Ûib xa hâ ǂâidi
1 ǃGâi ǀons ge ǃgomǀgausa ǃgâihamxū-i ǃgâ-ai a ǃgâi;
tsîs ge sa ǁōtsēsa ǃnaets ge tsēs ǃgâ-ai a ǃgâi.
2 ǃOab hâ om-i ǁga ǃgûs ge
ǃgâiǃgâisens hâ ǃkhai-i ǁga ǃgûs ǃgâ-ai a ǃgâi,
ûib hoaǁae ǁō da nî ǃkhaisa ra ǂâiǂâiǃnâ da xui-ao.
3 ǃOas ge âis ǃgâ-ai a ǃgâi;
ais âtsa a ǃoaǃoa ǁkhā xawe ra ǁnâuǃāba ǀgaiǀgai.
4 Gā-ai khoe-i ge ǁōb di ǂâibasensa ra ǂâiǃgâ;
gân ra ǃgâiǃgâisens xa ǀgui ǂâi hîa.
5 Gā-ai khoe-i di ǃkhâikhomsa ǃgâs ge
gâ khoen di ǁnaeba ǃgâs ǃgâ-ai a ǃgâi.
6 Gâ khoe-i di âib ge ǁkhūn,
ǀaes ǃnâ ra ǂaninin khami ra ǀō.
Nēs ge a harebeoǃnâ.
7 ǁGâiǀāb ge gā-ai khoe-e ra gâ kai
tsî ǁamaǃkhunis ge ǂgaoba ra hîkākā.
8 Xū-i di ǀams ge ǁî-i di tsoatsoas ǃgâ-ai a ǃgâi.
ǃNūǃnâxasib ge ǃguriǃgurisens ǃgâ-ai a ǃgâi.
9 Tā ǃhaese ǁaixa,
ǁaixasib gân di ǂgaob ǃnâ ǀgui ǁan hâ xuige.
10 Tā “Tare-i ǃaroma di ǃkharu ge tsēde nēsi hâdi ǃgâ-ai ge ǃgâi i?”
ti dî re, nēs gā-ai dî tama xuige.
11 Gā-aisib ge ǀumisa ǃkhōǃoas khami ī
tsî ǁnān soresa ra mûna aiǂhanu-i ase a ība.
12 Gā-aisiba sâus ge
mari-e sâus ǁkhās khami ī.
Gā-aisib ra sâu xui-ao,
nēs ge a ǂans di aiǂhanu.
13 Elob sîsenna ǃgaoǃgâ re.
Mâti i khoe-e Elob gama kai hâ xū-e
a ǂhanuǂhanu ǁkhā?
14 Xūn ga ǃgâise ǃgûba tsi, o ǃgâiaǂgao re,
î ǃgomsin ga hāǂam tsi, o ǂâis ǃnâ ūhâ re:
Elob ge ǃgâin tsî tsūn hoana kuru hâ
tsîts ge a ǀū taren noxopa nî ī ǃkhaisa.
15 Hoaraga xūna ta ge ti harebeoǃnâ ûib ǃnâ ge mû.
ǂHanu-ai khoen ra ǂhanu-aisib ân ǃnâ ǁō
hîan ge ǂkhaba khoena ǁîn ǂkhabasib ǃnâ ra ûihâhâ.
16 Tā ǃnāsase ǂhanu-ai
î tā ǃnāsase gā-aikaisen.
Tare-i ǃaromats ra ǁî-aitsama hîkākāsen ǂgao.
17 Tā ǃnāsase ǂkhaba î tā gâ.
Tare-i ǃaromats sa ǁaeb aiǃâ nî ǁō ǂgao?
18 Nē ǀgam ǃkhâikhomra ǃkhōmâis ge a ǃgâi,
ǁnān Eloba ra ǃaoǃgân ǁîra hoara ǃnâ,
ǁguiǂams âna nî dīǀoaǀoa xui-ao.
19 Gā-aisib ge disi khoegu, ǃāsa ra ǂgaeǂguigu ǃgâ-ai
khoe-e ra gā-ai kai.
20 ǂHanu-ai khoe-i, ǃgâise ǀgui ra dī
tsî ǁore tama-i ge ǃhūbaib ai a ǀkhai.
21 Tā khoen ra mî xū-i hoa-e ǃgâ,
îts tā sa ǃgā-i ra ǃkhāǃkhā tsi ǀgausa ǁnâu;
22 aitsamats sats tsîna ǂan
mâtikō khoenats ge ǂgui ǃnāde ǃkhāǃkhā ǃkhaisa xuige.
23 Nēn hoana ta ge gā-aisib ǀkha ǃâitsâ tsî
“A ta gā-ai re” ti ge mî,
xawes ge ǁîsa tita xu ge ǃnū i.
24 ǁNān hîa hân ge sada nî ǁnâuǃās ǃgâ-ai hâ
tsî kaise a ǃgam.
Khoe-e xare nēsa a ǁnâuǃā ǁkhā?
25 Tita ge ti ǂgaoba gā-aisibab nî ǂan tsî ôaǃnâse ge ǃammâi,
mîǃā tsîb ǂkhabasib, gâresib di gâsib diba nî ǂanse.
26 Tsî ta ge ǁōb xa a au xū-e ge mû
tarekhoes, ǂgaob âs ǁnoa
tsî a ǂhaosa.
ǂGaob âs ge a ǃkhōsis di khede.
Ob ge Elob aiǃâ a ǃgâi khoeba ǁîsa xu ra ǁhâ
xaweb ge ǁore-aoba ǁîs ǃkhōsis ǃnâ ra hâ.
27 Nēn ge ǂkhariǂkharibese ta ge ǂanǂui tsî ǀaro xūna, tib ge Aoǁnâ-aoba ra mî.
28 ǀNî ǃereamna ta ge gere ôa
xawe ta ge ǁîna hō tama ge i.
ǀOadisi aorekhoegu ǁaegu ta ge ǀgui khoeba ge hō,
xawe tarekhoedi xa ta ge ǀguis tsîna hō tama hâ.
29 Nēn ge hoaraga xūn ǁkhāǁkhāsen ta gena:
Elob ge khoesiba ǂhanu-ai tsî ama-aise ge kuru.
© Khoekhoegowab Elobmîs © Bible Society in Namibia, 2020.
