ǃGaeǀhaos ǂGaes ge ra sî-oahe
1 Hû kurigas ge ǃGaeǀhaos ǂGaes ǃKhūb disa Filisteǁîn di ǃhūb ǃnâ hâs khaoǃgân 2 ge Filisteǁîna pristergu tsî aimûǀgaru-aogu tsîna ǂgai tsî ge dî: “Tare-e da ǃGaeǀhaos ǂGaes ǃKhūb dis ǀkha nî dī? Mîba da re mâti da ǁîsa ǁîs di ǃkhais ǂûs ǁga nî sî-oa ǃkhaisa.”
3 O gu ge ge ǃeream: “ǃGaeǀhaos ǂGaes Israeli di Elob disa du ga sî-oa, o du ge ǁîsa ǀkhaexū-i ose sî tide. ǁÎsa du ge sadu ǁoreb ǃaroma ǀkhaexū-i ǀkha nî sî. O du ge ǂgau tsî tare-i ǃaromab gere ǁkhara du ǃkhaisa nî ǂan.”
4 “Mâ ǀkhaexū-e da ǁîs ǀkha nî sî?” tin ge Filisteǁîna ge dî.
O gu ge ge ǃeream: “Koro ǃhuniǀuri īgu tsuidi digu tsî koro ǃhuniǀuri durudi tsîna Filisteǁîn ǂgaeǂgui-aogu kō ǀgaus ǃoa, ǁkhā tsûtsû-ais ǁkhās ge sadu tsî sadu koro ǂgaeǂgui-aogu ǂama hâ i xui-ao. 5 Īgu sadu tsuidi digu tsî durun sadu ǃhūba ra hîkākān tsîn diga kuru, î du ǁnā ǀgaus ai Israeli di Eloba ǃgôasiba mā. ǀNîsib ge ǃaruǀî sadu tsî sadu elogu tsî sadu ǃhūb tsîna ǁkhara tide. 6 Tare xū-i ǃaroma du Egipteǁîn tsî Faraob tsîn ge ǃnâudanaxa i khami nî ǃnâudanaxa? Elob ge ǁîna ǃgomma tsâ kai, on ge ǁîna Israelǁîna ge doe kai. 7 ǀAsa kuni-e nēsi ǂhomi, î ǀgam ǁoragomara, noxopa ǂgāǃaohetsâ tama ra ū, î ǁîra kunis ǃnâ ǂgāǃao, î tsâun âra oms tawa ū-oa. 8 Î du ǃGaeǀhaos ǂGaes ǃKhūb disa ū tsî kunis ai ǃnao, î ǃhuniǀuri xūn, ǀkhaexūn ase du ǃKhūba sadu ǁoren ǃaroma ra māna ǂgaero-i ǃnâ ǁîs xōǀkhā mâi. ǁÎsa ǁnāxū, îs gomara xa aiǃâ ǃkhoe-ūhe. 9 Î du ǃgaoǃgâ; ǁîs di ǃhūb ǃoa garu daob ais ga Bet-Semes ǃoa ǃgû, o da ge a ǂan Israelǁîn Elob a ǃkhaisa, nē kai ǂkhôaba ge sada ǂama hā-ūba. ǁNā tamas ka i, o da nēna ge sîb ǁî tama tsîn ge nēna aitsama a ī ǃkhaisa a ǂan.”
10 On ge Filisteǁîna ǁnāti ge dī. ǁÎn ge ǀgam gomara ū tsî kunis ǃnâ ǂgāǃao tsî tsâun âra ǃharas ǃnâ ge ǂganamǂgā. 11 Tsîn ge ǃGaeǀhaos ǂGaes ǃKhūb disa kunis ai ge ǃnao tsî ǁkhāti ǁnā ǂgaeros ǃhuniǀuri durudi tsî tsuidi di īgu hâǃnâs ona. 12 Tsî gomara ge ǂhanuse daob ǀguib ǀkha Bet-Semes ǁga ge ǃgû, ǃgō garu rase. ǁÎra ge amǀkhābǀîs kas, ǁareǀkhābǀîs kas hoasa daoba xu ge ǁgôa tama hâ i tsî Filisteǁîn di ǂgaeǂgui-aogu ge ǁîra Bet-Semes di ǀkharib kōse ge sao.
13 Khoen Bet-Semes din ge ǃgoab ǃnâ ǃhoroba gere ǃgao, tsî ǃnapetamasen ge kōkhâi tsî ǂgaesa a mû, on ge kaise ge ǃgâiaǂgao. 14 Tsî kunis ge Josuab, Bet-Semes ǁanaob di ǃhanab tawa ge sī tsî kai ǀuis tawa sī ge mâ. On ge khoena kunis haina ǁhāǃā tsî gomara ǂā tsî ǁgan-e khauǁguibase ǃKhūba ge ǁguiba. 15 Nēn ra ī ǁaeb ǃnâ gu ge Leviǁîga ǃGaeǀhaos ǂGaes ǃKhūb dis tsî ǁnā ǂgaeros ǁîs xōǀkhā mâs, ǃhuniǀuri xūn hâǃnâs ona ūǁnâ tsî ǁîra kai ǀuis ai ge mâi. ǁNā tsēs ain ge Bet-Semes khoena khauǁguibadi tsî ǂāǁguibadi tsîna ǃKhūba ge ǁguiba. 16 Tsî koro ǂgaeǂgui-aogu Filisteǁîn digu ge nēna gu ge mûo, ǁnā tsēs ǁkhās ai Ekrons ǁga ge oa.
17 Tsî ǃhuniǀuri tsuidi īgu, Filisteǁîn ge ǃKhūba ǁoreb ân ǃaroma ǀkhaegu ge; ǀguiba Asdods ǃaroma, ǀguiba Gasas ǃaroma, ǀguiba Askelons ǃaroma, ǀguiba Gats ǃaroma tsî ǀguiba Ekrons ǃaroma ge hâ i. 18 Tsî ǃhuniǀuri durudi di īgu ge koro ǂgaeǂgui-aogu Filisteǁîn digu di ǃādi, ǂnubiǂgoaga ūhâdi tsî ūhâ tamadi tsîn ǃaroma ge hâ i. Kai ǀuis, ǁîs ai gu ge ǃGaeǀhaos ǂGaes ǃKhūb disa a mâis ge nētsēs kōse ǃkhō-ams ase Josuab, Bet-Semes dib di ǃhanab ǃnâ mâ.
19 ǃKhūb ge Bet-Semes khoena ǃGaeǀhaos ǂGaes ǃnân ge ǂui ǃkhais ǃaroma ge ǁkhara tsî gu ge hûdisi khoega ǁîn ǃnâ ge ǁō. On ge ge ǃoa, ǃKhūb ge ǁîna kaise ǃgomse ǁkhara xui-ao.
ǃGaeǀhaos ǂGaes Kirjat-Jearims tawa
20 ǁNās khaoǃgân ge Bet-Semes khoena ge mî: “Tari-e a mâ ǁkhā ǃKhūb, nē ǃanu Elob di ais aiǃâ? Mâǀî da ǃGaeǀhaos ǂGaes Elob disa a sî ǁkhā, îs sida xu bē?” 21 Tsîn ge sîsabega Kirjat-Jearims di ǁanǂgāsaben ǃoa ge sî mî raǃâ: “Filisteǁîn ge ǃGaeǀhaos ǂGaes ǃKhūb disa ǁkhawa go hā-ū. Hā, î du ǁîsa ū tsî sado ǃoa ǃgû-ū.”
© Khoekhoegowab Elobmîs © Bible Society in Namibia, 2020.
