Taras tsî draki*
1 O i ge kai sao-e ǀhomma xu ge hā. Nēs ge tarekhoes hîa sores ǀkha anahe hâsa. ǁKhâb ge ge ǁîs di ǂaiǃnao i tsî disiǀgamǀa ǀgamirodi ǀkha kurusa kron-es ge danas âs ai ge ǂnûi hâ i. 2 ǁÎs ge ge ǀgamǀkhā i tsîs ge tsûb xa gere ǃau, ǁoratsûbas ge ūhâ i xui-ao.
3 Tsî-i ge ǀnî sao-e ǁkhāti ǀhomma xu ge hā. ǁNāpab ge kai ǀapa draki hîa hû danadi, disi ǁnâgu tsî mâ danas hoas ai kronsa ūhâba ge hâ i. 4 ǂAreb âb ǀkhab ge ǃnonaǁîǃâb ǀhommi di ǀgamiron diba ǃkharaǀhao tsî ǃhūbaib ai ge aoǁnâ. Tsîb ge draka taras aiǃâ ge mâ, ǁoratoas ra hîab ǁîs di ôa-e nî hapuse. 5 Tsîs ge ǁîsa ǀgôarob hîa ǀurigaohaib ǀkha hoaraga ǁaede nî gaoǂamma ge ǁora. Xaweb ge nē ǀgôaroba Elob tsî ǁîb di trons ǃoa ge tsububēhe. 6 Tsîs ge ǁîsa ǃgaroǃhūb ǃoa, ǃkhai-i Elob ǂhomiba si hâ-i ǁga ge ǃhū, ǁnāpas ǀguiǀoadisiǀgamkaidisi tsî ǃnanidisi tsēde nî ǃkhōǂhomihese.
7 Tsî-i ge toro-e ǀhommi ǃnâ ge hâ. Mixaeli tsî ǁîb di ǀhomǃgāgu ge draki ǃoagu ge ǃkham tsîb ge draka ǁîb ǀhomǃgāgu ǀkha ge ǃkhamǃoa, 8 xaweb ge draka ge danhe tsî gu ge ǁîb tsî ǁîb di ǀhomǃgāga ǃaruǀî ǀhommi ǃnâ hâsa mā-amhe tama ge i. 9 Kai draki, ǁnā ǀoro ǀaob, ǁgâuab* tamas ka io Satanni* ti ra ǂgaiheb hîa hoaraga ǃhūbaiba ra ǂgaeǂhapub ge ge aoǂuihe. ǁÎb ge ǃhūbaib ǃoa ge aoǁnâhe, hoaraga ǀhomǃgāgu âb ǀkha.
10 Tsî ta ge ǃgari dom-i nēti ǀhomma xu ra mî-e ge ǁnâu:
Nēsisab ge sada Eloba
ǁîb di khoena nî ore!
Tsîb ge ǁîb di ǀgaiba sîsenū
tsî gao-aose nî ǂgaeǂgui.
Tsîb ge ǁîb di Xristuba*
ǃhūbaib ǂamab ūhâ ǁkhāsiba nî ǁapoǁapo.
ǁNāb hîa tsēb tsî tsuxuba
sada di horesa ǂgomsabena
Elob aiǃâ gere ǃnuriǃgâb
go ǀhomma xu aoǁnâhe xui-ao.
11 Tsîn ge ǁîna ǁîb ǂama dansa ge hō,
ǁKhaob di ǀaob tsî ǂhôas hîan gere ǃkhō-ams ǃnâ-u.
ǁÎn ge ǁnātikōse ûib âna ge ǀnam tama hâ i,
ǁōn nî ǃkhaisan nî ǃaos kōse.
12 ǁNā-amaga, ǃgâiaǂgao re
sadu ǀhommi ǃnâ ǁan hâdo!
Xawe sadu ǃhūbaib ai
tsî hurib ǃnâ ǁan hâdo i ge kaise nî tsūba,
ǁgâuab go sadu ǁga ǁgôaxa
tsîb kaise ǁaixa hâ xui-ao,
ǂkhari ǁaerob ǀguibab ūhâ ǃkhaisab ǂan amaga.
13 Tsî ǃhūbaib ǃoab ge aoǁnâhe ǃkhaisab ge mûǂan, ob ge draka aore ǀgôaba ge ǁora khoesa ge ǃgôaǃgon. 14 ǁÎs ge kai ǃariǃkhās di ǁgapokha ge māhe, ǀaoba xus nî ǃgaroǃhūb ǃoa, ǁîs ǂhomibahe hâ hâǃkhais ǃoa ǁkhanase. ǁNāpas nî ǃnona tsî ǃkhare kuriga draki di ǁnāǂamde xu sâusase ǃkhōǂhomihese. 15 Ob ge ǀaoba ǃāb khami ra dâu ǁgamma khoes ǃgâb ai ǀkhabuǂui, îs ga ǁîsa ǃāb xa dâubēhe ǁkhā. 16 Xaweb ge ǃhūba khoesa huib ase ge ība; ǁîb ge ǁkhowa-amsen tsî draki di amǃnâsa xu ra ǂoaxa ǁgamma ge hara. 17 Tsîb ge draka kaise nē khoes ǃoagu ǁaixa tsî nau ôananôagub ǁîs dib ǃoagub sī nî ǃkhamse ge ǃgû, hoan hîa Elob di mîmāde ǁnâuǀnam tsî Jesub ge ǂhaiǂhai amab ǃnâ ǂgomǂgomsana.
18 Tsîb ge draka huri-ammi ai ge mâ.
© Khoekhoegowab Elobmîs © Bible Society in Namibia, 2020.
