Sirax 14 - Khoekhoegowab New Translation 2020 (KKG20)

1 Khoe-i ga xū-e ǁae tamase mî tama io, o i ge ǃgâiba ra ǁkhorebahe tsî ǀhapixase tsâ tama hâ. 2 Khoe-i ǀhapixase tsâ tama i ge a ǃgâiǃō. ǁÎ-i ge ǂgomǃgâs ǀkha hānîǁaeb ǃnâ ǃgûǂgâ ǁkhā.

ǃEreamxase sa ǃkhūsiba sîsenū

3 ǁÎǂâibasenxa khoe-e ǃkhūs ge ǂhanu tama hâ. ǀGîxa khoe-e tare-e i mari-i ǀkha ra dī? 4 Sa ǃkhūsibats ga sîsenū tama io, ob ge sa ǁōb khaoǃgâ ǀnî khoe-i xa nî sîsenūhe. ǁÎ-i ge sa mari-i ǀkha ǃgâi ûiba nî ūhâ. 5 Tare ǃgâi-eb sa ǃkhūsiba sats ǀkhats ga ǀgîxa tsî sîsenū bi tama io, nauna ǃkhōǂgāba hâ? 6 ǁÎn di mari-e sîsenū tama khoen ge nau khoen hoan ǃgâ-ai a ǀgîxa. ǁÎn ge ǁnās ǀkha aitsama ra ǁkharasen. 7 ǁNāti ī khoe-i ga ǃgâi xū-e dī, o i ge ǁnāsa ǂâibasen tamase ra dī. ǁÎ-i di ǁîǂâixasib ge nēsi tamas ka io ega nî ǃgāsa. 8 ǁÎǂâixa khoe-i ge ǂkhaba khoe-e tsî ǂhâ hâ khoen ai ǁâba ra dawa-e 9 tsî ū-i hâ i ǀkha ǂâu tama-e. Xūǃgunuxasib ge khoe-i di ûiba nî ǀgomǂui. 10 ǀNî khoen ge ǁnātikōse ǀgîǃnâ tsî ǁîn di ǂhunuma omaris tsîna ǂûmā tama hâ.

11 Ti ôatse, sa ǁkhāsib ǃoa ǃgâise sîsenūsen tsî ama ǁguibade ǃKhūba hā-ūba. 12 ǀGuitsēts nî ǁō ǃkhaisa ǂâis ǃnâ ūhâ, xawets ge noxopa mâ ǁaes ǁnāsa nî ī ǃkhaisa mîbahe tama hâ. 13 ǁNā tsēs nî hās aiǃâ sa ǀhōsana ǃgâina dība, î ǁkhāts as kōse māǂgaoxa. 14 Tā ǀgui tsēs di ǃgâib tsîna ǂoaǃnâ. Xū-ets ga dī ǂgao tsî i ga ǂhanu, o aiǃgû. 15 ǀGuitsēn ge sats ge sîsenba xūn hoana ǀgorahe tsî ǀnî khoena nî māhe. 16 ǁNā-amaga māǂgaoxa, xawe nauna xu ǃkhōǃoas tsîna māsenxa. ǀGuis khami ī ǃgâi-i tsînats ǁŌhân Hâǃkhaib ǃnâ ǃkhōǃoa tide xuige ǃgâiǃgâisen. 17 Sada sorodi ge sada saran khami ī; ǁîn ge ra ǀoro. Nēs ge aibekam ǂhanub “ǁŌts ge nî” ti ra mîba ra ǁnâuǀnam. 18 Khoeda ge ǂgui haiǂnaregu, ǀgom hais ai hâgu khami i. Sada xan ra ǀnîna ǁō tsî ǀnîna ǃnae khami gu ge ǀoro haiǂnarega, ǀasagu xa ra ǃkhōǃkhunihe. 19 Xū-i hoa-i khoesi ǃommi ǀkha ge kuruhe i ge ǁî-e ge kuru-i ǀkha ǁgao tsî nî kā.

Gā-aisiba ūhâs di ǃgâiaǂgaob

20 ǂKhî khoe-i hîa Gā-aisib ǀkha tsî ǃgâi ǀgaub ai ra sîsen-i ge ra ǂâiǂhansen. 21 Khoe-i hîa Gā-aisib di daoga ra ǁkhāǁkhāsen-i ge ǁîb di ǂganǃgâsigu tsîna nî ǁkhāǁkhāsen. 22 Gā-aisiba ǃau-aob hîa ǀgurun tsî xamarin tsîna ra kō-ôab khami ôa. 23 ǁÎb di mûǂuidaodi ǃnâ kō tsî ǁîb di dao-amdi tawa ǃgâ. 24 ǀGūse ǁîb di oms tawa sa tentomsa ǂnaumâi, 25 ots ge ǃgâi ǃkhaiba ûits nîga nî ūhâ. 26-27 Sa omsa ǁnāpa, ǁnâugu ǃnaka, sâuhe tsî ǀgamma xu somsomhe hâse om.