Mixa 6 - Khoekhoegowab New Translation 2020 (KKG20)

ǃKhūb ge Israels ǂkhawadība ra gowaǀî

1 ǃGâ re tare-eb ǃKhūba ra mîsa: “Khâimâ, î sa ǁhōba ǃhomgu aiǃâ ǃhoa, î gu ǃnâuga tare-es ra mîsa ǁnâu.

2 “ǁNâu re sa ǃhomgo ǃKhūb di ǀhapimāsa, sa ǀgaisa ǃgaoǃgaogo ǃhūbaib digo. ǃKhūb ge ǁhō-e ǁaes âb ǃoagu ūhâ, ǁîb ge Israelsa nî ǀgoraǃgâ.

3 “Ti ǁaese tare-e ta ge dī si? Tare-i ǀkha ta ge ǀhupuǀhupu si? ǃEream te re! 4 Tita ge Egipteba xu ge ǂgaeǂguiǂui si, khobosisa xu ta ge ge huiǂui si. Tita ge Moseb tsî Aronni tsî Miriams tsîna ge sî, în sasa ǂgaeǂgui. 5 Ti ǁaese ǂâi re, tare-eb ge Moab gao-aob Balaka sadu ǃoagu gere ǀapesa, tsî mâtib ge Beori ôab Bileamma ǃeream bisa. ǂÂi re, Sitimsa xu Gilgals ǁga garu daob ai ge īn xa, os ge ǂhanu-ai dīgu ǃKhūb diga nî ǂan.”

ǃKhūb di ǂgaoǀkhādi

6 Tare-i ǀkha ta kha ǃKhūb tawa nî sī tsî ǀgapi Elob aiǃâ nî ǃhonǁgoa? Khauǁguibadi ǀkha ta ǁîb tawa nî sī, ǀgui kurixa tsâugu ǀkha? 7 ǃKhūba ǀoadisidi baigu xa ǃgâibaheb nî, tamas ka io disiǀoadisi ǀkhera-oliǃārogu xa? Ti ǂguroǃnaesaba ta ti ǃûǂams ǃaroma ǁîba nî mā, ǁnāb ti sorosa xu ge ǀkhība ti ǁoreb ǃaroma? 8 Khoetse, ǁîb ge satsa tare-i a ǃgâi ǃkhaisa ge ǂanǂan, tsî tare-eb ǃKhūba satsa ra ǂgaoǀkhāsa. ǁÎb ra ǂgaoǀkhān ge: ǂHanu-aisets nî dīs, hâhâ ra ǀnammats nî ūhâs tsî Elob aiǃâts ǃgamǃgamsens ǃnâ nî ûisa.

9 ǃKhūba ǃgaoǃgâs ge a ǃgâi. ǁÎb ge ǃās ǃoa ra ǂgai. ǁNâu re ǃhaose, tsî sadu ǃās ǃnâ ǀhao hân tsîdu hoado. 10 ǀUru ta kha ǁnâi nî, ǂhanuoǃnâ ǃkhūsib eloxoresab di oms ǃnâ hâba, tamas ka io ǂhanu tama ǀnō-ūdab hîa ta ǁkhan hâba? 11 ǂHanuoǃnâ ǀnō-ūdasa ra sîsenū khoeba ta kha nî ǀhapio kai, ǁnāb ǂhanu tama ǀnō-ūǀuidi xa ǀoa hâ ǁgaruba ūhâba? 12 ǃĀs di ǃkhū hân ge ǂkhababa ra dī; ǁîs ǁanǂgāsaben ge ǂhumi tsî ra gāxaǃnâ. 13 ǁNā-amaga ta ge tita sasa ǀnai ǁkharatsoatsoa tsî ǁoren âs ǃaroma ra hîkākā si. 14 Sas ge nî ǂû, xawes ge ǁâ tide; sa ǃnāb ge nî ǀkhaiǃnâ. Sas ge xūna nî ǀhaoǀhao, xawes ge ǁîna sâu ǁkhā tide, ǀhaoǀhaos ka xūna ta ge tita gôab ǀkha nî hîkākā. 15 Sas ge nî tsoro, xawes ge ǃgao tide. ǀKheraǂûnas ge nî ǀā, xawes ge ǀkhera-oli-i ǀkha soposen tide. ǂAuxûiǂûnas ge nî ǀā, xawes ge ǂauxûi-i xare-e ā tide. 16 Sas ge Omrib di ǂnûiǂgāde ge ǃkhōǀgaipe tsî Axab ge dī khami ge dī, tsîs ge ǁîkha ǀapemāsa ge sao. ǁNā-amaga ta ge tita sasa nî hîkākā tsî sa ǁanǂgāsaben ge ǃhōxūse nî ī; sas ge ǁaedi xa nî ǃharaxūhe.