ǁGûs tsî ǁîs ôagu tsîn ge ǁîn ǂgoms ǃaroma ra ǁō
1 ǀNî ǃnā-i ain ge hû ǃgâsagu tsî ǁîgu Jodeǁî îs tsîna ǃkhōsis ǃnâ ge ūhe. ǁÎn ge gao-aob xa hāguǁgan-en nî ǂûga ra ǁgarihese gere ǂnauhe. 2 Ob ge ǀguib ǂkham khoegu diba “Tare-ets nî nēsa xu hōsats ra ǃâubasen? A da ǁō, sida aboxagu di ǁnaetiga da nî ǁnāxūs xa” ti ge mî.
3 Nēs ge gao-aoba kaise ge ǁaixa kai, tsîb ge kai sūgu ǀapa gu nîs kōse nî ǀgamǀgamhe ǃkhaisa ge mîmā, 4 tsî i ge ǁnātimîsi ǁnāti ge dīhe. ǁÎb ge ǁîb khoega ge mîba, î gu ǁgûs tsî nau ǃnani ǃgâsagu mâ ra mû, hîa ǁnāb ǃhoa geb di namma ǃgaoǁnâ, danakhōs âba ǃgaoǁnâ tsî ǃomkha tsî ǂaira âba ǁhāǁnâ. 5 Tsî ǂkham khoeb ge aitsama huisen ǁoa, ob ge gao-aoba ǁîga ge mîmā, î gu ǁîba noxopab ra ǀom hîa ǀaes ǁga tani tsî amǃnâxapab ǃnâ ǁîba aoǂgā. ǀAnni nē amǃnâxapaba xu ra khâi, hîan ge ǃgâsagu tsî ǁîgu di îs tsîna ǁîǃnābe ǁkhoaǂgaoxase ǁōsa gere ǂgaoǂgaoǃnâgu, mîraǃâ: 6 “ǃKhūb Elob ge ra kō tsîb ge sida tsâba ra ǁnâuǃā. Moseb ge ǁnaetsanas hîab ge ǁnān hîa ge Eloba ǁnāxūnab ra ǀgoraǃgâǃnâs ǃnâ, nē ǃkhaisa nî ǃgāǃgāse ge xoa. ǁÎb ge ge mî: ‘ǃKhūb ge ǁnān ǁîba ra ǃoabana nî ǀkhomxa.’ ”
7 ǂGuro ǃgâsab ge nē ǀgaub ai ǁōs khaoǃgâ gu ge toroǃkhamaoga ǀgamǁîb ǀkha ge ǂgamǂgamsentsoatsoa tsî ǁîb di danakhōba ǀûn ǀkha danas âba xu ge ǂgaeǁnâ. ǁNās khaoǃgâ gu ge ǁîba ge dî: “Nē hāguǁgan-e nēsi ǂûts nî tamas ka io ge sa ǃomkha tsî ǂaira ǀguiǀguibese nî ǁhāǁnâsats ra ǂhâba?”
8 Ob ge ǁîb aboxagu gowab ǃnâ ge ǃeream: “Tātsē ta ǂû tide!” Toro-aogu ge ǂgurob ǀkha gu ge dī khami ǁîba gere tsâtsâ, 9 xaweb ge ǀuni ǀoms ai gao-aob ǃoa ge mî: “Sa ǃgamaotse! ǃGam da ǁkhāts ge a, xawe kurus di Gao-aob ge ǁîb di ǂhanuba da ge ǁnâuǀnam xui-ao ǁōba xu ūkhâi da tsî ǀamo ûiba nî mā da.”
10 Toro-aogu ge ǁkhawa ǃnonaǁî ǃgâsab ǀkha ge ǂgamǂgamsentsoatsoa. ǁÎb di nammab nî ūǂui ǃkhaisab ge mîmāhe, ob ge ǃhaese ǁnāti ge dī. Tsîb ge ǁkhoase ǁîb ǃomkha ǀhōǂui 11 tsî ǁkhoaǂgaoxase ge mî: “Elob ge nēna tita ge mā. Xawe ǁîb di ǂhanub ge ti ǃomkha xa ǃnāsa ǂâibasensa ūhâ tsî ta ge Elob nî ǁkhawa ǁîkha mā-oa te ǃkhaisa a ǂan.” 12 Gao-aob tsî ǁîb ǀkha ge hâ-in ge ǁîb di ǁkhoaǂgaosib tsî tsâba māsens xa ge burugâ.
13 ǁÎb ge ǁōs khaoǃgâ gu ge toroǃkhamaoga hakaǁîba ǁkhā ǀgaub ai ge tsûtsû, 14 xaweb ge ǀunis ai ge mî: “Tita ge sago ǃomǁae ǁōs ǃaroma ra ǃgâiaǂgao, Elob xa da nî ǁōba xu ūkhâihe ǃkhais di ǂgomǃgâsa da ūhâ xui-ao. Xawe sats ǃaromas ge ǁōba xu khâisa hâ tide, Antioxutse!”
15 Toro-aogu ge koroǁî axaba ū tsî tsûtsûtsoatsoa, 16 ob ge ǁîba gao-aoba ǃoa ais ǃnâ kō tsî ge mî: “Sats ge ǂâits ra xū-i hoa-e sida ǀkha, sats tsîn a ǁōǁkhā, hîa dīs di ǀgaiba ūhâ. Xawe tā Elob ge sida khoena ǁnāxū ti ǂâi. 17 ǃÂus ǀguisa hî. Elob ge ǁîb di kai ǁkhāsiba sîsenū tsî sats tsî sa ôananôagub tsîna nî tsûtsû.”
18 Tsî toroǃkhamaogu ge ǃnaniǁî axaba ū, ob ge ǁōb nîs aiǃâ ge mî: “Tā ǂâisā, sida xa ǃaromahe hâ xūn ai da ra tsâ xuige, sida di ǂhunuma Elob ǃoagu da ge ǁore xui-ao. ǁNā-amagas ge nē tsū xūn hoan ra sida ǀkha īsa. 19 Xawe tā Elob ǃoaguts ge ǃkham, hîa ǁkharahe tamasets nî xūhe ti ǂâi.”
20 ǁGûs ge ǁîgu hoagu xa ge buruxa i tsî sida di ǂâidi ǃnâ ǃgôasiba anu hâ. ǁÎs ôagas ge ǀgui tsēs ǃnâ ra ǁōse mû, xawes ge ǃKhūb ǃnâs ge ǂgom hâ i xui-ao kai ǁkhoaǂgaoxasib ǀkha nē ǃkhaisa ge mâǃkharu. 21 ǁÎs ge mâb hoaba tarekhoe tsâsigu tsî kai ǁkhoaǂgaosib ǀkha ǁgûsi gowab ǃnâ gere ǂgaoǂgaoǃnâ: 22 “Tita ge sago di ûib ge ti ǃnāb ǃnâ mâti tsoatsoa ǃkhaisa a ǀū. Ti tama ge hâ i ta ge ûib tsî ǀoms tsîra mā tsî sago di sorodi di uniǁaede ǀhaoǀhao ta. 23 Elob hîa ǃhūbaib, khoen tsî hoaraga xūna ge kurub ge ǁnāsa ge dī. ǁÎb ge a ǀkhomxaǃnâ tsî ûib tsî ǀoms tsîra, sats ǁî-aitsamats ǀnamsens ǃgâ-ai, ǁîb ǂhanuba ǀnam xui-ao ǁkhawa nî mā-oa tsi.”
24 Antioxub ge nē ǁgûs ra ǁîba ǃhō ǃkhaisa ge ǂan i, tsîb ge īǁkhā as kōse ǁîs ôab ǂkhamma gere gowadan ǂgao, îb ǁîb aboxagu di ǁnaetiga ǁnāxū. ǁÎb ge ǃkhūsib tsî ǃgâiǃgâb ǀguiba ǁîba mîmâiba tama, xaweb ge ǀgapi ǃharos ǂgaeǂguis dis tsî “Gao-aob di ǀHōsab” ti hâ ǂgaiǂams tsînab nî mā bi ǃkhaisa ge mîmâi. 25 Xaweb ge axaba ǁîb ǀkha ge ǁaeǁaesen tama hâ i. Ob ge gao-aob Antioxuba axab îsa gere gowadan ǂgao, îs ǁîb di ûib nî sâuhega ǀgôab ǀkha ǃhoa, 26 tsîs ge ǂgui ǀkhomadi khaoǃgâ ǁnātis nî dī ǃkhaisa ge mā-amsen. 27 ǁÎs ge ôasab tawa ǀgūǀgūsen tsî nē karosaǂgao ǂgaeǂgui-aoba ge ǂgaeǂhapu, ǁgûsi gowab ǃnâ ra nēti ra mîse: “Ti ôatse ǀkhom te re. Khoese ǁkhâga ta ge ti ǃnāb ǃnâ tani tsî ǃnona kuriga daisi tsi ǃkhaisa ǂâihō re. Tita ge kaikai tsi tsî nētsēs kōse sa ǂhâsin ǃoa gere kō. 28 Ti ôatse, ǀkhoma tsi ta ge ra, ǀhommi tsî ǃhūbaib tsîn ǃoa kō re. ǁNāpats ra mûn hoan xa ǂâi tsî Elob ge ǁîn hoana ǀkhai a xūna xu kuru, khoenab ge kuru khami ǃkhaisa mûǂan re. 29 Tā nē ǃgamaoba ǃao. Māsenxase sa ûiba mā, î sa ǃgâsagu khami ǁōsats anu hâ ǃkhaisa ǁgau, î ta Elob di ǀkhomma xu khâis tawa sago hō-oa ǁkhā.”
30 ǃHoaǀûs nîs aiǃâb ge axaba ge mî: “Gao-ao Antioxutse, tare-ets ǃâu hâ? Tita ge sa mîmāde ǁnâuǀnamsa ra ǂkhā. Tita ge Moseba ge sida aboxaga ge mā ǂhanub ǃnâ mâ mîmādi ǀguide ra ǁnâuǀnam. 31 Sats ge hoa tsûtsû-aina sida khoen ǃaroma ge ǂâiǂui, xawets ge Elob satsa ǂnûibēba hâ ǁkharaba xu ǃnora tide. 32-33 Sida ûitsama ǃKhūb sida ǀkha ǁaixa hâ tsî ǁoren âda ǃaroma ra tsâ kai da, sidab nî ǂhanuǂhanu tsî ǁkhāǁkhāga ǃkhais ge a ama. Nē ǃkhais ge ǃnubu ǁaero-i ǃaroma ǀgui, ǁîb di ǃoaba-aoda a xui-ao hâ tsîb ge nî ǀûba da. 34 Xawe sats ge xūn hoan xa karosaǂgao tsî ui-uisa xūts hîa ûi hâtsa. Tā aitsama Elob di khoenats ra ǃgam hîa ǀgapiǂâixasib xa ǂgaeǂhapuhe. 35 Sats nî hoaǀgaixa tsî hoana ra mû Elob di ǁkharaba xu ǃnora ǁgau-i ge a ǀkhai. 36 ǂKhari ǁaero-e gu ge tsâs khaoǃgâ gu ge ti ǃgâsaga Elob di ǃgaeǀhaos ǃnaka ǀamo ûib ǃnâ ge ǂgâ. Xawets ge satsa Elob di ǀgoraǃgâs ǃnâ sa ǀgapiǂâixasib ǃaroma ǂhanu-ai ǁkharaba nî ǃkhōǃoa. 37 Nēsi ta ge ti soros tsî ti ûib tsîna ti ǃgâsagu ge dī khami ti aboxagu ǂhanub ǃaroma ra māǁnâ. Xawe ta ge ǁkhāti Elob nî ǃhaese ǁîb khoena ǀkhomma ǁgau tsî satsa tsûtsû-ain ǀkha, ǁîb ǀguib a Elo ǃkhaisa ǂanǃgâ kai ǃkhaisa ra ǀkhoma. 38 A ge tita tsî ti ǃgâsagu tsîge ǀuniga, hoaǀgaixa Elob di ǁaib hîab ge ǂhanu-aise hoaraga ǁaes ǂama hā kaib ǃnâ ra tsâge.”
39 Nē ǃhōmîdi ge kaise gao-aob Antioxuba ge ǁaixa kai tsîb ge nē axaba ǁîb ǃgâsagu ǃgâ-ai kaise karosase ge tsûtsû kai. 40 Nētib ge nē axaba, ǀgui ǀgâuro-i tsîna îganǀgē tamase, ǀoasa ǂgomsa ǃKhūb ǃnâ ūhâse ge ǁō.
41 ǀUnis ais ge ǁgûs tsîna ǁîs ôagu khaoǃgâ ge ǃgamhe.
42 Xawe ta ge ǂâu hâse, Jodeǁîn hîa ge tsûtsûhe tsî ǁguibade ǂûsa gere ǁgarihen xa go mî.
© Khoekhoegowab Elobmîs © Bible Society in Namibia, 2020.
