Taberas tawa
1 Israelǁîn ge ǁîn di ǃgomsiga ǃKhūb ai ge ǃgaesentsoatsoa. ǃKhūb ge nēsab ge ǁnâuo, kaise ǁaixa tsî ǀaeba ǁîn ai ge sîǁnâ. ǀNî khoena ǂhubi tsîb ge ǁkhāti ǀgui ǃâb hâǃkhaib dib tsîna ge ǂhubiǁnâ. 2 Khoen ge nē ǂōǂōsiba Moseb ai ǃgae, tsîb ge ǁîba ǃKhūb ǃoa ǀgore, ob ge ǀaeba ge ǂhubiǀû. 3 Nē ǃkhais ge Taberas ti ge ǀonǂgaihe, ǁnāpab ǃKhūb di ǀaeba ǁîn ǁaegu gere ǂhubi xui-ao.
Moseb ge hûdisi ǂgaeǂgui-aoga ra ǁhûi
4 Israelǁîn ǁaegun ge ǃhaokhoen, kaise ge ǁganturaba ūhâ ina ge hâ i. Israelǁîn ǂûn ge nēs xa ǃgâibahe tama i tsî ge ǃgaesentsoatsoa: “Sida tsîn ga ǂû da nîse ǁgan-e ūhâo! 5 Egipteb ǃnâ da ge ǂgao da ra ǁau-i hoa-e matareoǃnâse gere ǂû. ǂÂihō da kha ra sada ūhâ komkomergu, ǂkhontsamagu, ǀgâ-uin, tsuibeln tsî ǀō-uin tsîn xa? 6 Xawe nēsib ge sada ǀgaiba a ǀkhai. ǂÛ da nî xū-i xare-i ge a ǀkhai; tsēsa xu tsēs kōseb ge manab ǀguiba hâ!” 7 (Manab ge ǂkhari ǃkhomro-i, ǃhuniǃuriǀûba ūhâ i khami ge ī-i. 8-9 Tsuxub ǃnâ i ge ǁî-e hâǃkhaib ai gere ǁnā tsîn ge khoena sao ra ǁgoas ai hâǃkhaib ǂnamipe ǁî-e gere ūkhâi. ǁÎn ge ǁî-e mel-i ase ǁkhamitsautsau tsî tsamperede ǁî-i ǀkha gere am. ǁÎdi ge ǀkhera-oli-i ǀkha amhe hâ pere-i khami gere ǁkhoa.)
10 Moseb ge mâtin khoena ǁîn tentomdi di ǂgâ-amdi tawa ǂkhîoǃnâse mâ ǃkhaisa ge ǁnâu. Moseb ge nēs xa ge ǃgombahe i, ǃKhūb ge khoen ǀkha ǁaixa xui-ao. 11 ǁNā-amagab ge ǁîba ǃKhūb ǃoa ge mî: “Tare-i ǃaromats nētikō tsūse ra ûi-ū te? Tare-i ǃaromats tita ǀkha ra ǂkhîoǃnâ? Tare-i ǃaromats nētikō kai ǃereams hoaraga khoen disa tita ai ǀgui ra ǁgui? 12 Tita tama ta ge ǁîna kuru tamas ka io ǁîna ge ǃnae kai ta! Tare-i ǃaroma ta tita ǁîna ǂkhari ǀgôaron khami ti ǁôagu ai, ǁîn di aboxagats ge mîmâiba ǃhūb ǁga nî tani? 13 Mâpa ta kha nē khoen hoan ǃaroma ǁgan-e nî hō? ǁÎn kom ǀû tamase tita tawa ǁgan-e ra ôao. 14 Amase ta kom tita nē hoaraga khoen di ǃereamsa a ū ǁoao; amase a īǁoa! 15 Nē ǀgaus aits nî hâna ûi-ū tes kao, o ǁnâi ǀkhom te, îts ǃgam tes ǀguisa hî, ǃaruǀî nēti tsūse ûi-ūhesa ta tani ǁoa xui-ao.”
16 Ob ge ǃKhūba Moseb ǃoa ge mî: “Hûdisi ǃgôaǃgôasa aogu khoen di ǂgaeǂgui-aose a ǂanǃgâsaga ǀhaoǀhao, î ǁîga ǃKhūb di Tentommi tawa hā-ū, î ǁîga sa xōǀkhā hā mâ kai. 17 ǁGôaxa tsî ta ge ǁnāpa sa ǀkha ǃhoa tsî satsa ta ge mā Gagaba xu ǀnî-e ū tsî ǁîga nî mā. Ots ge ǃaruǀî ǀguri ǁîn di ǃereamsa tani tide, tsî gu ge ǁîga nî tanihui tsi. 18 Khoena nēti mîba re: ‘ǁAris ǃaroma ǃanuǃanusen; î du ǁgan-e ǂû. Sadu ge ǃKhūb ra ǁnâuse ǃgae tsî gere mî xui-ao: “ǂÛ da nî ǁgan-e da ga ūhâ hâo! Amase ǃgâise da ge Egipteb ǃnâ ge hâ i.” ǁNā-amagab ge ǃKhūba ǁgan-e nî mā du, ǂû du nîse. 19 ǁÎ-e du ge ǀgui tamas ka io ǀgam tamas ka io koro tamas ka io disi tamas ka io ǀgamdisi tsēde ǂû tide, 20 xawe hoaraga ǁkhâba, sadu ǂguidi ǃnâ i nî ǂoa tsî ǀaesen kai dus kōse. Nēs ge sadu ǃKhūb sadu ǁaegu hâba du ǂhara tsî Egipteb ǁga ǁkhawa oasa gere ǁkhore ǃkhais ǃaroma nî ī.’ ”
21 Xaweb ge Moseba ǃKhūb ǃoa ge mî: “ǃKhūtse ǃnanikaidisi ǀoadisi khoena ta ǂgaeǂgui hâ, hîats ǁînats ǁkhâb hoaragab ǃaroma ǂâu hâ ǁgan-e ūba hâ ti ra mî? 22 Xaren kha nî ǂâu, goman tsî ǀgoan tsîn ga ǂāheo? Hoaraga ǁaun hurib ǃnâ hâna ǁîn ǃaroma ǂâun hâ xare?”
23 Ob ge ǃKhūba Moseb ǃoa ge mî: “Ob kha ǃKhūb di ǃomma ge ǃnubu? O du ge nēsi nî mû, ti mîs a ama tamas ka io ǀkhaiǃnâse nî oaǀkhīsa.”
24 Moseb ge ǂoa tsî ǃKhūb ge mîna khoena ge mîba. ǁÎb ge hûdisi kai khoega ǀhaoǀhao tsî ǁîga ǃKhūb di Tentommi ǂnamipe ge mâ kai. 25 Ob ge ǃKhūba ǃâus ǃnâ ǁgôaxa tsî ǁîb ǀkha ge ǃhoa. ǁÎb ge Mosebab ge mā hâ i gagaba xu ǀnî-e ū tsî hûdisi kai khoega ge mā. Gagab ge ǁîgu ai hās khaoǃgâ gu ge kēbo-aogu khami ge kēbotsoatsoa, xawe gu ge ǁnāsa gaxuse ge dī tama i.
26 Hûdisi aoga xu kha ge Eldadi tsî Medad hâkha hâǃkhaib tawa hâǃgau tsî Tentommi ǁgā ǃgû tama ge i. Hâǃkhaib ǃnâ kha hâ hîab ge gagaba ǁîkha ge hāǂam tsî kha ge ǁîkha tsîna ge kēbotsoatsoa. 27 ǂKham khoeb ge ǃkhoeǂoa tsî Moseba tare-e kha Eldadi tsî Medadi tsîkha hâǃkhaib ǃnâ gere dīsa sī ge mîba.
28 Ob ge Nunni ôab Josuab, ǂkhamsisa xu ge Moseb di hui-ao iba Moseba ge mîba: “ǀHonkhoetse ǁîkha ǂkhā re!”
29 Moseb ge “ ‘Titats ra suri?’ ti ge ǃeream. Tita ge ǃKhūb ga ǁîb khoen hoaragana ǁîb gagaba mā tsîn ga kēbo-aogu khami ǁkhoase aoǁnâ ǃkhaisa ra ǁkhore.” 30 ǁNās khaoǃgâ gu ge Moseb tsî hûdisi ǂgaeǂgui-aogu Israeli digu tsîga hâǃkhaib tawa ge oaǀkhī.
ǃKhūb ge ǃhaude ra sî
31 ǁNātimîsib ge ǃKhūba ǂoab, huriba xu kaise ǂamse ra ǁkhana ǃhaude ra ǀkhī-ūba ge sî. ǁÎdi ge hâǃkhaib tsî ǂnamipeb ai ǂgui kilometerga mâ ǀkhāb hoab ai ge hâ i. 32 Khoen ge hoaraga tsēs, tsuxub tsî sao ra tsēs hoas tsîna ǃhaude gere ǃkhō; khoe-i xare-i ge ǀguiǀoadisis xa ǀoro kiloxramga ǀhaoǀhao tama ge i. 33 ǂGui ǃhaudi ǁgan-i ǁîn di ǂûs ǃaroma hâ, xaweb ge ǃKhūba ǁîn ǀkha ǁaixa tsî ǂuruhe ǁoa ǀaeba ǁîn ai ge hā-ū. 34 ǁNā-amagas ge ǁnā ǃkhaisa Kibrot-Hatafa (“Turab ǀHobadi” ti ra ǂâibasens) ti ge ǀonǂgaihe, kai ǁganturaba ge ūhâ i khoen ge ǁnāpa ǁkhōhe xui-ao. 35 ǁNāpa xūn ge khoena Haserots ǁga danadana tsî ǁnāpa sī hâǃkhaiba ge ǂnaumâi.
© Khoekhoegowab Elobmîs © Bible Society in Namibia, 2020.
