ǀGamǁî ǀasa ǀuiǂgapakha
(Deuteronomium 10:1-5)1 ǃKhūb ge Moseb ǃoa ge mî: “Aiǃâ ge hâ i ǀuiǂgapakha khami ī ǀuiǂgapakha ǃgao, o ta ge ǂguro ǀuikha sats ge khôakha ai ge hâ i mîdi ǀguide ǁîkha ai nî xoa. 2 ǁGoaga ǂhomisen, î Sinaiǃhommi di ǂamǃnâb ai ǂoaxa tsî ǀhao-ū te hā. 3 Khoe-i xare-i ge satsa saoǀkhī tide tsî ǁkhāti i ge khoe-i xare-e ǃhommi ai mûhe tide. ǀGoa-i tamas ka io goma-i xare-i ge ǃhommi di ǂai-am ǃû tide.” 4 Moseb ge ǃKhūb ge mîmā bi khami ǀgam ǀuiǂgapakha ǃgao tsî sao ra ǃnauǁgoaga ǁîkha tani hâse Sinaiǃhommi ai ge ǂoa.
5 ǃKhūb ge ǃâus ǃnâ ǁgôaxa tsî ǁnāpa Moseb tawa hā mâ tsî ǁîb di ǃanu ǀons, ǃKhūb ti hâsa ge ǂgaiǂui. 6 ǃKhūb ge Moseb aiǃâ ǃkharu tsî ge ǂgaiǂui: “Tita ǃKhūta ge ǀkhomxasib tsî ǀkhommi xa ǀoa hâ, ǃhaese ǁaixa tama tsî ǃnāǂamsa ǀnammi tsî ǂgomǂgomsasiba ra ǁgau Elota. 7 Tita ge ti hâhâ ra ǀnamma ǀoadisidi di ôananôaguga ra ǁgau, ǁîn di tsūdīgu, ǁnâuǀnamoǃnâsib tsî ǁorena ǀûbas ǀkha. ǁKhāti ta ge ǀgôan tsî ǁnuriǀgôan ǃnonaǁî tsî hakaǁî ôananôagub kōse hâna ǁîn ǁoren ǃaroma ǁkhara tamase hâ kai tide.”
8 ǁNātimîsib ge Moseba ǃhūb kōse danas âba ǃgam tsî ǃKhūba ǀgoreǀî, 9 tsî ge mî: “ǃKhūtse sats ga amase tita ǀkha a ǂkhî, o ta ge ǃnâudanaxa khoeda a xawe sida ǀkhats nî ǃgû ǃkhaisa ra ǂgan tsi. ǁKhāti sida tsūdīn tsî ǁoren tsîna ǀûba, î sa ôada ase ǃkhōǃoa da re.”
ǃGaeǀhaos ge ra ǀasaǀasahe
(Eksodus 23:14-19Deuteronomium 7:1-5Deuteronomium 16:1-17)10 ǃKhūb ge Moseb ǃoa ge mî: “Mû, nēsi ta ge ǃgaeǀhaosa Israelǁîn ǀkha ra dī. ǁÎn di mûǁae ta ge tātsēs tsîna ǃhūbaib di ǃhaodi hoadi xa mûhe tama buruxa dīǃnôana nî dī. Hoaraga khoen ge kai xū-i hîab nî ǃKhūba dī-e nî mû tsî kaise ǃhuriǃhurisa xū-eb ge sadu ǀkha nî dī. 11 Nētsē ta ra mîmā duna ǁnâuǀnam. Mû, o ta ge tita Amorǁîn, Kanaanǁîn, Hetǁîn, Perisǁîn, Hivǁîn tsî Jebusǁîn tsîna sadu aisa xu nî ǁgariǂui. 12 ǂAnbasen î tā nē khoen di ǀgui-i tsîn ǀkha ǀhûǀguitimî-e dī. ǁNāsa du ga dīo, o-i ge ǁnoas ǃnâ ǁnās khami nî ī. 13 ǁNās ǃās ǃnâ ǁîn di altarde hîkākā, ǁîn di ǀuiǂgurihaiga khôaǁnâ, î ǁîn di elos, Aseras īga ǃgaoǁnâ.
14 “ǀKhara elo-ets ge ǀgoreǀî tide, tita ǃKhūta, Tauxa ti ǀon hâ ta a tauxa Elo xui-ao. 15 Tā ǃhūb di khoen ǀkha ǀhûǀguitimî-e dī, ǁîn di ǁgôa-elogan ga ǀgoreǀî tsî ǁguibade ǁguiba, on ge ǁîna sado ǁnāǀî ǁkhau ǁkhā tsî du ge ǃâitsâhe tsî ǁîn ra ǁguiba ǂûna sī a ǂû ǁkhā. 16 Ots ge sadu ôaga ǁîn di ôade nî ǃgame kai, ǁîga ǀai-aodi khami ǁîdi di ǁgôa-eloga ǀgoreǀîs ǃaroma nî ǂgaeǂhapude.
17 “Tsunitsunisa ǀurib ǀkha kurusa elogats ge ǀgoreǀî tide.
18 “Egipteba xu du gere ǃnoraǃnorahe ǁkhâb, Abib ǃnâ du ge Khūkhū-e ūhâ tama Pere-i di ǁÂudība, tita ge mîmā khami nî tsēdī. Hû tsēdi ǁâudīb didi ǃnâ tā khūkhū-e ūhâ pere-e ǂû.
19 “ǂGuroǃnaesagu Israelǁîn digu tsî ǁîn di ǀgoan tsî goman digu hoagu ge a ǃKhūb di, 20 xawe du ge mâ ǂguroǃnaesab dâuki-i dib hoaba ǁkhaob ǀkha nî ǁamaǃkhuni, tsîts ga ǁamaǃkhuni ǂgao tama i, ots ge dâukib ǃaosa nî khôa. Mâ ǂguroǃnaesab khoen dib hoab ge ǁkhāti nî ǁamaǃkhunihe.
“Tātsēs tsîna tā ǁguiba-e ūhâ tamase tita hā ǀgoreǀî.
21 “ǃNani tsēdets ge sa sîsenni hoabats nî dīse ūhâ, xawe hûǁî tsēs aits ge sîsen tide, nēsi i ga tsoroǁae tamas ka io ǃgaoǁae xawes tsîna.
22 “Hoaǁae ǃGaos di ǁÂudība ǂguro ǂûn sa ǃhorob dinats ga ǃgao, o tsēdī, î ǀHaoǀhaos di ǁÂudība kurib ǀunis, ǂûna du ra ǀhaoǀhaos ai tsēdī.
23 “Kurib ǃnâ ǃnona ǃnāde gu ge sa khoegu hoaga hā tsî tita ǃKhūta, Israeli di Elota nî ǀgoreǀî. 24 Tita ge ǁaedi hoade sa ǃhūba xu ǃhaeǂui tsî sa ǀkharib hoaba nî khoraǂui. Kurib di ǃnona ǁâudīgu ǃaroma du ga ǃKhūb sadu Eloba ǀgoreǀîǃgû, o-i ge khoe-i xare-e hā tsî ǃhūba ǀhana du tide.
25 “Tā ǀgoa-i ǁguibats ra-i di ǀaoba khūkhū-e ūhâ pere-i ǀkha ǁguibaǁare. Tsî Pasxaǁâudīb ǁaeb ai ra ǁguibahe ǀgoan di kauba tā sao ra ǁgoas kōse ūhâ.
26 “Kurikorobe sadu ǂguro ǂoaǂamsa ǃhanaǂûn hîa du ra ǃgaona ǃKhūb, sadu Elob ommi tawa hā-ū.
“Tā ǁkhao-i tamas ka io piriro-e ǁî-i îs di dai-i ǃnâ sâi.”
27 ǃKhūb ge Moseb ǃoa ge mî: “Nē mîdi ǁîdi ǀkha ta ge ǃgaeǀhaosa sats tsî Israelǁîn tsîn ǀkha a dīde xoamâi.” 28 Moseb ge ǁnāpa xū-i tsîna ǂû tsî ā tamase hakadisi tsēdi tsî tsuxuga ǃKhūb ǀkha ge hâ. ǀUiǂgapakha aib ge ǁîba ǃgaeǀhaos di mîdi, disi mîmāde ge xoaǂgā.
Moseb ge ǂkhai ra ais ǀkha Sinaiǃhomma xu ra ǁgôaxa
29 Moseb ge Sinaiǃhomma xu disi mîmādi xoaǂgā-aisa ǀuiǂgapakha ǀkha ge ǁgôaxa. ǁÎb di ais ge ǃKhūb ǀkhab gere ǃhoa ǃkhais xa gere ǂkhai, xaweb ge ǁîba ge ǀū i ais âb ra ǂkhai ǃkhaisa. 30 Aronni tsî hoaraga Israelǁîn ge Moseb ais ra ǂkhai ǀgausa mû, on ge ǁîb ǀgūse hāsa ge ǃao. 31 Xaweb ge Moseba ǁîna ǂgaiǀkhī tsî Aronni tsî hoaraga ǂgaeǂgui-aogu ǀhûhâsib digu tsîn ǀkha ge ǃhoa. 32 ǁNās khaoǃgân ge hoaraga Israelǁîna Moseb ǀgūse ge hā tsîb ge ǁîba ǃKhūb ge Sinaiǃhommi ai mā bi mîmādi hoade ǁîna ge mā. 33 Moseb ge ǁîn ǀkhab ge ǃhoatoao, ais âba ǀhaub ǀkha ge ǃgū-ai. 34 Moseb ge ǃKhūb di Tentommi ǃnâb ge ǃKhūb ǀkhab nî ǃhoase gere ǂgâ ǁaeb hoaba ais âba xu ǀhauba gere ūǁnâ. Tentomma xub ga ǂoaxa, ob ge hoaraga xūn hîab ge ǃKhūba gere mîmā bina khoena gere mîba. 35 Tsîn ge Israelǁîna mâtis ǁîb di aisa ra ǂkhai ǃkhaisa gere mû. Moseb ge ǁkhawa ǁîb aisa ǀhaub ǀkha gere ǃgū-ai, ǁkhawab sī ǃKhūb ǀkha ǀhao tsî nî ǃhoas kōse.
© Khoekhoegowab Elobmîs © Bible Society in Namibia, 2020.
