ǃGommi ǃnâ hâ khoe-i di ǃgaes
ǁNaeǃnans ǂgaeǂgui-aob ǃoa. Davidi Psalms
1 Tā ǃnō re, ti koas di Elotse.
2 Eloxoresan di ams, gāxaǃnâsib di ams
ge harase tita ǃoagu a khowasa
tsî ǂhuminams ǀkhan tita ra ǀhapiǂgā-am.
3 ǁKhanni di mîdi ǀkhan ra ǃnamiǂgā te
tsî ǃaromaoǃnâse ǁnāǂam te.
4 Ti ǀnammi ǃaroman ra ǀhapimā te,
ǀgore ta ra hîas tsîna.
5 ǂKhababan ǃgâib ama ra mādawa-am te
tsî ǀnammi ama, ǁkhanna.
6 ǂKhaba khoeba ǁîb ǂama mâi
tsî ǀhapimā-aoba amǀkhāb âb ai.
7 ǀGoraǃgâheb kao, ab ǀhapixase hōhe,
îs ǀgores âba ǁore kai.
8 A di tsēdi âba ǀoro,
î-i ǀnî-e sîsensoas âba ū.
9 An ôasana ǃguniǀgôa,
îs taras âba ǃoatara kai.
10 An ǀgôan âba ǀkhopeǃgûma,
în hâǃnân a ǃkhaide xu ǃhaeǂuihe.
11 Ab surudemā-aoba ūb hân hoana ūxū bi,
în ǃhaokhoena ǁîb ǀhupub di ǂûtaniba ūbasen.
12 A-i khoexaǃnâsiba nî ǁîb ǃoagu ūhâ khoe-e tā hâ!
Î-i tā khoe-i ǁîb di ǃguniǀgôana nî ǀkhom-e hâ.
13 Ab ǁîb suriba ǃgamǂuihe,
î di ǀondi âna sao ra surigu ǃnâ ǀkhai.
14 Ab ǃKhūba aboxan âb di tsūdīgu xa ǂâi
îb ǁgûs ǁoreba tā ǀariǂuihe.
15 An hoaǁae ǃKhūb aiǃâ hâ
îb ǁîn xa hâ ǂâiǂâisensa ǃhūbaiba xu ǃgaoǁnâ.
16 ǁÎb ge khoexaǃnâsiba ǁgausa ǂâi tama hâ i,
tsî ǀgaio khoen tsî ǂhâb ǃnâ hân,
tsî ǃaob ǃnâ hâna ǃgam nîse gere ǃgôaǃgon xui-ao.
17 ǁÎb ge ǀâxaresa ge ǀnam i, xuige ab ǀâxarehe.
ǁÎb ge ǀkhaeb ǃnâ ǃgâiǃgâibasen-e ūhâ tama hâ i
xuige ab ǀkhaeba ǁîba xu ǃnūse hâ.
18 ǀÂxarebab ge anaǂamsara-i khami gere ǂgaeǂgā;
ǁîb di ǃnākhoesib ǃnâ ǁgam-i khami,
tsî ǂkhōn âb ǃnâ ǀkhera-oli-i khami ra āǂgāba.
19 As nēsa ǁîba sara-i, ǁî-i ǃnâb ra ǂgamsen-i,
kamanaǃgaesen-i ǀamose ǁîb kamana ǃgaesa-i khami ība.
20 As nēsa ǃKhūb di mādawa-ams ase ti mâǃoasabena ība,
ǁnān ti ûib ai tsūǃōba ra gowana.
21 Sats ǃKhūts, ti ǃKhūts ge ǀons âts ǃaroma nî sîsen,
sa hâhâ ra ǀnammi di ǃgâisib ǃaroma ore te re.
22 ǀGâsa tsî ta ǂhâb ǃnâ hâ,
tsîb ti ǂgaoba ǃkhāǃganuhe hâ xuige.
23 Sommi ǃuiǁaeb ai ra toa khami ta ge ra toa,
ǂhommi khami ta ge ra ǃhaebeǁnâhe.
24 ǁGoara âtara ge ǂûtama hâs xa ra ǂkhabu
ǂkhō tsî khōs ǀguisa ta ge ī.
25 ǁÎna ta ge ǃhōxūse ge ība;
titan ga mû on ge ra ǃnabindana.
26 Ti ǃKhū tsî Elotse hui te re;
sa hâhâ ra ǀnammi ǃaroma sâu te re.
27 În sa ǃommi asa mûǂan
tsî sats ǃKhūts go dī ǃkhaisa.
28 ǁÎn ga ǀâxare, xawets ge satsa nî ǀkhae te;
tita ǃoagun ga khâi, ǁgoasin ge nî taotaohe;
tsî ta ge sa ǃgāta nî ǃgâiaǂgao.
29 An ti mâǃoasabena taob ǀkha anahe;
an anaǂamsarab ǃnâs khami taosib ân xa anahe.
30 Ti ams ǀkha ta ge ǃKhūba nî koa;
ǂgui khoen ǁaegu ta ge ǁîba nî kare.
31 ǂHâb ǃnâ hân di amǀkhāb aib ra mâ xui-ao,
ǁîna ǁnān ûib ân ai ra mîǁgui ǂgaona xu nî orese.
© Khoekhoegowab Elobmîs © Bible Society in Namibia, 2020.
