ǃKhūb di ǀgoraǃgâs
1 Tita te ǃKhūba altars tawa mâse ge mû, tsîb ge ǁîba ge mî: “ǂGurihaigu danade ǀgaisase ǂnau ǃgaoǃgaogu nî ǀkhūs kōse, ǁîga khôaǁnâ î gu hoaraga khoen di danadi ai ǁnā. Tsî ǃgau ka rana ta ge tita gôab ǀkha nî ǃgam. ǀGui khoe-i tsîn ge ǁhâǂoa tide, ǀgui-i tsîn ge ûiǂoa tide. 2 ǁŌhân Hâǃkhaib kōsen ga khaoǁgôa, xawe ta ge tita ǁîna ǁnāpa nî ǃkhō. ǀHommi kōsen ga ǃapa, xawe ta ge tita ǁîna ǁnāpa xu nî ūǁgôaxa. 3 Karmelǃhommi ǂaob ain ga gau, xawe ta ge tita ǁîna ôaǂui tsî nî ǃkhō. Tita xun ga hurib di ǃgamsib ǃnâ sâusen, o ta ge tita ǀaoba nî mîmā tsîb ge ǁîna nî nâ. 4 Tsî ǁîn di khākhoen xan ga ǃkhōsis ǃnâ ǃgû-ūhe, o ta ge tita gôaba nî mîmā, îb ǁîna ǃgam. Tita ge ti mûsa ǁîn ai nî ūhâ, ǁîn di hîkākāhes ǃoa tsî ǃgâib ǃaroma tama.”
5 ǃKhūb Elob Hoaǀgaixab ge ǃhūbaiba ra tsâǀkhā,
tsîb ge ra tsuni;
ǁîb ai ǁan hân hoan ge ra ǃoa.
Hoaraga ǃhūbaib ge Nylǃāb khami khâi
tsî ǁkhawa Egipteb ǃāb khami ra ǁgôa.
6 ǃKhūb ge ǀgapi hâǃkhaidi âba ǀhommi ǃnâ ra ǂnubi,
tsîb ge ommi âba ǃhūbaib ai ra ǃgaoǃgao.
ǁÎb ge hurib di ǁgamga ra ǂgai,
tsîb ge ǁîga ǃhūbaib ai ra ǁhōǂui.
ǃKhūb tib ge ǁîba ǀon hâ.
7 “Sadu Israelǁîdu ge tita Etiopiaǁîn ǁkhān khami ība,”
tib ge ǃKhūba ra mî.“Tita ge Israelǁaesa Egipteba xu ge doeǂoa kai tsî Filisteǁîna Kretasa xu tsî Siriaǁîna Kira xu. 8 Tita ǃKhū Elota ge nē ǁore-ao gaosisa ra ǃkhē tsî ta ge ǁîsa ǃhūbaiba xu nî hîkākāǃari, xawe Jakob omma ta ge hîkākā tide,”
tib ge ǃKhūba ra mî.9 “Tita ge nî mîmā tsî Israelsa nau ǃhaodi ǁaegu nî ǁgara, ǃhoro-i ǁgaraǃoreb ǃnâ ra ǁgarahes ǁkhās khami, tsîs ge ǀgui ǃhororos xawesa ǃhūb ai ǁnā tide. 10 Ti ǁaes ǃnâ hâ ǁore-aon hoan ge gôab xa nî ǃgamhe, ǁnān hîa ‘tsūǀkhā-i xa da hāǂamhe tide’ ti ra mîna.”
Israels di ǁkhawa ǂnubikhâihes
11 “ǁNātsē ta ge tita ǁnā hâ oms Davidi disa ǁkhawa nî omkhâi tsî ǁîs di ǂapadaoga nî ǂkhauǂgan. Tita ge ǁîs di khôaǂkhūsa ǃkhaide nî ǂnubikhâi tsî ǁîsa ǀoro ǁaeb ǃnâs ge ī-i khami nî dī. 12 Tsîn ge ǁîna ǃgau gen Edommi din tsî nau ǃhaodi din tsîna nî ūbasen,”
tib ge ǃKhūb, nēn hoana nî dība ra mî.13 “Tsēdi ge nî hā,
ǃhūǃgao-aob ǃhoroǃgao-aoba saoǁare
tsî draibedāǃnâ-aob ǃhana-aoba nî sīǃnâba.
ǂAuxûib ge ǃhomga xu nî ǂnâǁgôa,
tsî ǃnâuga xu nî dâuǁgôaxa”
tib ge ǃKhūba ra mî.14 “Tita ge ti ǁaes di mâsiba nî ǀkharaǀkhara.
ǁÎn ge hîkākāsa ǃāde ǂnubikhâi tsî nî ǁanǃnâ;
ǁîn ge draibeǃhanaga ǂgā tsî ǁîgu ǂauxûi-e nî ā;
ǁîn ge ǂûǃhanaga ǂgā tsî ǁîgu ǂûna nî ǂû.
15 Tita ge ǁîna ǃhūb ân ǃnâ nî ǃhana,
tsîn ge ǁnāpa xu ǁkhawa ǃhomǂuihe tide,”
tib ge ǃKhūb sadu Eloba ra mî.© Khoekhoegowab Elobmîs © Bible Society in Namibia, 2020.
