Hakaǁî ǂkhanis
Elob tsî khoesib
Moseb, Elob aob di ǀgores
1 ǃKhūtse sats ge sida ǁhaiǁhâǃkhaise ge ība i, ǃhaosa xu ǃhaos kōse.
2 ǃHomgu ǃnae tamasa xu;
ǃhūb tsî ǃhūbaibats ūǀkhī tamasa xu;
ǀamosiba xu ǀamosib kōsets ge satsa a Elo.
3 Sats ge khoesiba tsarab ǃoa oa kai tsî ra mî:
“Oahā re khoen ôado.”
4 ǀOadisi kurigu ge sa mûǁae ǁaris, ǃgû-ī gos khami,
tsî tsuxuǃûiǁaeb khami ī.
5 Sats ge ǁîna ra ǀnapubē,
ǁîn ge ǁhapo-i ase ī;
6 ǀgâb hîa ǁgoaga ǁhaiǂoaxa
tsî ǃuia ra ǂnâb khami.
7 Sa ǁaib xa da ge ra hîkākāhe,
sa ǁaixasib xa da ge ra ǃaoǃaohe.
8 Sats ge sida ǃûǂamde sa aiǃâ ra mâi;
sida di sâusa ǁorenats ge ǃnâb ǃnâ sida aiǃâ ra hā-ū.
9 Sida tsēdi hoadi ge sa ǁaixasib ǃnâ ra ǃkharu,
sida kuriga da ge ǀhâimâinǀoms khami ra hâǃkharu.
10 Sida ûiǁaeb ge hûdisi kuriga,
tsî khoe-i ga kaise ǀgaisao ǁkhaisadisi kuriga.
Tsî dana xūkha âb ge ǀhupub tsî ǃoab tsîkha.
ǃHaeseb ra ǃgû-ī, ǁkhanagaru-i khami da ī amaga.
11 Tari-e sa ǁaixasib di ǀgaiba a ǂan?
Tari-e sa ǁgôasib di ǀgaiba a ǂan?
12 Sida tsēde ǂhanuse ǃgôasa ǁkhāǁkhā da,
gā-aisib di ǂgaoba da nî ūhâse.
13 ǁKhawa oahā re ǃKhūtse! Mâ ǁaeb kōsets nî ǀhabe?
Sa ǃgāna ǀkhomxa re.
14 Sa hâhâ ra ǀnammi ǀkha ǁgoaga ǁâǁâ da re,
î da dâ tsî ǃgâiaǂgao,
sida ûitsēdi hoade.
15 Sidats ge ǃoa kai hâ i tsēdi kō tsēde ǃgâiaǂgao kai da,
kurigu ǁîgu ǃnâ da ǃgomma gere tsâga.
16 A gu sa ǀgaisa sîsenga sa ǃgān tawa mûhesa
tsî sa ǂkhaisiba sa ôan tawa.
17 AbǃKhūb sida Elob di ǃgâisiba sida ai hâ;
îb sida ǃomgu di sîsenna ǁapoǁapoba da re,
ā, sida ǃomgu di sîsenna ǁapoǁapo re.
© Khoekhoegowab Elobmîs © Bible Society in Namibia, 2020.
