Davidi ge ǃKhūba omma ra ǂnubiba ǂgao
(2 Samuel 7:1-17)1 Gao-aob Davidi ge ǁîb di gao-ommi ǃnâ ge ǁan hâ i. ǀGuitsēb ge ǁîba kēbo-aob Natanna ǃoa ge mî: “Kō, tita ge sederhain ǀkha kurusa ommi ǃnâ ǁan hâ, xawe ǃGaeǀhaos ǂGaes ǃKhūb dis ge Tentommi ǃnâ mâ.”
2 Ob ge Natanna ge ǃeream: “Dī ǂgaots ra xūn hoana dī re, Elob sats ǀkha hâ xuige.”
3 Xaweb ge Eloba ǁnā tsuxub ǃnâ Natanna ǃoa ge mî, 4 îb ǃKhūb di ǃgāb Davida sī mîba: “Nētib ge ǃKhūba ra mî: ‘Satsa kha tita om-e ra ǂnubiba ǂgao, ǁanǃnâ ta nîse? 5 Israelǁaesa ta ge Egipteba xu a ǂgaeǂguiǂui tsēsa xu nētsēs kōse ta ge tita om-i ǃnâ ge ǁan tama hâ i, tsî ta ge Tentommi ǃnâ hâse, nē ǃkhaisa xu naus ǁga gere doema. 6 Israelǁîn ǀkha ta gere doema ǃkhaidi hoadi ai ta ge ti ǁaes Israels ǂgaeǂgui-aogu di ǀguib xaweba, tare-i ǃaromab om-e sederhain ǀkha ǂnubiba te tama ǃkhaisa ge dî tama hâ i.’
7 “Nēsi ti ǃgāb Davida mîba: Nētib ge ǃKhūb Hoaǀgaixaba ra mî: ‘Tita ge satsa ǃû-aisa xu, gūnats ra ǃûipa xu ge ū, ti ǁaes Israels ǂamats nî gaose. 8 ǃGûts ka ǃkhai-i hoa-i ai ta ge sats ǀkha ge hâ i, tsî ta ge sa khākhoen hoana sa aiǃâ gere hîkākā. Tita ge ǃhūbaib di kai ǂgaeǂgui-aogu a ǂansas ǁkhās khamits kaise nî ǂansa ǃkhaisa nî dī. 9-10 Ti ǁaes Israelsa ta ge ǃkhai-e ǁhûiǂuiba tsî ǁnāpa ge ǁan kai. ǁNāpan ge khoe-i xare-i xa ǃaruǀî ǁgâiǀāhe tide. Nē ǃhūb ǃnân ge doeǂgâxasa xun ge ǂkhaba khoen xa gere ǁnāǂamhe, xawes ge ǁnāsa ǁkhawa ī tide. Tita ge sa khākhoen hoana nî hîkākā tsî ôananôaguba nîra ǀaroba tsi. 11 ǁŌ tsîts ga sa aboxagu tawa ǁkhōhe, o ta ge sa ôagu di ǀguiba gao-aose mâi tsî gaosis âba nî ǁapoǁapo. 12 ǁÎb ge tita omma nî ǂnubiba tsî tita ge ǁîb gaosisa ǀamos kōse nî aiǃgû kai. 13 Tita ge ǁîba ǁgûse nî ība tsî ǁîb ge tita ǀgôase nî ība. Xawe ti ǂkhâǃnâsa ta ge Saula xu ta ge ūbē khami, ǁîba xu ūbē tide. 14 ǁÎba ta ge ti ǁaes tsî ti gaosis ǂamab ǀamose nî gaose ge mâi. ǁÎb gaosis ge ǀamos kōse nî hâhâ.’ ”
15 Natanni ge ǃKhūb xab ge ǂhaiǂhaibahe xūn hoana Davida ge mîba.
Davidi di ganganǀgores
(2 Samuel 7:18-29)16 ǁNās khaoǃgâb ge gao-aob Davida Tentommi ǃnâ ǂgâ tsî ǃKhūb aiǃâ sī ǂnû tsî ge ǀgore: “Tarita tita ǃKhū, ti Elotse tsî tareba ti suriba, ots nētikō xūna go dība te? 17 Nēn tsîn ge go ǂâuba tsi tama hâ i ǃKhū, ti Elotse. Sats ge ǁkhāti sa ǃgāta suriba, ǃnūse ǃgoaxaǁaeb ǃnâ nî īna go mîmâiba. Nētits kha khoe-e nî dība ǃKhū, ti Elotse. 18 Tare-e ta kha tita Davida ǃaruǀî nî mîba tsi ǁkhā? Sats kom sa ǃgāta a ǂano ǃKhū, ti Elotse. 19 Sa mîǀguis tsî ǂâibasens ǃoats ge nē kai xūna go dī, tsîts ge ǁîna sa ǃgāta go ǂanǂan. 20 ǁNā-amagats ge a kai ǃKhū, ti Elotse. Sats khami īb xareb ge a ǀkhai. Sats ǀguits ge a ama Elo, ǁnâu da ge khami. 21 Mâ ǁaesa kha ǃhūbaib ai sa ǁaes Israels khami ī, sa ǁae kais nîsets ge oresa, ǀonsats nî dībasense. Sats ge nē ǃhūb ǃnâ, ǃhaodi tsî ǁîdi elogu ǀkha kai tsî ǃhuriǃhurisa xūna ge dī, sa ǁaes Egipteba xuts ge ǃnoraǃnorabasens ǃaroma. 22 Sats ge Israelsa, ǀamoses sa ǁaese nî hâse ge dībasen, tsîts ge sats ǃKhūtsa ge ǁîn Elo kai.
23 “Nēsi ǁnâi ǃKhū Elotse, tita sa ǃgāta tsî ti ôananôagub ǂamats go mîna, an ǀamos kōse hâhâ re. Mîmâits gena dī re, 24 îs sa ǀonsa ǀamose kaikaihe, în khoena mî: ‘ǃKhūb Hoaǀgaixab ge a Israels Elo.’ Ab sa ǃgāta, Davidta di ôananôaguba ǀamose sa aiǃâ hâhâ re. 25 Ti Elotse, sats ge sa ǃgāta ǃgāsase ge mîba: ‘Tita ge sa ôananôaguba nî gao-aodī.’ ǁNā-amaga ta ge sa ǃgāta, nē ǀgoresa ta sats ǃoa nî ǀgorese, ǁkhoaǂgaosiba go hō. 26 Tsî nēsi ǃKhūtse, sats ge a Elo tsîdi ge sa mîde amase nî ī. Sats ge nē ǃgâi mîmâide sa ǃgāta ge mîmâiba. 27 Sa ǃgāta di ôananôaguba ǁnâi ǀkhae re, îb ǀamos kōse sa ǃoabas ǃnâ hâ. ǃKhūtse, sats ge ǁîsa ge mîmâi tsîb ge sa ǀkhaeba, sa ǃgāta di ôananôagub ai ǀamos kōse nî hâ.”
© Khoekhoegowab Elobmîs © Bible Society in Namibia, 2020.
