ǃKhūsib ai ǂgomǃgâs di gâsis
ǁNaeǃnans ǂgaeǂgui-aob ǃoa: Koraxi ôagu di Psalms
1 Nēsa ǃgâ re hoa ǁaeso!
ǂGaede ǂō re hoa ǁanǂgāsabedu ǃhūbaib dido,
2 hoado, khoe-e ǁaraǂui tamase,
ǃkhū hân kas, ǀgâsan kas hoasa.
3 Ti ams ge gā-aisiba nî ǃhoa
tsîs ge ǂâiǂâisens ti ǂgaob disa nî ǁnâuǃā.
4 Tita ge ǂkhoamîs ǃoa ti ǂgaesa nî ǂō,
harps ǀkha ta ǂganǃgâsa mîsa nî ǁguiǃā.
5 Tare-i ǃaroma ta tsūǃgâb di tsēdi,
khākhoeb di tsūdīgu nî ǃnamiǂgā tede nî ǃao.
6 ǁNān hîa ǁîn ūhâxūn ai ǂgomǃgâ
tsî kai ǃkhūsib ân ǀkha ra koasena.
7 Khoe-i ge ǂanǂansase nau-e a ǁamaǂui ǁoa
tsî Elob ai ǁî-i di ǁamaǂuimarisa matare ǁkhā tide.
8 ǁÎ-e ǁamaǂuis di maris ge kaise ǀgapi
tsî tātsēs tsîna ǂâu tide;
9 ǁîb nî ǀamose ûi tsî
kāǁōsiba mû tidese.
10 Khoe-i hoa-i gā-ai khoen ra ǁōsa ra mû
ǃkhais ǁkhās khamin ge gâna ra kāǁō,
tsî ūhâxūn âna nau khoena ra ǁnāxūba.
11 ǀHobas ge a ǁîn di ǁanǃkhai ǀamos kōse;
ǁîn di hâǃkhai, ǃhaosa xu ǃhaos kōse.
ǂKhari ǃhūǃânan ǁîn di ǀonde ra mā,
12 xawe i ge ǀgui-i tsîna ǃgôasib ân ǃnâ hâhâ tide,
xamarin tsî ǀgurun khamin ge nî hîkākāhe.
13 Nētib ge gâresis di ǂnīǂnīsensa ūhân daoba ra ǀam,
ǁnān hîa gârese ra koasenn di ǀamsa.
14 ǀUiǀnūǀgoan ǀkhas khamib ge ǁŌhân Hâǃkhaib ǃaroma daob âna ǂhomihe hâ;
ǁōb ge a ǁîn di ǃûi-ao.
ǂHanu-ain ge ǁgoaga ǁîn ai nî dā;
sorodi ân ge ǁŌhân Hâǃkhaib xa hapuhes ǃoa ǂhomihe hâ,
ǁîn di mûmûsa hâǃkhaiga xu.
15 ǂAnǂansaseb ge Eloba ti ûiba ǁŌhân Hâǃkhaiba xu nî ore,
ǁîb nî huiǂui te xui-ao.
16 Tā khoe-i ga ǃkhūo ǃao,
ǁî-i oms di ǃkhūsiba i ga ǂguiǂguio.
17 ǁŌ-i ka o-i xū-i xare-e ūsao tide xuige,
ǃkhūsib â-i ǁî-e sao tide xui-ao.
18 Ûib â-i ǃnâ i ga ǁî-aitsama koasen tsî
“ǁÎba du ge ǃgâiǃgâxab a xui-ao nî koa” ti mî,
19 xaweb ge ǁîb aboxan tawa nî sī
tsî ǀamose ǃnâba mû tide.
20 ǃKhūsiba ūhâǃâ a gân ge
ǀgurun tsî xamarin hîa nî kān khami nî hîkākāhe.
© Khoekhoegowab Elobmîs © Bible Society in Namibia, 2020.
