaragase nî dītoasa. 8 Amaseb ǁîba ra mî xui-ao: “Ti ǂamsagu hoaga kha gao-ao tamaga? 9 Kalnosa ta Karkemis khami dan tama tsî Hamatsa Arpads khami? Samariasa ta Damaskus khami dan tama? 10 Ti ǁôaba ta ge ǁgôa-elogu xa ge gaoǂamhe hâ i gaosigu hoagu ǂama ge ǀhōǂui, ǁnā gaosigu Jerusalems tsî Samariab tsîra ǃnâ ge hâ i īgu xa ǂgui īga ge ūhâ iga. 11 Samariab tsî ǁîb īga ta ge hîkākā khami ta Jerusalems tsî ǁîs ǁgôa-elogu tsîna a dī-ū ǁoa?”
12 Xaweb ga ǃKhūba Sionǃhommi tsî Jerusalems tsîra ǃnâb ra dīn ǀkha toa, ob ge ǂnīǂnīsenxa koasens Asiriab gao-aob dis tsî ǁîb di karokarosens tsîna nî ǁkhara.
13 ǁÎb ra mî xui-ao: “Ti ǁôab di ǀgaiba xu ta ge nēsa go dītoa, ti ǁnâuǃāb tsî gā-aisib tsîkha ǀkha. Khoen ǁaegu ge hâ i ǃhūǀgorade ta ge ūbē tsî ǁîn di ǁuiba ge ǀhana; ǀgaisa danaob khami ta ge trondi ai ge ǂnôa ina ge ūǁnâ. 14 Ti ǃommi ge ǁaedi ǃkhūsiba aniron ani-omros ǃnâ hân khami ge hō tsî ǁnāxūhe hâ ǃupun ra ǀhaoǀhaohe khami hoaraga ǃhūbaiba ge ǀhaoǀhao. ǁÎ-i ǁgaboba ge ti ǃoagu ūkhâi tamas ka io amsa ge ti ǃoagu khowa-i tsîn ge ge ǀkhai i.”
15 Xaweb ge ǃKhūba ge mî: “ǃŌsa ǁîs di ǁhā-aob xa kai ǁkhās a, tamas ka io saxaba ǁîb di saxa-aob xa kai ǁkhāb a? Haiba ǁnā-i ǁîba ra ūkhâi-e sabu ǁkhāb a; tsî ǂāba ǁîba ra sîsenū-e ūkhâi ǁkhāb a?”
16 ǁNā-amagab ge ǃKhūb Hoaǀgaixaba ǂgausib ǃnâ hâ khoen ai ǀaeba ǁkharab ase nî mîmā. ǁÎb gao-aosi ǂkhaisib ge ǀanni khami nî khâi. 17 Israeli di ǃnâb ge nî ǀae kai tsî ǁîb di ǃAnuba nî ǀaeǁhabu kai; ǁîb ge ǂhubi tsî Asiriab gao-aob ǀkhininidi tsî ǁkhūn tsîna ǀgui tsēs ǃnâ nî ǂhubiǂui. 18 Îsa haiǀgoms tsî ǂûtanixa ǃhanagu tsîn ge hoaragase ǃKhūb xa nî hîkākāhe, ǀoms tsî soros tsîra tsîn, ǀaesen hâ khoe-i ra kā khami. 19 Kaise ǀoro haidi, ǀgôaro-i tsîn xa ǃgôahōhe ǁkhādi ǀguidi ge ǃgarob ǃnâ nî ǃgau.
Ûiǃgau gen ǀguin ge nî oahā
20 ǁNā tsēs ain ge Israeli ǃnâ ge ûiǃgau khoen tsî Jakob ommi din tsîna ǃaruǀî ǁîna gere ǁgaise ûi-ū ǃhao ǂgaeǂgui-aob ai ǂgomǃgâ tide, xawe amab ǃnâ ǃKhūb, Israeli di ǃAnub ai nî ǂgomǃgâ. 21 Ûiǃgau ge khoen Jakob ommi din ge ǀgaisa Elob ǃoa nî oahā. 22 Sadu khoen Israeli din ga hurib di ǃhūb khami ǃgôaheǁoase ǂgui, xawen ge ûiǃgau nî ǀoro khoen ǀguina nî oahā. Hîkākāhes ge ǀnai ǁguibēhe hâ; ǂhanu-ai ǀgoraǃgâs ge ǃnāǂamsase nî hā. 23 ǃKhūb Elob Hoaǀgaixab ge hoaraga ǃhūbab nî hîkākāse ǂhomisen hâ.
ǃKhūb ge Asiriaba nî ǁkhara
24 ǁNā-amagab ge ǃKhūb Elob Hoaǀgaixaba ra mî: “Ti khoedu Sions ǃnâ ǁan hâdo, tā Asiriaǁîn ga Egipteǁîn ge dī hâ i khami haib ǀkha ǂnau du, o ǃao. 25 ǂKhari ǁaerob ǀguibab ge ti ǁaixasiba nî toa tsîb ge ti ǁaiba ǁîna nî hîkākā. 26 Tita, ǃKhūta Hoaǀgaixata ge Midiaǁîna ta ge Orebǃgareǀuib tawa ǂnau khami ǁîna ti ǃnabas ǀkha nî ǂnau. Egipteb ǃnâ ta ge dī khami ta ge ǁîna nî ǂnau. 27 ǁNā ǁaeb ga hā, o ta ge Asiriaǁîn ǁgâiǀāba xu nî ore du tsî ǁîn ǃnaob ge ǃaruǀî sadu ai ǁgâi tide tsî nî hîkākāhe.”
ǁNāǂgâ-aob ra ǁnāǂam
28 ǁNāǂgâ-aob ge Aisa ǁnāǂam tsî Migrons ǃnâ-u ge ǃkharu, ǁîn ǃkham-ūxūnan ge Mikmas tawa ge sâu. 29 ǁÎn ge ǁharuǃkhaisa-u ǃkharu tsî Gebas tawa ǁnā ǃuisa ge ǁom; Ramas ge ǃaob xa ge xāǂgāhe tsî Gibeas Sauli dis di khoen ge ge ǃkhoeni. 30 Galims ôase ǂgaiǂui re! Laisase ǃgâise ǃgâ re! Anatotse ǃeream re! 31 Madmenas ge ra ǃkhoeni, Gebims ǁanǂgāsaben ge ǁîn ǃnorasasib ǃaroma ra ǃkhoeni. 32 Nētsēs ǂûs ain ge Nobs kōse nî sī; Sionǃhommi ôas, Jerusalems di ǃnâub ain ge ǃomdi ana ǀgapise ra ami.
33 ǃKhūb Hoaǀgaixab ge ǁîna haisa xu ra ǃgaoǁnâhe ǁnâugu khami ǁîb ǃaoǃaosa ǀgaib ǀkha nî ǃgaoǁnâ. Gaxu tsî ǀgapi haideb ge ǁhāǁnâ tsî haiǃgaode nî ūbē. 34 Kai ǁau haideb ge ǃōs ǀkha nî ǁhāǁnâ tsî Libanonni ge ǁîb ǀgaisa haidi ǀkha ge nî ǁnā!
© Khoekhoegowab Elobmîs © Bible Society in Namibia, 2020.
